Génesis

2 Kettaaitpa joo nükumajüin chi Maleiwakai kasakat süpüshua yaa mmoluʼu ooʼulaka chaa iipünaa sümaa sünouktünüitpain nütüma. 2 Je noʼu chi kaʼi akaratshikai, eemeraashi nia suulia süpüshua tü niʼyataainkat. Ojolooshi suulia tü aʼyatawaakat süka keraaitpain tü nükumajalakat.

3 “Kojutshi maʼi chi akaratshikai kaʼi”, müshi chi Maleiwakai. Nüneekakalaka nia süka niain neemeraain oʼu süchikijee süpüshua tü niʼyataainkat sünain akumajaa kasa süpüshua.

4 Tüü, shia süchiki tü naaʼinrakat chi Maleiwakai paala sümaiwa sünain akumajaa kasa süpüshua chaa iipünaa ooʼulaka yaa mmoluʼu.

Chi wayuukai suluʼu tü apainkat Edén

Sümaiwa paala, nüʼttaiwaʼaya Jehová, chi Maleiwakai, sünain nükumajüin shikii kasa süpüshua, 5 nnojotsü paala eejatüin wunuʼulia mmapaʼapünaa je nnojotsü asotüin aʼttiee. Süka jamüin, nnojoliyüliain niʼitirüin juya chi Maleiwakai saaʼu tü mmakat je nnojoliyüliain eein apünajaa waüyee. 6 Mayaainje nnojoyüliain aʼitüin juya, aparalaasü wane wüin mmaapüjee süpüla achüʼlajaa tü mmakat.

7 Naapaakalaka Jehová, chi Maleiwakai, wane pootshi süpüla nütüküinjachin chi wayuukai süka. Je süpüla niʼrüinjatüin kataa oʼu, nujuʼulakalaka joo nia niʼiruʼupünaa süpüla süsanalaainjatüin naaʼin. Katüitpakalaka joo noʼu chi wayuukai sütüma tia.

8 Shiasaʼa süchikijee tia, niʼitaakalaka Jehová, chi Maleiwakai, wane apain chaa wiinnaa suluʼu wane mma Edén sünülia. Je suluʼu tü apainkat, niʼitaakalaka chi wayuu nükumajalakai. 9 Je chaʼaya, niweetirüin Maleiwa wunuʼulia katataʼawai. Eesü wunuʼu eekai anachonin maʼi shiyolojo sümaa jemetüin süchon. Otta yaa pasanain sünain tü apainkat, eesü tü wunuʼu katajatkat atüma soʼu wayuu waneepia ooʼulaka tü wunuʼu atüjaakat atüma wayuu saaʼu tü anasükat je saaʼu tü mojusükat.

10 Eesü wane shikii suʼwüira wüin suluʼu Edén, aparalaasü süpüla süsirüinjatüin tü pünajütkat suluʼu tü apainkat. Je süchikijee sujuittüin suluʼujee Edén, apaajiraasü suluʼu pienchin süchi sainküin mma. 11 Je wane süchi, kanüliakat Pisón, palatüsü suluʼupünaa wane mma kanüliasü Havila eere joulüin ooro. 12 Tü ooro chajeʼewatkat, anasü maʼi. Je chaʼaya, eesü wane “perfume” kanüliasü “bedelio” ooʼulaka wane tuʼuma kanüliasü “ónice”. 13 Je wane süchiyaʼasa, kanüliasü Gihón. Palatüsü suluʼupünaa wane mma Cus sünülia. 14 Je tü wane, kanüliakat Hidekel, chasü wüinpumüinpünaa saaʼu tü mma kanüliakat Asiria. Otta müsia waneʼeya, Éufrates sünülia.

15 Eʼitaanüshi chi wayuukai nütüma Jehová, chi Maleiwakai, suluʼu tü apainkat süpüla naaʼinmajüinjatüin tü pünajütkat. 16 Müshi Jehová, chi Maleiwakai, nümüin:

“Kaatei, anuu süchon tü wunuʼukolüirua süpüshua yaa suluʼu tü apainkat süpüla piküinjatüin shia. 17 Shiasaʼa nnojolüinjatüin piküin süchon tü wunuʼu atüjaweetkat atüma wayuu saaʼu tü anasükat je saaʼu tü mojusükat. Müleka piküle süchon wunuʼukot tüü, shiimüinshaana ouktajachin pia”, nümakalaka.

18 Müsü naaʼin nüleʼeruʼu jooluʼu Jehová, chi Maleiwakai: “Anasü saaʼin tamüin kamaajanale chi wayuukai suulia nümüiwain. Anakaja taainjüle joo wane akaaliijia nia süpüla wanaawajiraainjatüin saaʼin nümaa”, müshi.

19 Naapaain chi Maleiwakai wane pootshi je nütüküin tü kasakalüirua unaʼapüinjatkat je tü wuchiikalüirua. Nüntirakalaka joo shia nünainmüin chi wayuukai, Adánkai anülia. Je tü anüliee naapakat joo Adán sümüin waneʼewai sükuairua, sünülialeʼiria ütamüinreʼeya. 20 Majatü sükuaippa wanaa sümaa niʼitaain Adán sünülia tü mürütkalüirua, tü wuchiikalüirua, ooʼulaka tü kasakalüirua unaʼapüjatkat. Otta saʼakajee süpüshua tü nüntirakat Maleiwakai nümüin Adán, nnojotsü eein eekai anain nümüin süpüla akaaliijaa nia.

21 Müshijeseʼe nutunkirüin Jehová Maleiwakai chi wayuukai süka wane lapü kaʼleshaanasü. Shiasaʼa niyuʼlakalaka wane nuwatse nooʼopünaa. Je süchikijee tia, nüsürülüin tü niʼirukukot süchikua. 22 Je sükajee tü nuwatsekat, nükumajüin chi Maleiwakai wane jierü. Nüntirakalaka shia nünainmüin chi wayuukai. 23 Otta Adán, nümakalaka sünain talatüin maʼi naaʼin:

24 Müshijeseʼe nükatalaainjachin maaʼulu yaa wane wayuu shipialuʼujee nii je nipialuʼujee nüshi süpüla waneeshinjachin sünain saʼaniraainjatüin nükuaippa nümüiwa sümaa nuʼwayuuse süpüla paaʼinwajiraainjanain naya.

25 Mayaashiije masheʼinsalin Adán sümaa nuʼwayuuse, nnojotsü japülii natüma.