“Porgottnnechem Kam Korunk Atam Mhaka Khub Avoddtta!”

HANVEM MHOJI KHUXALKAI KOXI HOGDDAILI

Hanv sumar tera vorsanchem zalem tednam Jehova sangata mhoji ixttagot unni zali. Mhojea iskolantlea bhurgeank asloli svotontrtai mhaka-i zai koxi disonk lagli. Bible totvam pormonnem jievop, Jehovachi bhokti korop, ani avoi-bapaichea kaideam khala ravop kotthin koxem disonk laglem. Jehova asa mhunn hanv patietalem, punn to mhojea thaun khub pois asa oxem mhaka disonk laglem.

Hanvem mhoji porgottnni sarkich bond korunk na, punn thoddim voram kortalem. Porgottnne pasot hanv toiari korinaslem dekhun hanv borea toren ulounk pavonaslem. Tor mhaka hea kamant khuxalkai mellonasli. Ani porgottnni korunk naka koxem disonk laglem. Hanv mhakach vicharunk laglem, ‘Hem ani dor sumanak, vo dor mhoineak konn mhunn kortolo?’

Hanv 17 vorsanchem zalem tednam, mhaka svotontrtai zai mhunn hanv ghor soddun Australia-k gelem. Mhojea avoi-bapaik khub vaitt dislem. Punn hanv Australia-nt Jehovachi bhokti korit ravtolem mhunn tankam dislem.

Punn thoim gelea uprant hanv Jehovachi bhokti anik unni korunk laglem. Mhojem mittingek vochop unnem zalem. Ani hanvem oslim ixttam kelim jim thodde pavtti mittingek ietalim ani thodde pavtti pieunk ani nachonk night club-ant voitalim. Tednam hanv don vhoddeancher paim dovorlolea sarkem aslem. Ek paim sotant ani ek paim sonvsarant. Punn khoinsorui mhaka khuxalkai mellonasli.

EKE BHOINNI THAUN HANV XIKLOLEM MHOTVACHEM LISANV

Don vorsam uprant, hanv eke bhoinnik mellʼllem ani tednam thaun mhojem chintop bodolʼlem. Hanv eka ghorant, panch ankvar bhoinnam sangata ravtalem. Eka sumana pasot ami sorkittachea dekhrekh korpeak ani tachi bail Tamarak, amchea ghorant ravonk dilem. Ticho ghov sohbechem kam kortalo tednam Tamara amchea sangata vell sartali. Ti amchea sangata uloitali, hanstali ani tichea lagim ulounk amkam borem distalem. Hi bhoinn itli Jehovachi seva korta tori astana, hansta-khelltta tem polloun hanv khub ojap zalem.

Tamara khub urbebhorit asli. Sota pasot ani porgottnne pasot ticho mog polloun mhaka-i to mog asonk zai oxem mhaka dislem. Ti apleachean zata titlem borem Jehovak diun khuxal asli. Punn hanv Jehovachi seva thoddi kortalem ani hanv khuxal naslem. Tichea hea khuxalkaiecho ani sobhavacho mhojer khub probhav poddlo. Tichea thaun hanv hem mhotvachem lisanv xiklem: Ami sogleamnim Jehovachi seva “khuxalkaien” ani ‘sontosan’ keloli taka zai.—St. 100:2.

MHAKA PORGOTTNNENT PORTUN KHUXALKAI KOXI MELLʼLLI

Tamarak asloli tosli khuxalkai mhaka zai zalear hanvem thodde bodlav korunk zai mhunn mhaka kollon ailem. Punn te bodlav korunk mhaka thoddo vell laglo. Hanv survatek porgottnne pasot toiari korunk laglem ani vell gelo toso hanv thodde pavtti ek sahaiok pioneer mhunn seva korunk laglem. Oxem kelolean, porgottnnent mhoji bhirant unni zali ani hanv bore toren ulounk pavlem. Porgottnnent hanv chodd Bible uzar korunk laglem toxem mhoji khuxalkai anik vaddonk lagli. Ani dor mhoineak hanv sahaiok pioneer mhunn seva korunk laglem.

Tea bhair hanv Jehovachi seva korun khuxal aslolea, sotant ghott aslolea ani soglea piraiechea bhav-bhoinnam sangata ixttagot korunk laglem. Tanchea borea udharonnam udexim hanv mhojea jivitant bore nirnnoi gheunk pavlem ani dor disak Bible vachop korchi sonvoim korunk laglem. Porgottnnent mhoji khuxalkai vaddot geli ani hanvem ek niemit pioneer mhunn seva korunk suru keli. Zaitea vorsam uprant, sobhechea bhav-bhoinnam sangata hanv portun khuxal aslem.

ALEXA SANGATA MHOJEM KAZAR ZALEM

Eka vorsa uprant, hanv Alex-ak mellʼllem. To ek doiall munis aslo, Jehovacho khub mog kortalo, sobhecho sevok mhunn seva kortalo, ani porgottnni korunk taka khub avoddttalem. Pioneering suru korun taka sov vorsam zalʼlim. Tannem Malawi-nt zoim porgottnnaranchi chodd goroz asa thoim pasun thoddo temp seva kelʼli. Thoim to mixinoream sangata vell sartalo ani tannim taka Jehovachi seva poilea zagear dovrunk urba dilʼli.

