Génesis

Waneeirua nuuʼuliwoʼukana Abraham

25 Aapaashi joo Abraham wane nuʼwayuuse jeket, kanüliasü Cetura. 2 Kachonsü nütüma waneeirua tooloyuu kanüliashii Zimram, Jocsán, Medán, Madián, Isbac ooʼulaka Súa. 3 Otta na nüchonniikana Jocsán: nia Seba ooʼulaka Dedán. Je na nüchonniikana Dedán: nia Asurim, Letusim ooʼulaka Leumim. 4 Otta na nüchonniikana Madián: nia Efa, Efer, Hanoc, Abida ooʼulaka Elda. Naya napüshua na süchonniikana Cetura tü wane nuʼwayuusekat Abraham.

5 Nümüinjatü Isaac süpüshua tü nuwashirüinkat chi nüshikai ouktapa nia. 6 Otta müshia kataiwaʼaya noʼu Abraham, asülajapüʼüshi kasa anasü namüin napüshua na süchonniikana tü suwalaʼatakat nuʼwayuuse. Je soʼu wane kaʼi süpülapünaa ouktüin nia, nüjütüin na süchonniikana je na süikeyuukana Cetura chaa wüinpumüin süpüla kepiainjanain naya watta nuulia Isaac.

Anaajaashi Abraham

7 25:7-8 Naaʼinrapüʼüin Abraham wainma kasa anasü kataiwaʼaya noʼu, je ouktüshi nia 175 nuuyase. 8 — 9 Eʼiküna münüshijaʼa nia natüma Isaac ooʼulaka Ismael na nüchonniikana. Eʼitaanüshi nia chaa suluʼu tü ipa koʼukat eere tü apainkat suluʼu tü mma Macpelakat chaa wiinnaa sünain tü mmakat Mamre. Shia tü naʼapainsekat paala Efrón chi nüchonkai Zohar, napüshi na nuuʼuliwoʼukana Het. 10 Tü apain kaluʼukot tü ipa koʼukat, ayalajuushi paala nütüma Abraham noulia na nuuʼuliwoʼukana Het. Shia eejatüle shiʼitaanüin paala Sara tü nuʼwayuusekat.

11 Shiasaʼa süchikijee ouktüin Abraham, niiʼiyatüin chi Maleiwakai naʼanasia nümüin Isaac wanaa sümaa kepiain nia peje sünain tü ishi kanüliakat “Katoʼuchi Eʼrakai Taya”.

Na nuuʼuliwoʼukana Ismael.

12 Anuu nanülia na nuuʼuliwoʼukana Ismael chi nüchonkai Abraham. Nia süchonka Agar tü wayuu Egiptojeʼewatkat süchepchiapüʼükat Sara, tü jierü aapünakat paala sütüma Sara nümüin Abraham süpüla kachoinjachin nia sümüin. 13 Na nüchonniikana Ismael: Nebaiot chi epayaakai, Cedar, Adbeel, Mibsam, 14 Misma, Duma, Massa, 15 Hadar, Tema, Jetur, Nafis ooʼulaka Cedema chi emülieekai. 16 Naya shikiijeenaka poloo piammüin eʼirukuu sainküin mmakat süpüshua. Je tü nejepüsekalüirua eepüʼüle nantapünaain na nuuʼuliwoʼukana Ismael je tü mma kepiapüʼükat aluʼu, eʼitaanüsü nanülia na nüchonniikana Ismael sünain waneʼewai nakua. 17 Otta müshia Ismael, ouktüshi nia 137 nuuyase. 18 Je na nuuʼuliwoʼukana Ismael, ayatüshii kepiain naya suluʼu tü mmakat chaa wüinpumüin saaʼu tü mmakat Egipto, eere tü wopu Asiriamüinjatkat, oʼttüsü sünainjee tü mmakat Havila sünainmüinree tü mmakat Shur. Katatüsü waneepia noumain noulia na wane nuuʼuliwoʼukana Abraham.

