Jivit ani Porgottnni Mittingechea Pustike Pasot Modot

JULAY 6-12

DEVACHEA UTRANTLE THEVE

SUTTKA 6-7

“Hanv Faraohk Kitem Kortam Tem Tum Atam Polletoloi”

(Suttka 6:1) Tedna Sorvesporan Moizesak mhollem: “Hanv Faraohk kitem kortam tem tum atam polletoloi. Podvedar hatan tankam dhanvddaitolom, to tankam tachea desantlo bollan bhair ghaltolo.”

(Suttka 6:6, 7) “Dekhun Israelitank sangat, ‘Hanv Sorvespor; hanv tumkam Ejiptkaranchea gulamponnantlim soddoitolom. Mhozo podvedar hat tanche voir ubartolom, ani hanv tanchi khori nit kortolom. ⁷ Hanv tumkam mhoji porza korun ghetolom, ani hanv tumcho Dev zatolom. Ani hanv tumkam Ejiptantlea gulamponnantlim soddoitam tedna, Hanv tumcho Sorvespor mhonn tumkam kollun ietolem.

it-2 436 ¶3

Moizes

Jehovan Moizesak dhaddlolo mhunn survatek Israelitkarank visvas aslo. Punn Faraohn tankam anik chodd vavr korunk lailo tednam tim Moizesacho guneanv korunk laglim. Tanchem ulovop aikon Moizes itlo nirax zalo ki tannem Jehovak ulo marlo. (Sutt. 4:29-31; 5:19-23) Uprant, Bhov Vortea Devan, Jehovan Moizesak ghottai dili. Abraham, Izak ani Jakob jem pollounk ravtale tem apunn atam korun dakhoitolo mhunn Jehovan Moizesak khatri dili. Tem mhunnttlear, Jehova aplea nanvacho orth purnn ritin dakhoun ditolo ani Israel porjek gulamponnantlean soddoun tanchea udexim ek vhodd raxttr toiar kortolo. (Sutt. 6:1-8) Tea uprant pasun Israel porjen Moizesacher bhavarth dovrunk na. Punn nnovʼve khasti uprant tim tachem aikonk laglim. Taka lagon, dhave khasti uprant Moizes tankam ektthaim korunk pavlo ani tankam manddavollin bhair kaddunk taka modot zali.—Sutt. 13:18.

(Suttka 7:4, 5) Faraoh tujem aikocho na dekhun, Hanvuch Ejiptak khoraien vhodd xikxa ditolom ani Israel mhoje porjek ani tichea fouzank Ejiptantlim bhair kaddtolom. ⁵  Ejiptkaram add, Hanv mhozo hat pattlaitolom ani Israel porjek tanchea desantli bhair kaddtolom tedna hanv Sorvespor mhonn tankam kollit zatolem.”

it-2 436 ¶1-2

Moizes

Ejipttachea Faraoh Mukhar. Hi loddai Ejipttachea deva modem ani Jehova modem asli. Moizes ani Aaron Jehovache vatten asle ani he loddaient tancho mukhel bhag aslo. Dusre vatten, Jannes ani Jambres, Faraohchea ghaddianche mukheli asle. (2Tim. 3:8) Hea mukheleam vorvim Faraohn Ejipttanchea soglea devank ulo marlo ki tannim Jehovachea add apli xokti dakhounchi. Moizesan sanglem tednam Aaronan Faraoh mukhar poilem vizmit kelem. Hea vizmita udexim kollon ailem ki Jehova Devak Ejipttachea soglea devam poros chodd xokti asa. Punn, Faraoh bodlonk na, vizmit polloun pasun tannem aplem kalliz dharunn kelem. (Sutt. 7:8-13) Uprant, Jehovan tisri khast dhaddli tednam ghaddiank pasun hem manun gheunk poddlem ki hem soglem Devachea xoktent zalam ani tannim mhunnttlem: “Hem Devachem bott!” Ani toxench tea ghaddianchea angank fodd futtle tednam tankam itle tras zale ki te Faraoh sorxim vochon Moizesacho virodh korunk pavonknant.—Sutt. 8:16-19; 9:10-12.

