Génesis
28 Neenakakalaka Isaac Jacob sünain maa nümüin:
—Eeshi Jehová pümaa. Tamüsü paala wane kasa pümüin. Nnojoishi kaʼwayuuseinjachin pia wane jierü eekai yaajeʼewalüin Canaán. 2 Otta puʼuna jooluʼu watta chamüin suluʼumüin tü mma kanüliakat Padan-aram, nipialuʼumüin Betuel chi süshikai tü püikat süpüla paapaainjatüin wane nüchon Labán chi shipayakai tü püikat. 3 Tachuntüin nümüin chi Maleiwa Pülashikai maʼi süpüla niiʼiyatüinjatüin naʼanasia pümüin süpüla wainmainjatüin tü puuʼuliwoʼukalüirua sümaa kojuteenain naya suluʼupünaa tü suumainkalüirua wayuu süpüshua. 4 Tachuntüin nümüin süpüla naapüinjachin pümüin je namüin na puuʼuliwoʼukana süpüshua tü nüküjakat achiki paala nümüin Abraham sünain pansaain nünüiki. Kasataalejese naapaain tü mma kepiainjanakat aluʼu naya süpüla noumainjatüin shia, tü aapünakat paala nümüin Abraham nütüma chi Maleiwakai —müshi Isaac nümüin Jacob.
5 Ajütünüshi joo Jacob nütüma chi nüshikai süpüla nuʼunüinjachin chamüin Padan-arammüin eere kepiain Labán, chi nüchonkai Betuel chi arameokai. Je Labán, nia shipayaka Rebeca tü neikat Jacob ooʼulaka Esaú.
Kaʼwayuuseshi Esaú nüchikua
6 Naapa achikirü Esaú tü nümakat Isaac nümüin Jacob sünain nüchuntüin naʼanasia Maleiwa nümüin wanaa sümaa nüjütüin Padan-arammüin süpüla aapawaa wane jierü süpüla nuʼwayuuseinjatüin shia. Naapa achikirü sünain nüchiajaanüin Jacob suulia kaʼwayuusejüin nia wane jierü Canaánjeʼewat. 7 Je naapa achikirü sünain noonooichipain Jacob sümaa nünüiki chi nüshikai sünain oʼunaa Padan-arammüin. 8 Niyaawatüitpa aaʼu Esaú jooluʼu sünain nnojolüin talatüin naaʼin chi nüshikai sümaa tü piamasükat jieyuu Canaánjeʼewatkalüirua naapaakat paala. 9 Je jooluʼu, mayaainje eein tü wane nuʼwayuusekalüirua, oʼunüshi nünainmüin Ismael, chi wane nüchonkai Abraham, sünain naapaainjatüin Mahalat tü nüchonkot, tü nushunuukat Nebaiot, süpüla nuʼwayuuseinjatüin shia.
Eeʼiyataashi Maleiwa nümüin Jacob chaʼaya Bet-el
10 Shiasa süchikijee naashajaain Jacob nümaa chi nüshikai, nuʼunakalaka suluʼujee Beerseba süpüla oʼunaa Haránmüin. 11 Je motsapa kaʼi, nüshakajaapünaakalaka suluʼu wane mma süpüla atunkaa. Eisalaashijeseʼe nia sümaa niʼitaain tü nikiikat saaʼu wane ipa. 12 Aʼlapüjaashijeseʼe nia soʼu aikat tia. Je niʼrüin nüʼlapüinruʼu wane kaleera shaʼwatüin iipünaamüin. Otta saaʼu tü kaleerakat, niʼrüin wane aapieeirua chajee eejee Maleiwa sünain ashakataa mmoluʼumüin je sünain aliikajaain nachikua chamüin.
13 Je nüʼlapüinruʼu, eeʼiyataa müshia Jehová yala nüʼütpaʼa. Nümakalaka nümüin: “Taya Nümaleiwaseka Abraham je Nümaleiwaseka Isaac. Tü mma pütunkakat aaʼu, taapeerü pümüin je namüin na puuʼuliwoʼukana. 14 Watteerü saalii puuʼuliwoʼu tatüma. Iseerü süchiki ayaawajünaa, maa aka isain achikii shiyaawajünüin tü jasai sotpaʼakat palaa. Kepieena naya sainküin mmakat tüü: chaa waapünaa, wiinnaa, palaapünaa, je uuchipünaa. Je paaʼujee piakai, süchunteerü tamüin wayuu sainküin mmakat süpüla anakuaippalüinjatüin shia tatüma maa aka anakuaippalin pia tatüma. 15 Soto paaʼin tü tamakat pümüin jooluʼu. Müichia nnojolin taleejüin pia. Eejeechi taya pümaa waneepia sümaa taaʼinmajüinjachin pia eepünaale puʼunüin. Takaaliijeechi pia süpüla püleʼejüinjachin yaamüin yaa suluʼumüin tü mmakat püchikua. Tekettaajeerü süpüshua tü taküjakat achiki pümüin sünain pansaain tanüiki”, müshi chi Maleiwakai nümüin Jacob nüʼlapüinruʼu.
16 Nüchijiraakalaka Jacob sünain sümüin naaʼin nüleʼeruʼu: “Atak, shiimainshaata maʼi sünain eein Jehová yaaya jaʼitaichi nnojolüin tatüjaain aaʼu”, maa müsü naaʼin. 17 Je süka sainkuuin naaʼin, ayatüsüya saashajaain naaʼin nüleʼeruʼu sünain maa: “Keemasü maʼi tü mmakat yaaya. Nipiataakaja eera shia Maleiwa. Ekerojiataakaja eera shia chamüin iipünaamüin nünainmüin”, maa müsü naaʼin.
18 Nüshaʼwalaakalaka Jacob wattaʼa maalü. Naapaakalaka tü ipa nütunkakat aaʼu. Nüshaʼwateʼerakalaka shia yala nüchikanainruʼu eejachire nütunküin. Nüshorottitkalaka seita “olivo” saaʼu tü ipakat shiyaawaseinjatü nümüin sünain naashajaain chi Maleiwakai nümaa chaʼaya. 19 “Luz” sünülia paala tü mmakat eejachire nütunkapünaain Jacob. Otta jooluʼu, niʼitaain Jacob sünülia Bet-el sümünüin. (Tü sünüliakat süka pütchi hebreo, “Nipia Maleiwa” maluʼulu.)
20 Nümakalaka joo Jacob nümüin Jehová sünain pansaain nünüiki nümüin: “Maleiwakalee, müleka tamaainjachire pia sünain paaʼinmajüin taya wopuluʼu süpüla nnojolüinjatüin cheʼojaain tamüin eküülü ooʼulaka tasheʼin, 21 je müleka taleʼejüle sünain anain takuaippa nipialuʼumüin tashi, shiimüʼinya piainjachin Tamaleiwasein waneepia. 22 Otta tü ipa eʼitaanakat jooluʼu tatüma süpüla sotüinjatüin taaʼin sünain paashajaain tamaa yaaya, aʼwaajüleepüleeinjatü shia süpüla süntajatüin wayuu pünainmüin. Je tasülajeerü pümüin poloʼowai sünainjee tü polookot shikii süpüshi tü paapeetkat tamüin”, müshi Jacob nümüin Jehová.