Jemeishii Jacob ooʼulaka Esaú

19 Anuu nüchiki Isaac chi nüchonkai Abraham. 20 Shiasaʼa pienchipa shikii nuuyase Isaac, nuʼwayuusesü Rebeca, nüshunuu Labán, na nüchonniikana Betuel chi wayuu arameo chajeʼewaikai suluʼujee tü mma kanüliakat Padan-aram. 21 Otta müsia Rebeca, maralü shia. Achuntüshijeseʼe Isaac nümüin Jehová saaʼu tü nuʼwayuusekat süpüla kachoinjatüin shia je naapüin tü nüchuntakat nümüin. Ipuotkalaka shia. 22 Je süpülapünaa neweetüin, ayoujiraashii naya süleʼeruʼujee tü neikat. Müsü saaʼn süleʼeruʼu: “¿Jamüsü sülatakaʼa tamüin tüü?”, müsü shia sünain süchuntüin nümüin Jehová shiiʼiree nüküjüinjatüin jamaluʼulüin tia sümüin.

23 Nüsouktakalaka Jehová sümüin:

24 Shiasaʼa kettaapa sükalia Rebeca süpüla kachonwaa, jemeishii sümüin süchonnii toolo senkeyuu. 25 Chi epayaakai, ishotai je koishi maʼi niaʼayasa. Eʼitaanüsü Esaú nünüliain. 26 Je nüchikijee, eweetüshi chi emülieekai sünain najapuluʼujüin shiinee nuuʼui chi epayaakai. Eʼitaanüsü Jacob nünüliain. Jemeishii na nüchonniikana Isaac aippiruapa shikii nuuyase.

Naapüin Esaú sujut eʼirumaa nümaʼanajatkat

27 Je miyoʼupa Esaú, tütüshi nia süpüleerua olojoo je kamalainsü nümüin waraittaa sainküin mojuui. Otta müshia Jacob, wayuu jimatüshi nipialuʼu. 28 Otta Isaac, kamalainshi nümüin Esaú nuulia Jacob süka nikapüʼüin tü kasa simoluuna nuʼutapüʼükat aaʼin chi nüchonkai sünain olojoo. Otta müsia Rebeca, kamalainshi sümüin Jacob nuulia Esaú. 29 Soʼu wane kaʼi, aʼlakajaashi Jacob wane pitshuushi kerasü. Nüleʼejakalaka Esaú sünainjee olojoo sümaa jamüsirüin maʼi nia.

30 Nümakalaka nümüin Jacob:

—Ouktushi taya jamü. Cheʼe tamüin süpüshi türa putse ishokot oʼu —müshi. (Je na nuuʼuliwoʼukana Esaú maaʼulu yaa, Edom nanülia süka “ishosü” maluʼulüin tia süka pütchi hebreo.)

31 Nüsouktakalaka Jacob nümüin:

—Saaʼu eʼirumaain pia, makatüinjat pümaʼana tü nuwashirüinkat chi washikai. Otta müleka paapüle tamüin sujut eʼirumaa pümaʼanakat, taapeerüjaʼa shiiʼiraka pümüin tü totsekat —müshi.

32 Nümakalaka Esaú:

—Anakaja. Süka jamüin, motsosü maʼi taaʼin, nnojotsü kasajatüin tamüin sujut eʼirumaa tamaʼanakat —müshi.

33 Nüsouktakalaka Jacob:

—Otta palajana, tü keeʼireekat taaʼn, shia pansaainjatüin pünüiki tamüin sünain paapüinjatüin jooluʼu tamüin sujut eʼirumaa pümaʼanakat —müshi.

Pansaaitpa joo nünüiki Esaú nümüin Jacob sünain naapüin sujut eʼirumaa nümaʼanajatkat nümüin. 34 Naapakalaka Jacob wane pan ooʼulaka süpüshi tü nutsekat nümüin Esaú. Süchikijee niküin je nüsüin, ojuittaashi nia. Naapüitpa joo sujut eʼirumaa nümaʼanajatkat saaʼu wane eküülü neʼe sükajee nnojolüin kasajatüin shia nümüin.