Khasti udexim thoddim Jehovacho mog korunk pavlim tor thoddim tacho anikui virodh korunk laglim. Moizesan ani Aaronan Dha Khastim vixim kolloilem ani tannem sanglolem toxem sogleo khasti aileo. Hea udexim sogleank puravo mellʼllo ki Moizesak Jehovan dhaddla. Ejiptant sogleak lok Jehova vixim uloitale. Punn, lokam modem veg-vegllo sobhav dison ailo. Israelitkaram ani thoddim Ejiptkaram Jehovacho mog korunk pavlim punn Faraoh, tache opxal ani tenko diupi munis Jehovacho virodh korunk lagle. (Sutt. 9:16; 11:10; 12:29-39) Tanche dev tancher ragar asat dekhun heo sogleo khasti tancher aileat mhunn Ejipttakaram patienaslim. Tankam kollon ailem ki Ejipttanchea devank Jehova mukhar kainch boll na mhunn. Nnove khasti uprant, “Faraohche opxal ani sogllo lok Moizesak Ejiptant ek vhodd manacho monis koso” lekhunk lagle.”—Sutt. 11:3.

Bible-ant Motiam Sodhum-ia

(Suttka 6:3, NW) Sorvpodvedar Dev koso hanv Abrahamak, Izakak, ani Jakobak dixtti poddlom, punn Jehova hea nanvan, hanv tankam porgott zalo na.

it-1 78 ¶3-4

Sorpodvedar

Jehovan Abrahamak Izak zolmotolo mhunn bhas dilʼli tednam tannem apleak “Sorvpodvedar Dev” (ʼEl Shad·daiʹ) mhunnttlo. Hea bhasaunnecher visvas dovrunk Abrahamak purnn khatri asonk zai asli ki Devak apli bhasaunni purnn korunk xokti asa. Uprant, Devan Abrahama sangata korar kelo. Izakak ani Jakobak apunn besanvam ditolo mhunn sangtana pasun Jehovan apunn “Sorvpodvedar Dev” mhunn sanglem.—Ut. 17:1, NW; 28:3; 35:11; 48:3.

Haka lagon, Jehovan Moizesak oxem mhunnttlem: “Sorvpodvedar Dev koso hanv Abrahamak, Izakak, ani Jakobak dixtti poddlom, punn Jehova hea nanvan, hanv tankam porgott zalo na.” (Sutt. 6:3, NW) Tor hea purvozank Jehova hem nanv khobor nasli oxem nhoi, karonn tannim ani tanchea adim jielʼlea lokamnim pasun hem nanv uzar kelʼlem. (Ut. 4:1, 26; 14:22; 27:27; 28:16, NW) Utpoti pustokant, amkam hea purvozanchea jivita vixim sanglam. Hea poilea Hebrev pustokant “Sorvpodvedar” hem utor amkam fokot 6 pavtti melltta ani Jehova, hem nanv amkam 172 pavtti melltta. Fokot Jehovak “Sorvpodvedar” mhunnonk zata mhunn he purvoz aplea onnubhovantlean zannam zalʼle. Punn, Jehova hea nanvacho orth tannim aplea jivitant onubhovunk naslo. Hea vixim, The Illustrated Bible Dictionary-nt, J. D. Douglas (Vol. 1, p. 572) hannem sanglem ki Devan hea purvozam vorvim fuddarak kitem zaunchem asa tea vixim zaiteo bhasaunneo kelʼleo. Ani Dev Sorvpodvedar zalolean taka apleo bhasaunneo purnn korunk xokti asa. To Moizesa lagim jhilkuttantlean uloilo tednam taka fuddarak kitem ghoddchem asa tem to sangom naslo. Punn, Yahweh hea aplea nanvachea ortha pormonnem Devan Moizesak goroz ti tank ani sokot diun, apunn tachea sangata ravtolo mhunn khatri dili.

(Suttka 7:1) Sorvesporan Moizesak mhollem, ‘Polle Hanvem tuka Faraoh mukhar dev koso kela, ani tuzo bhav Aaron tuzo provadi zatolo.

it-2 435 ¶5

Moizes

Moizes fattim sorlo zalear pasun Jehovan taka nakarunk na. Aplea lagim sarkem ulounk zaina mhunn sangon Moizes fattim sorlo. Challis vorsam fatti to Israel porjek soddounk toiar zalʼlo. Punn, hea vellar to kitlo bodolʼla tem amkam dison ieta. Devan dilʼli zobabdari purnn korunk apunn purto na oxem taka dislem. Apnnam lagim suddsuddaien ulounk zaina mhunn sangon to fatti sorta. Titlench nhoi, aplea bodlek anik konnui dhadd mhunn to Devak sangta. Hem aikon Dev ragar zalo, toriastana, tannem Moizesak nakarunk na. Punn tachea pasot ulounk Devan Aaronak dhaddlo. Moizes Devacho sondex Aaronak sangtalo ani Aaron to sondex herank sangtalo. Taka lagon, Moizes Aaronacho Dev koso zalo. Israelachea mukheleank ani uprant porot-porot Faraohk mellonk gelo tednam Moizesan Jehovache kaide ani suchounneo Aaronak sangleo ani Aaronan teo sogleo Faraohk sangleo. Hea Faraohchea adim zo Faraoh aslo tea kallar, mhunnchem 40 vorsam adim Moizes Ejiptta thaun pollon gelʼlo. (Sutt. 2:23; 4:10-17) Uprant, Jehovan Aaronak Moizesacho provadi mhunnttlo. Hacho orth, zoso Moizes Devacho provadi aslo mhunnche tachea margdorxona pormonnem kam kortalo teach bhaxen, Aaron Moizesachea margdorxona pormonnem kam kortalo. Moizesak apunn “Faraoh mukhar Dev koso” kortolo mhunn Jehovan sanglem mhunnche taka Faraoh voir podvi ani odhikar dilo. Taka lagon, Moizesak Ejipttachea razak bhieunk kainch goroz nasli.— Sutt. 7:1, 2.

