De Adam und d Eva hend us em Garte Eden use müesse. Später hend si Chind übercho. De erscht Sohn, de Kain, wird Buur. De zweit Sohn, de Abel, wird Schafhirt.

Einisch bringed de Kain und de Abel für Jehova es Opfer dar. Weisch du, was es Opfer isch? Das isch es bsundrigs Gschenk für Gott. Jehova freut sich über s Opfer vom Abel, aber über s Opfer vom Kain freut er sich nid. Das macht de Kain richtig hässig und verruckt. Jehova warnt ihn, eso verruckt z werde. Er seit: «Pass uf! Suscht machsch plötzlich no öppis Schlimms!» Aber de Kain lost nid uf Jehova.

De Kain seit zum Abel: «Chumm, mir göhnd uf s Feld.» Uf em Feld sind si allei. Da griift de Kain sin Brüeder a und tötet ihn. Was macht Jehova jetzt? Er bestraft de Kain und schickt ihn wiit weg vo sinere Familie. Er dörf nie meh zrugg cho.

Was chönnd mir drus lerne? Mängisch werded mir verruckt, wenn öppis nid eso lauft, wie mirs gern hätted. Was sölled mir mache, wenn mir merked, dass mir eso verruckt werded? Oder wenn anderi üs sogar warned, wenn mir verruckt sind? Denn müend mir sofort öppis degäge unterneh. Suscht chas passiere, dass mir öppis Schlimms mached.

De Abel het Jehova gern gha und das gmacht, wo richtig isch. Drum wird ihn Jehova nie vergesse. Er wird de Abel uferwecke, wenn d Erde wider es Paradiis isch.

Mit de Ziit gits immer meh Mensche uf de Erde. Di meischte sind bös. Sogar im Himmel werded es paar Engel bös. Si göhnd eifach vo ihrem Dehei furt und chömmed als Mensche uf d Erde. Weisch du, werum si das mached? Wil si wend Fraue hürate.

Di böse Engel und d Fraue chömmed Söhn über. Die Söhn werded sehr starchi Männer, wo andere Angscht ijaged und weh mached. Jehova wett nid, dass das no länger eso wiiter gaht. Drum unternimmt er öppis degäge. Er beschlüsst, di ganzi Erde mit Wasser z überschwemme. Eso müend alli böse Mensche sterbe.

Aber es git en Maa, wo andersch isch. Er heisst Noah, und er het Jehova fescht gern. Er het e Frau und drü Söhn: de Sem, de Ham und de Japhet. D Söhn sind au ghürate. Jehova möcht, dass de Noah und sini Familie überlebt. Drum git er em Noah de Uftrag, en riisige Holzchaschte z baue, wo uf em Wasser cha schwimme. Das isch d Arche. Jehova seit em Noah au no, dass er vil Tier söll i d Arche bringe, dass si au chönnd überlebe.

De Noah fangt sofort a, d Arche z baue. Er und sini Familie bruched öppe 50 Jahr, bis si fertig sind. Si baued d Arche genau eso, wies Jehova ihne gseit het. I dere Ziit tuet de Noah au di andere Mensche vor de Sintfluet warne. Aber niemer lost uf ihn.

Jetzt isch d Ziit cho, i d Arche inezgah. Bisch au gspannt, was jetzt passiert?