Khotti Mahiti Sangchea Vixim Chotrai Dovrat

Aiz, masikam, radio, tv ani Internet-a vorvim lakʼkhamnim lokank rokddich mahiti dhaddunk zata. Jim khorea Devachi bhokti kortat tim nokllo zaun pasun dusreank khotti mahiti dinant. (St. 31:5; Sutt. 23:1) Konnem-i amkam khotteo khobro sangleat teo ami dusreank sangtat tednam zaitem luksonn zaunk xokta. Tumi aikolea ti khobor sarki vo na tem zannam zaunchea adim, tumkanch he prosn vicharat:

• ‘Hanvem aikolea ti mahiti visvas dovorpa sarkea munxa thaun ailea kai?’ Jea munxan amkam mahiti dilea taka ghoddie sogle vixoi khobor na astole. Ek mahiti eka munxa thaun dusrea munxak pavta mhunnosor ti bodolta. Dekhun ti mahiti konnem sanglea hem tumkam khobor na zalear dolle dampun tacher visvas dovrum nakat. Sobhent zobabdari aslole bhav sarki mahiti ditat mhunn soglim tancher visvas dovortat. Dekhun tannim kosli-i mahiti dusreank sangchea adim ti sarki asa mhunn khatri korunk zai.

• ‘He mahiti udexim konnachem-i nanv piddʼddear zata kai?’ Kosle-i mahiti udexim konnachem-i nanv piddʼddear zaunk xokta zalear ami ti mahiti dusreank sangonant zalear odik borem.—Mho. 18:8; Filp. 4:8.

• ‘Hea mahiticher hanvem patieunk zata kai?’ Lokam modem khub gazloleo kanneo ani onnbhov aikounchea vixim chotrai dovrat.

HANVEM CHADDIO SANGOP KOXEM BOND KORUNK ZATA? HO VIDDEO POLLOIAT ANI SOKOL DILOLEA PROSNANCHE ZOBAB DIAT:

• 

  Mhonnʼnneo 12:18-ant sanglolea pormonnem, amchea utram vorvim dusreancher koslo vaitt porinnam poddonk xokta?

• 

  Dusrea vixim uloitana, Filipkarank 2:4 hem vers amkam koxem modot korunk xokta?

• 

  Konnui dusream vixim chaddio korunk lagta tednam ami kitem korunk zai?

• 

  Dusream vixim ulounk suru korchea adim, ami amkanch kosle prosn vicharunk zai?