JULAY 13-19

DEVACHEA UTRANTLE THEVE

SUTTKA 8-9

“Gorvixtt Faraohn Nokllo Zaun Devacho Udʼdhex Purnn Kelo”

(Suttka 8:15) Punn jedna Faraohk matxi dilai disli, to dharunn zalo, ani Sorvesporan sanglole te porim, Moizesak ani Aaronak to aikona zalo.

it-2 1040-1041

Hottʼttiponn

Jehovan thoddea lokank ani raxttank pasiens dakhoilem. Tankam moronn favo aslem punn tannem tankam marun uddounk na. (Ut. 15:16; 2Ped. 3:9) Thoddea lokamnim aplea jivitant bodol kelo ani Jehovan tankam doia dakhoili. (Jos. 2:8-14; 6:22, 23; 9:3-15) Punn thoddea lokamnim aplem kalliz itlem dharunn kelem ki tim Jehova ani tachea porje add gelim. (D.S. 2:30-33; Jos. 11:19, 20) Tanchem kalliz dharunn zaina zaunk Devan tankam addaunk na. Tor jednam Bible sangta ki, “tanchem kalliz To nibor korta” tacho orth oso, ki Jehova tankam dharunn zaina zaunk addaina. Punn, Jehova dharunn lokancho nas korta tednam apleak kitli xokti asa tem dakhoita ani aplem nanv gazoita.—Sutt. 4:21; Ju. 12:40; Rom. 9:14-18 sor korat.

(Suttka 8:18, 19) Tachea ghaddiamnim toxench korunk zaito bhar ghetlo punn tanchekodde ghoddlem na. ¹⁹ Soglleak zollari polleun, tea ghaddiamnim Faraohk mhollem, ‘Hem Devachem bott!’ Toriastana Faraoh dharunnuch ravlo, ani Sorves-poran sanglolem toxem, Faraoh Moi-zesak ani Aaronak aikona zalo.

(Suttka 9:15-17) Hanvem tujer ani tuje porjecher khast launk mhozo hat ubarlolo zalear, tumi prithume voilim nanch zatolim aslim. ¹⁶  Punn mhoji podvi tuka dakhounk, ani akhe prithume-ver mhojem nanv gazunk, hanvem tuzo jiv vattaila. ¹⁷  Toriastana tum gorva-dharunnaien bhorlai, ani mhoje porjek vochunk dinaim?

it-2 1181 ¶3-5

Noxtteponn

Jehova ek poristhiti oxea ritin bodlunk xokta ki noxtto lok nokllo zaun tacho udʼdhex purnn korunk pavta. Te lok Jehovacho virodh kortat hem khorem, punn tankam to aplea visvaxi sevokancho jiv kaddunk dina. Tanchea noxttea kama vorvim pasun Jehova aplem nitivontponn dakhounk xokta. (Rom. 3:3-5, 23-26; 8:35-39; St. 76:10) Jehovan “kelam taka soglleak karonn asta, Hoi Noxtteanchea nisonttonak poriant” oxem Mhonnʼnneo 16:4 amkam sangta.

Faraohchem udharonn gheum-ia. Gulamponnant aslolea Israelit lokank suttka di mhunn Jehovan Moizes ani Aarona udexim Faraohk sanglem. Jehovan Faraohk noxtto korunk na. Punn, tachea kamantlean kollon ailem ki to noxtto aslo ani taka moronn favo aslem. Punn, Jehovan taka jivo dovorlo. Oxem Jehovan kiteak kelem tem amkam Suttka 9:16-ant kollon ieta. Thoim mhunnttlam, “Mhoji podvi tuka dakhounk, ani akhe prithume-ver mhojem nanv gazunk, hanvem tuzo jiv vattaila.”

