Génesis

Nuʼwalakajeʼerüin Maleiwakai tü wayuukolüirua sümaa wainmainjatüin tü nanüikikat

11 Paala sümaiwa, waneesiaiwaʼaya neʼe sünüiki tü wayuukolüirua süpüshua sainküin mma, 2 oʼonookuu mapüʼüsü tü wayuukolüirua süpüshua chajee wiinnaajee sünain waraittaʼain sümüin süpaʼapünaa tü mmakat. Süntapaatakalaka sünainmüin wane mma anooisü suluʼu tü mmakat Sinar. Makatakalaka tü wayuukolüirua süpaʼapünaa tü anooikat süpüla neʼitaain nepia chaʼaya napüshua.

3 Shiasaʼa süchikijee tia, saashajaajiraakalaka tü wayuukolüirua sünain maa: “Jooʼuya watükaiwa pootshi, wakumajaiwa pülookeirua süka, je waʼajaaiwa shia saaʼu siki”. Müsüjeseʼe nakotchijüin tü pülookekalüirua akumajuushikat natüma, nnojotkalaka cheʼojaain namüin ipa. Je yala suluʼu tia mmakat, eesü mena atükia. 4 Saashajaajiraakalaka süchikua: “Anashii kolotüle waya waneepia süpüla weʼnnaajünüin sütüma wayuu suulia waʼwalakajeʼennüin sainküin mma. Jooʼuya wakumajaiwa wapüla wane pueulo miyoʼu kakulaatsein. Je suluʼu tü pueulokat, wakumajeerü wane aliikajaalee müleʼoshaatainjatüin iipünaamüin sutuʼupaʼamüin tü sirumakat. Je sükajee anashaateerüin maʼi tü pueulo wakumajüinjatkat, kojuteena waya sütüma wayuu süpüshua”.

5 Shiasaʼa nnojoliiwaʼaya kettaain tü sukumajakat tü wayuukolüirua, nüshakatakalaka Jehová nanainmüin sünain eirakawaa sümüin tü pueulokat je tü aliikajaalee nakumajakat. 6 Sümakalaka naaʼin nüleʼeruʼu chi Maleiwakai sünain maa: “Aishaʼajaa, oʼttüitpa joo tü nakumajakat. Nnojoleerü jooluʼu eein kasa isain nachiki, süka waneesiain joo tü neʼirukukat je tü nanüikikat. Nounteerü kasa keeʼireekat naaʼin mapeena”, müshi. 7 Shiasaʼa süchikijee tia, arütkaashi Jehová nanainmüin. Sümakalaka naaʼin nüleʼeruʼu: “Anakaja jooluʼu müleka woʼunüle saʼakamüin tü wayuukolüirua waʼwalakajaaiwa sükuaippa nanüiki, nnojolüjiraaiwa nayaawatüin saaʼu jamaluʼulüin nanüiki waneʼewai nakua”, müshi.

8 Katataawakalaka sükuaippa nanüiki nütüma Jehová sümaa nuʼwalakajeʼerüin tü wayuukolüirua yalajee yala sainküinpünaa mmakat süpüshua saaliijee tü naaʼinrakat. Je saaʼujee tia, nooʼulaakalaka suulia akumajaa tü pueulokat. 9 Je sünülia tü pueulokat, Babel, sükajee sükatajinnüitpain sükuaippa sünüiki tü wayuukolüirua süpüshua nütüma Jehová je suʼwalakajinnüin nütüma yalajee yala sainküinpünaa mmakat.

Na nuuʼuliwoʼukana Sem, wane chi nüchonkai Noé

10 Anuu nanülia na nuuʼuliwoʼukana Sem. Shiasaʼa maa aka piama juya süchikijee nüshakatüin Noé namaa na nüchonniikana suluʼujee tü anuakat, antüsü nuuyase Sem, chi nüchonkai Noé, sünainmüin 100 juya. Je soʼu juyakat tia, kachonshi nia wane toolochon. Arfaxad nünülia nütüma. 11 Shiasaʼa süchikijee tia, kooʼomüinsü nümüin Sem 500 nuuyase. Eekalaka wane nüchonniʼiya.

