Jehova Jehoshafatak Rakhta

Judacho raza, Jehoshafatan, aplea desantleo Baalacheo vedi ani murteo moddun uddoileo. Sogleamnim Jehovache kaide zannam zalʼlem taka zai aslem. Ani dekhun, akʼkhea Judantlea lokank Jehovache kaide xikounk to raj kunvrank ani Levitank dhaddtta.

Bhonvtonnche des Judacher zhuz korunk bhietale. Karonn, Jehova tanchea sangata asa mhunn te zannam asle. Dekhun te raza Jehoshafatak dennim gheun ietat. Punn Moabitkar, Ammonitkar, ani toxench Seir vattarantle lok Judachea add zhuz korunk ietat. Apnnak Jehovachi modot zai mhunn Jehoshafatak khobor asli. To soglea dadleank, bailank ani bhurgeank Jeruzalem-ant ektthaim korta ani tanchea mukhar oxem magnnem korta: ‘Jehova, tuji modot nastana ami jikhonk xokonant. Please, ami kitem korchem tem amkam sang.’

Jehovan zobab dilo: ‘Tum bhienaka, hanv tuka modot kortolom. Tum fokot tujea zagear ubo rav ani hanv tuka koso salvar kortam tem polloi.’ Jehovan tankam koxe salvar kele?

Dusrea sokallim, Jehoshafatan thoddea gavpeank vinchun kaddle ani tankam soinikam mukhar cholonk lailem. Te Jeruzalema thaun Tekoa nanvachea zagea mhunnosor gele, jem ek zhuzachem moidan aslem.

Gavpi Jehovak khuxalkaien ani vhoddlea tallean gaionam korun vakhannʼnni ditale tednam, Jehova aplea lokam pasot zhuzlo. Tannem Ammonitkarank ani Moabitkarank itlea gondhollan uddoile ki tannim eka-mekacho jiv kaddlo ani eklo pasun salvar zaunk na. Punn Jehovan Judachea lokank, soinikank ani iadnikank salvar kele. Jehovan kitem kelam tem bhonvtonnchea desantlea lokamnim aikolem tednam, to aplea lokam pasot azunui zhuzta mhunn te zannam zale. Jehova aplea lokank koso salvar korta? Zaitea vattamnim. Oxem korunk taka munxanchea modotichi goroz poddona.