Ejipttacher dha khasti dhaddlea uprant, Jehovan Faraoh ani tachea soinikancho tambddea doreant nas kelo. Hea vorvim Jehovak kitlim xokti asa tem dison ailem. (Sutt. 7:14–12:30; St. 78:43-51; 136:15) Jehovan aplea lokank koxim salvar kelim tea vixim bhonvtonnchea raxttranche lok zaitea vorsam uprant pasun uloitale. Hea vorvim akʼkhe prithumer Devachem nanv kollit zalem. (Jos. 2:10, 11; 1Sam. 4:8) Jehovan Faraohk adinch marun uddoilʼlo zalear Devak kitli xokti asa tem itlea bore toren kollon ieunchem naslem ani tachea nanvak mhoima mellchi nasli. Toxench, tachea lokank ojapvont ritin suttka mellchi nasli.

Bible-ant Motiam Sodhum-ia

(Suttka 8:25-27) Tedna Faraohn Moizesak ani Aaronak apoun haddle ani tankam mhollem: “Vochat, ani heach desant tumchea Devak bolidanam bhettoiat.” Punn Moizesan taka zobab dilo, ‘Hem sarkem nhoi, kiteak Sorvespora amchea Devak ami zonavorancheo bhetto kortanv tem polleunk Ejiptkarank ek kantallo haddpachi vost. Hankam okman zata toslim zonavoram bhettoitanv tem polleun, amkam te fatraunche nant? ²⁷ Sorvespora amchea Devan amkam formailolem asa te porim, taka bhetto korunk, oronneant tin disanchi iatra ami kortoleanv.”

w04 3/15 25 ¶9

Suttka Pustokantle Mukhel Mudʼde

8:26, 27—Israelitkarancheo bhetto “Ejiptkarank ek kantallo haddpachi vost” mhunn Moizesan kiteak mhunnttlem? Ejiptkar zaite veg-vegllea zonvaranchi bhokti kortale. Taka lagon, Israelitkar zonvorancheo bhetto kortat tednam tankam vaitt distalem. Tor, Israelitkarank iodn bhettounk suttka di mhunn Moizesan Faraoh lagim maglem tednam tachea lagim ek borem karonn aslem.

(Suttka 9:13, 14) Magir Sorvesporan Moizesak mhollem, ‘Sokall fuddem utth ani Faraoh-xim voch. Taka sang, “Hebrevancho Dev Sorvespor oxem mhonntta: Mhoje porjek mhaka nomoskar korunk vochum-di ¹⁴  He pavtt, tujer, tujea opxalancher ani tuje porjecherui soglleo mhojeo khasti dhaddtolom, he vorvim, akʼkhe prithume-ver mhoje sarko konnuch na mhonn tuka kollon ietolem.

w19.10 21 ¶5

Kitem Zaunk Tuka Jehova Modot Kortolo?

Jehovan Israelitkarank gulamponnantlean soddounk Moizesak vichun kaddlo. Punn, Jehovan taka kednam uzar kelo? “Ejiptkaranchi vidia asli titli-i Moizesak xikoili ani to utramnim ani kornniamnim bollvont zalo” mhunn Bible sangta. Tor apunn Jehovachea lokank soddounk iukt asa mhunn Moizesak dislem astolem. Punn tea vellar, Jehovan taka uzar kelo kai? (D.I. 7:22-25) Na, Jehovan Moizesak khalti ani dulob zaunk adar kelo. Ani tea uprant, Jehovan taka Isrealitkarank soddounk uzar kelo. (D.I. 7:30, 34-36) Ejipttan vhodd podvi aslolea raza lagim ulounk Jehovan Moizesak dhir dilo. (Sutt. 9:13-19) Jehovan Moizesak koso ani kednam uzar kelo tatuntlean ami kitem xikonk zata? Jehova oslea lokank uzar korta je tachea gunnachi dekh ghetat ani dhir ani bollak lagon tacher patietat.​—Filp. 4:13.

JULAY 20-26

DEVACHEA UTRANTLE THEVE

SUTTKA 10-11

“Moizes ani Aaron Khub Dhiran Vagle”

(Suttka 10:3-6) Tor Moizes ani Aaron Faraoh-xim gele ani taka mhollem, ‘Hebrevancho Dev, Sorvespor oxem mhonntta, ‘Anink kitlo kall mhaka khalto zaunk tum nakartoloi? Mhaka bhozche khatir, mhoje porjek vochum-di. ⁴ Zor tum mhoje porjek vochonk dinaim zalear, faleam hanv tujea desant toll dhaddtolom. ⁵ He vorvim zomin disona-xi zatoli. Soglli zomin tollamnim bhortoli. Korveanchea pavsantlean jem urlam tem legun te khaun uddoitole, xetamnim vhaddtolim sogllim tujim zhaddam, te girastole. ⁶ Tujea rajmahalant, tujea opxalanchea ani sogllea Ejiptkaranchea ghoramnim te bhortole. Tujea purvozamnim ani purvozanchea purvozamnim hea sonvsarant zolmak aileat tea disa meren legun kednanch dekhlem na toxem zatolem.’ Oxem sangun Moizes Faraoh koddcho bhair sorun gelo.