12 Shiasaʼa süntapa nuuyase Arfaxad sünainmüin apünüin shikii jaʼralimüin juya, kachonshi nia wane toolochon. Sala nünülia nütüma. 13 Shiasaʼa süchikijee tia, kooʼomüinsü nümüin Arfaxad 403 nuuyase. Eekalaka wane nüchonniʼiya.

14 Shiasaʼa süntapa nuuyase Sala sünainmüin apünüin shikii juya, kachonshi nia wane toolochon. Heber nünülia nütüma. 15 Shiasaʼa süchikijee tia, kooʼomüinsü nümüin Sala 403 nuuyase. Eekalaka wane nüchonniʼiya.

16 Shiasaʼa süntapa nuuyase Heber sünainmüin apünüin shikii pienchimüin juya, kachonshi nia wane toolochon. Peleg nünülia nütüma. 17 Shiasaʼa süchikijee tia, kooʼomüinsü nümüin Heber 430 nuuyase. Eekalaka wane nüchonniʼiya.

18 Shiasaʼa süntapa nuuyase Peleg sünainmüin apünüin shikii juya, kachonshi nia wane toolochon. Reu nünülia nütüma. 19 Shiasaʼa süchikijee tia, kooʼomüinsü nümüin Peleg 209 nuuyase. Eekalaka wane nüchonniʼiya.

20 Shiasaʼa süntapa nuuyase Reu sünainmüin apünüin shikii piammüin juya, kachonshi nia wane toolochon. Serug nünülia nütüma. 21 Shiasaʼa süchikijee tia, kooʼomüinsü nümüin Reu 207 nuuyase. Eekalaka wane nüchonniʼiya.

22 Shiasaʼa süntapa nuuyase Serug sünainmüin apünüin shikii juya, kachonshi nia wane toolochon. Nacor nünülia nütüma. 23 Shiasaʼa süchikijee tia, kooʼomüinsü nümüin Serug 200 nuuyase. Eekalaka wane nüchonniʼiya.

24 Shiasaʼa süntapa nuuyase Nacor sünainmüin piama shikii mekietsalümüin juya, kachonshi nia wane toolochon. Taré nünülia nütüma. 25 Shiasaʼa süchikijee tia, kooʼomüinsü nümüin Nacor 119 nuuyase. Eekalaka wane nüchonniʼiya.

26 Shiasaʼa süntapa nuuyase Taré sünainmüin akaratshi shikii juya, kachonshi nia apünüinshii tooloyuu. Niʼitaain nanülia Abram, Nacor je müshia Harán.

Na nuuʼuliwoʼukana Taré

27 11:27-29 Niasaʼa Taré, nia nashika Abram, Nacor, ooʼulaka Harán. Niasaʼa Harán, nia nüshika Lot, Milca, ooʼulaka Isca. Ouktüshi Harán chaa nuumainruʼu suluʼu wane pueulo kanüliasü Ur suluʼu tü mma kepiakat aluʼu tü wayuu caldeokalüirua. Ouktüshi nia kataiwaʼaya noʼu Taré chi nüshikai. Niasaʼa Nacor, nuʼwayuusetaalakalaka Milca tü nüchonkot Harán chi nimüliakai. Niasaʼa Abram, nuʼwayuusetaalakalaka Sarai. 28 — 29 — 30 Otta Sarai, machonsot shia süka maralüin.

31 Soʼu wane kaʼi, nükolojookalaka Taré eejee tü pueulokat Ur suluʼukot tü mma kepiakat aluʼu tü wayuu caldeokalüirua. Oʼunüshi yalajee yala chai nükua Canaánmüin. Nümaashi Abram chi nüchonkai, je Sarai tü naʼüikat, nuʼwayuuse Abram, ooʼulaka Lot chi nüchonkai Harán. Akatsaʼa nantapa suluʼumüin wane pueulo kanüliasü Harán, makatüshii naya chaʼaya. Nnojoliishii ayatüin sünain oʼunaa Canaánmüin. 32 Ouktüshi Taré 205 nuuyase yala suluʼu Harán.