2003-ant hanv Alex-a sangata kazar zalem. Ani aiz meren ami purnn vellachi seva korit asat. Hea toren ami zaitim lisanvam xikonk pavlim ani Jehovan amchea sevecher khub besanvam ghatleant.

AMKAM ANIK ZAITIM BESANVAM MELLʼLLI

2009-ant amkam Timor-Leste-nt mixinori mhunn dhaddlim ani tem aikon ami ojap zalim. Ho Indonesia-chea zunveam modem ek lhan des zaun asa. Ami thoim vochonk khub urben bhorlim, punn teach vellar amkam bhirantui disli. Panch mhoinea uprant, ami Timor-Leste-chi rajdhani Dili-nt pavlim.

Punn hea desant ravonk amkam zaito bodlav korcho poddlo. Hangachi sonskrutai, bhas, jevonn ani soglem vegllem aslem. Porgottnnent amkam gorib, unnem xikop aslole ani dobhava khala cheplole lok mellttale. Zhuz ani hinvxek lagon, bhavnatmik ani her tras onnbhovlolea zaiteank ami mellttalim.a

Hanga porgottnni korunk khub borem aslem! Mariab nanvachea 13 vorsachea cheddvacho hanv onnbhov sangonk sodhtam. Tachi avoi thoddeach vorsam poilim bhair poddloli ani tannem aplea bapaik thoddech pavtti polloilolem. Tor tachea piraiechea zaitea bhurgeam bhaxen, tachea jivitak margdorxon diupak konn naslo. Tachea lagim hanv uloitalem tednam ek pavtti tem khub roddlem. Punn tem kitem sangtalem tem mhaka somzonaslem, karonn tednam mhaka tachi bhas titli kollonasli. Taka buzvonn diunk modot kor mhunn hanvem Jehova lagim maglem ani uprant hanvem taka Bible-antlim urbebhorit versam vachun dakhoilim. Thoddim vorsam gelim toxim sotak lagon Mariacho sobhav, nhesop-disop ani jivit koxem bodolʼlem tem mhaka pollounk mellʼllem. Tannem atam bautizm ghetla ani atam tem dusreank Bible xikoita. Tem atam Jehovachea lokanchea eka vhodd familicho bhag zaun asa.

Timor-Leste-nt choltolea kamancher Jehovan khub besanv ghatlam. Thoinchea bhav-bhoinnamnim chodd korun gelʼlea 10 vorsam bhitoruch bautizm ghetla. Punn tantuntle choddxe pioneer, sobheche sevok vo vhoddil mhunn seva kortat ani thoddim remote translation office-ant bhaxantor korchem kam kortat. Tanchea tonddar aslolo hanso, tim mittingek ietat tednam gaitat tim gitam ani tim Jehova sangata ixttagot ghott kortat tem polloita tednam hanv khub khuxal zata.

ITLI KHUXALKAI MELLTTOLI MHUNN HANVEM CHINTUKUCH NA

Australia poros Timor-Leste-nt amchem jivit khub vegllem aslem. Punn hanga itli khuxalkai mellttoli mhunn hanvem chintunk na. Thodde pavtti amkam lokamnim bhorlolea, kharem nustem ani bhaji-palean bhorlolea boximnim vochonk poddttalem. Thodde pavtti ami chiklant bhorlolea lhan ghorant, gormen zomnir bosun Bible obheas ghetalim. Tea vellar kunkddam ghora bhitor he-vatten te-vatten bhonvtalim. Heo oddchonneo aslear pasun amkam hea kamant khub khuxalkai mellttali.

Hanv mhojea jivita vixim chinta tednam mhojea avoi-bapai pasot hanv khub upkari asa. Karonn mhaka Jehova vixim xikounk tannim apleachean zata titlem kelem ani tornnattponnar hanv sotant titlem ghott naslem tednam pasun tannim mhaka tenko dilo. Mhonnʼnneo 22:6-ant aslolim utram mhojea jivitant khorim zaleant. Hanv ani Alex Jehovachi seva khuxalkaien kortat dekhun Mummy ani Daddy khub khuxal asat. 2016 thaun ami Australasia xakhe khala aslolea vattarant sorkittachem kam korit asat.

Mhojea jivitant eka vellar mhaka porgottnni korunk bejar ietalo. Punn atam mhaka hem kam khub avoddtta! Jivitant kosleo-i oddchonneo ieum, purnn kallzant ami Jehovachi seva kortat tednam amkam khori khuxalkai melltta mhunn mhaka kollon ailam! Hanv ani Alex gelʼlea 18 vorsam thaun Jehovachi seva korit asat. Ani him vorsam amchim sogleam-von khub khuxalkaiechi. Davidan Jehovak gailolim him utram khorim mhunn hanv atam sangonk xokta: “Zankam Tujea gopant xeronna ghetai tankam soglleank sontos, . . . Tuje bhokt Tuje sovem sontosan murgottʼttat.”—St. 5:11.