w09 7/15 20 ¶6

Jezuchi Dekh Gheun Dhiran Porgott Korat

⁶ Chintat, Faraoh lagim ulounk Moizesak kitlo dhir zai poddlo astolo. Ejipttanche raza apleak fokot devache protinidhi nhoi punn apnnakuch dev somzotale. Te apunn surya dev Ra-che put mhunn somzotole. Ghoddie dusrea Faraoh bhaxen ho-ui Faraoh aplech murtik bhoztalo zait. Faraohchem utor mhunnttlear kaido aslo ani to konnacheanuch bodlunk zaina aslo. Ani kitem korchem tem dusreamnim sanglolem taka avodd naslem. Moizes ek gonvlli ani khalto munis aslo ani taka xoktivont, gorvixtt ani dharunn Faraoh mukhar porot-porot voichem poddlem. Faraohk konnuch munis porvangi nastana aplea mukhar ailʼlo avodd naslem. Chintat, Moizesan taka kitem sangonk zai aslem? Noxtt haddtta toslea khastim vixim. Ani Moizes taka kitem korunk sangta? To Faraohk tachea lakʼkhamnim gulamank des soddun vochonk porgovangi di mhunn sangta. Tor, Moizesak dhirachi goroz asli kai? Hoi, khorench taka dhir zai aslo.—Lok. 12:3; Heb. 11:27.

(Suttka 10:24-26) Faraohn Moizesak apoun haddlo ani taka mhollem: “Tumchea bailam- burgeank gheun, tumchea Sorvesporak bhozunk vochat. Punn tumchim menddram-bokddam ani gorvam hanga asum-di.” ²⁵ Moizesan mhollem: “Tor, bhetto korunk ani Sorvesporak, amchea Devak, homʼ somorpunk, tunvem amkam zonavoram vhorunk diunchim poddtolim. Ani amchim zonavoram-i amche borabor vochunk zai; ekui get fattlean dovorchem nhoi. ²⁶  Sorvesporak amchea Devak bhoztanv tedna, aminch tim zonavoram vinchun kaddunk zai. Ani thoim pavo-sor, Sorvesporak bhozche khatir koslim zonavoram ami bhettounk zai tem atam amich nokllonv.”

(Suttka 10:28) Ani tannem Moizesak mhollem, ‘Mhojea fuddeantlo koddsor! Khobordar anink kednanch mhojea fuddeant ieum naka! Dusre pavtt tunvem mhaka anink pollen zalear, tum mortoloi.’

(Suttka 11:4-8) Moizesan mhollem, ‘Sorvespor oxem mhonntta, ‘Sumar modian-ratir hanv Ejiptantlean vetolom, ⁵  ani Ejiptantlo dor-ek malgoddo put mortolo, Faraohcho put sodrer choddcho asa to daiji zanv, vo dantear dollta te nimanne chakornicho put to zanv. Toxench, gorvam-vasrantlim sogllim poilim poram morun vetolim. ⁶  Kednanch poddunk na ani fuddarak poddchemna toslem mottem vilap-roddnem akʼkhea Ejiptant poddtolem. ⁷  Punn Israel porje modem, zaum eka monʼxa, zaum eka zonavora add ek sunnem legun bhonkchem na.’ Tedna, Sorvespor, Ejiptkaram ani Israelitam modem ontor korta mhonn tuka kollit zatolem.’ ⁸  Magir soglle he tuje opxal mhoje-xim ieun apli man bagaitole, ani mhonnttole: ‘Bhair sor, tum ani tuzo pattlav korta ti soglli porza! Ani tednach hanv hangacho bhair sorun vetolom.’ Ani motte tiddken Moizes Faraohchea fuddeantlo koddsorlo.

it-2 436 ¶4

Moizes

Faraohchea fuddem vochonk dhir ani bhavarth gorjecho. Faraoh fuddem vochonk Moizesak ani Aaronak dhir ani bhavarthachi goroz asli. Moizes ani Aaron Jehovachea adaran Faraohchea fuddem gele. Jehovan tankam apli povitr xokti dilʼli. Chintʼtat, Ejipttacho raza Faraoh aplea xinvasonar boslolo asa. Tea kallar, Ejiptt sonvsarachi vorixtt razvottki asli. Ejiptachi sobitkai khoincheach raxttrak sor korunk zai nasli. Gorvixtt Faraoh apleakuch dev mhunn somoztalo. Tachea bhovtonnim tache bud dinnar, tache senapoti, soinik, ani chakor sevek ube ravtale. Titlech nhoi, Moizesacho virodh korunk Ejipttache dhormik fuddari ani ghaddi asle. Hea munxank pasun Ejipttant khub podvi ani odhikar aslo. Tor, Ejiptanchea devank tenko diunk Faraoh sangata zaite bollvont munis asle. Moizes ani Aaron Faraoh mukhar ek pavtt nhoi punn zaite pavtti gele. Dor ek pavtt, Faraohn aplem kalliz anik dharunn kelem. Karonn, taka aplea Hebrev gulamank suttka diunk naka aslem. Moizes ani Aaron Faroahk attve kheasti vixim sangtat tednam to tankam aplea mukhavelo danvddaita. Ani novea kheasti vixim sanglem uprant Faraoh tankam xiddkaita ani sangta ki, porot te taka mellonk aile zalear to tankam jivexim marun udoitolo.—Sutt. 10:11, 28.

Bible-ant Motiam Sodhum-ia

(Suttka 10:1, 2) Tedna Sorvesporan Moizesak mhollem, ‘Chol, Faraoh-xim voch. Mhojim aninkui vismitam-novlam korun dakhounche khatir, hanvem taka ani tachea opxalank odikuch dharunn keleat, ²  ani koxe porim him vismitam korun hanvem Ejiptkarank lojek ghalim tem tujean tujea burgeank ani natrank sangunk zatolem. Toxench Hanv Sorvespor mhonn tumkam kollon ietolem.”

w95 9/1 11 ¶11

Khottea Devam Add Sakxi

¹¹ Israelitkaram Ejipttant aslim tednam Jehovan Moizesak Faraoh-xim dhaddlo ani sanglem: “Chol, Faraoh-xim voch. Mhojim aninkui vismitam-novlam korun dakhounche khatir, hanvem taka ani tachea opxalank odikuch dharunn keleat, ani koxe porim him vismitam korun hanvem Ejiptkarank lojek ghalim tem tujean tujea burgeank ani natrank sangunk zatolem. Toxench Hanv Sorvespor mhonn tumkam kollon ietolem.” (Suttka 10:1, 2) Devak khaltim asat tim Israelitkaram aplea bhurgeank Jehovan kelʼlea hea vhodd kamam vixim sangtalim, ani tanchi bhurgim aplea bhurgeank sangtalim, tor pinddkechea pinddkek hi khobor pavli. Hea ritin, Jehovachim podvechim kamam lok ugddas dovortale. Toxench, aiz bhurgeank xikounchi zobabdari Jehovan avoi-bapaink dilʼli asa.—Dusri Somurt 6: 4-7; Mhonnʼnneo 22:6.

(Suttka 11:7) Punn Israel porje modem, zaum eka monʼxa, zaum eka zonavora add ek sunnem legun bhonkchem na.’ Tedna, Sorvespor, Ejiptkaram ani Israelitam modem ontor korta mhonn tuka kollit zatolem.’

it-1 783 ¶5

Suttka

Jehovan ojapachea ritin apli xokti dakhoun aplem nanv vhodd kelem ani Israelitkarank suttka dili. Jehova Devan Tambddea Dorea lagim Ejiptkarancho nas kelo ani aple porjek tannem soddvonn dili. Tednam Moizesan Israelitkaram sangata Jehovak vakhannunk git gailem. Ani tachi bhoinn Miriam ji bhaknarinn asli, tinnem ghumott ghetlem ani sogleo ostoreo aplem ghumott gheun tiche borobor nachunk lagleo ani dulpod gavunk lagleo. (Sutt. 15:1, 20, 21) Ejipttantlim bhair sortana tankam khoinche-i munxan vo zonvaran kainch tras korunk na. Ek sunnem legun tanchea add bhokunk na. (Sutt. 11:7) Suttka pustokant amkam khoinch sangona ki Faraoh aplea soinikam borabor doreant buddon melo mhunn. Punn, Stotr 136:15 sangta ki Jehovan “Faraok ani tachea soinikank buddoun marle.”

JULAY 27–AGOST 2

DEVACHEA UTRANTLE THEVE

SUTTKA 12

“Paskanche Porbe Thaun Kristanvank Kitem Xikonk Melltta”

(Suttka 12:5-7) To menddro zaunk zai khot-naxilʼlo, dadlea-lingacho ani eka vorsacho; menddro vo bokddo-i bi zaum-ieta. ⁶ Hea mhoineache chovda tarker porian, tem zonavor samballun dovrunk zai; magir soglli Israel-porza ektthaim zaun sanjechea vellar tea zonavoracho prann kaddtoli. ⁷ Magir tachem ilem rogot gheun, jea ghoramnim tea zonavorachem mas khaunchem asa, tea ghoranchea daranchea don-ui kovddancher ani umbreancher tem lavunchem.

w07 1/1 20 ¶4

“Tumi Sontosbhorit Zaiat”

⁴ Jezu Nisan 14 tarker, 33 K.X. vorsak melo. Israelant, Nisan 14 tarker Paskanchi porob monoitalim ani ho ek khuxalkaiecho dis aslo. Dor vorsak, tea disak kuttumbantlim soglim zannam sangata ieun jevonn jevtalim. Tea jevnnant, koslech khot naslolo ek vorsacho menddro tim martalim. Hea toren, Nisan 14 tarker, 1513 K.X.A. vorsa devdutan Ejipttachea soglea malgoddea putank marun uddoile tednam menddrachea rogta vorvim Israelachea malgoddea putacho jiv koso salvar zalo tem tim ugddas kortalim. (Suttka 12:1-14) Paskacho menddro Jezuk suchit korta. Hea vixim apostl Paulun mhunnttlem: “Kristak marlolean, amchea Paskanchea Menddreachem bolidan zalem.” (1 Korintkarank 5:7) Paskanchea menddreachea rogta vorvim Israelitkaranchea malgoddea putacho jiv salvar zalo, toxench, Jezun varoilʼlem rogta vorvim zaitea zannancho jiv salvar zata.—Juanv 3:16, 36.

(Suttka 12:12, 13) Te rati Ejiptachea desantlean Hanv vetolom ani sogllea malgoddeank jivexim martolom, monʼxank toxem monʼzatink, ani sogllea Ejiptachea devank Hanv khast laitolom, Hanv to Sorvespor. ¹³ Tumi ravtat tim ghoram dakhounk, hem rogot zatolem ek khunna; ani tem rogot dixtti poddtoch Hanv tumkam kai vaitt korinastana fuddem vetolom ani, jedna Hanv Ejiptak khast laitolom, tedna tumkam kaich vaitt zaunchem na.

it-2 583 ¶6

Pask

Paskachea porbent ani Jezuchea bolidan-ant zaitem ek-sarkem asa. Udharonnak, Ejiptant eka ghorachea daracher rogot lailʼlem aslem zalear, devdut Ejipttachea malgoddea putank jivexim marunk tanchea ghoram koddlean pasar zalo tednam tanchea malgoddea putancho jiv salvar zalo. Poilea xekddeant, Paulun obhixikt Kristanvank malgoddea putanchim sobha mhunnttli. (Heb. 12:23) He sobhek Kristachea rogta vorvim soddvonn mellʼlli. (1Tes. 1:10; Ef. 1:7) Israelitkaram Paskachea menddreachem ek pasun hadd moddinasle. Jezu vixim bhakit kelʼlem, ki tachem-i ek pasun hadd moddchem na. Ani hem bhakit tachea mornnachea vellar purnn zalem mhunn Bible sangta. (St. 34:20; Ju. 19:36) Somurti khala, Judev lok zaitea xekddeam thaun pask monoitale. Hi porob fuddarak kitem ghoddchem aslem tachi ek savlli zaun asli. Ti Jezu Krista vixim dakhoitali, zaka “Devacho Menddro” mhunnttla.—Heb. 10:1; Ju. 1:29.

(Suttka 12:24-27) Ek kaido koso, tumi ani tumchea bhurgeam-ballamnim hi rit pallchi. ²⁵ Apnnem bhasailam tea pormannem, Sorvespor tumkam ditolo tea desant tumi bhitor sortoch, hi rit tumi pallunk zai. ²⁶ He riticho orth kitem kai mhonn tumchim bhurgim-ballam tumche kodde vicharit zalear ²⁷ tumi tankam sangat: “Ho Sorvesporachea manak Paskacho iodn: Tannem Ejiptak mar dilo punn amchim ghoram vanchoilim tea somoiar To Ejiptant aslole Israel-porjechea ghoram koddchean gelo.” Hem aikun, soglle porjen tokli bagaun Devak nomoskar kelo.

w13 12/15 20 ¶13-14

‘Ho Dis Tumkam Ek Ugddasacho Dis Zatolo’

¹³ Ek ek pinddka soron voita toxi, Israelitkaram aplea bhurgeank paska vixim mhotvachim lisanvam xikoitalim. Tantuntlem ek lisanv mhunnttlear, Jehova aplea sevokank rakhonn diunk xokta. Jehova khoro ani jivo Dev mhunn tanchi bhurgim xiklim. Toxench, to aplea sevokanchi porva korta ani tankam salvar korta toslo Dev mhunn tim xiklim. Jehovan Ejiptkarancher dhavi khast dhaddun tanchea malgoddea putank marle punn, Israelitkaranchea malgoddea putank salvar kele tednam tim hem pollounk xoklim.

¹⁴ Amchea disamnim, Kristi avoi-bapui aplea bhurgeank dor vorsak paska vixim sangonant. Punn, tumi Judev avoi-bapai bhaxen, Jehova aplea sevokank rakhta mhunn tumchea bhurgeank xikoitat kai? Jehova tumchi rakhonn kortolo mhunn tumkam purnn visvas asa hem tumchim bhurgim pollounk xoktat kai? (St. 27:11; Iz. 12:2) Hem lisanv xikounk tumi tumchea bhurgeank vhoddlem bhaxonn ditat kai vo tankam aikonk avoddtta tea ritin tumi tanchea lagim uloitat? Tumchea kuttumba sangata hea vixoi-acher bhasabhas korat. Oxem kelʼlean, Jehovacher tumchea kuttumbacho visvas anik ghott zaunk pavtolo.

Bible-ant Motiam Sodhum-ia

(Suttka 12:12) Te rati Ejiptachea desantlean Hanv vetolom ani sogllea malgoddeank jivexim martolom, monʼxank toxem monʼzatink, ani sogllea Ejiptachea devank Hanv khast laitolom, Hanv to Sorvespor.

it-2 582 ¶2

Pask

Ejiptkarancher dha khasti aileo. Hea soglea khastim udexim, chodd korun dhave khasti udexim tanchea devank kainch xokti na mhunn tankam kollon ailem. Karonn, tea khastint tanche malgodde put mele. (Sutt. 12:12) Paskachea menddreachem rogot daracher lavop mhunnttlear, Ejipttachea Ra devacho opman kelʼlea sarkem aslem, karonn Ra devak menddro povitr aslo. Toxench, Ejiptkar boilakui povitr mhunn mantale. Taka lagon, boilanche malgodde mele tednam Ejipttkaranchea devak, Osiris, haka pasun kainch xokti nasli mhunn Ejiptkarank kollon ailem. Toxench, Faraoh Ra devacho put mhunn Ejipttkar somzotale ani taka bhoztale. Tor, Faraohcho malgoddo put melo tednam Ra devak ani toxench Faraohk kainch xokti na mhunn tthavem zalem.

(Suttka 12:14-16) “‘Ho dis tumkam ek ugddasacho dis zatolo, ani tumi to dis Sorvesporachea manak ek porob koxi somrombhtoleat sonstiche sonstik. ¹⁵  Sat dis tumi khomir naslolo unddo khauncho. Poilea disa, tumchea ghorantlem sogllem khomir tumi bhair uddounk zai, kiteak he sat dis konn-ui tumcho ghorcho khomir aslolo unddo khait, taka Israelantlo bhairaitole. ¹⁶ Poilea ani satvea disa tumi povitr zomatik ektthai zaunk zai, ani he donui dis vavr korcho nhoi punn tumchem dispottʼtem jevonnuch tumchean toiar korum-iet.

it-1 504 ¶1

Zomat

‘Povitr zomatichem’ khaxelponn mhunnttlear tea disak konnech vavr korunk zai naslo. Udharonnak, Khomir Naslolea Unddeanche Porbechea poilea ani satvea disa ‘povitr zomati’ astaleo. Tea vixim, Jehovan sanglem: “He donui dis vavr korcho nhoi punn tumchem dispottʼtem jevonnuch tumchean toiar korum-iet.” (Sutt. 12:15, 16) Hea ‘povitr zomatinchea’ vellar iadnik iodn bhettounchem kam kortale. (Lev. 23:37, 38) Punn hem kam korun, te vavr korinakat mhunn Devan dilʼlo kaido moddinasle. Hea kaidea pormonnem lokamnim bekar ravchem oxem naslem, punn tannim tea vellacho boro upeog korun Deva lagim aplo sombond ghott korunk zai aslo. Dor eka sumanak, sabat-achea disak lok ekttaim ieun Devachi xikvonn ghetale ani bhokti kortale. Tea disa Devachea Utrachem vachop aikon ani somzonni gheun tankam ghottai mellttali. Oxench, uprant devsthanant zatalem. (D.I. 15:21) Tor, Sabat-achea disa vo povitr zomatinchea disa lok vavr korinaslo hem khorem. Punn, ho dis tim magnnem korunk, ani aplea Rochnnara vixim ani tachea udʼdhexa vixim niall korunk uzar kortalim.—ASSEMBLY polloiat.