Génesis

Apashishi Benjamín Egiptomüin

43 Kooʼomüinsü maʼi tü jamükat suluʼu tü mmakat Canaán. 2 Je mapa, sajaʼttapa noulia tü eküülü nantiralakat paala chajee Egipto, müshi Jacob namüin na nüchonniikana:

—Juʼuna jüchukua jiyalajaiwa mojuko müsü eküülü wayaaluʼu.

3 Nüsouktakalaka joo Judá nümüin:

—Müshi chi wayuukai paala wamüin sünain jashichin nia: “Müleka nnojorüle jüntirüin tamüin chi jimüliakai, nnojo jüleʼejüin tamaʼanamüin piantua”. 4 Akaajaʼa müleka püjütüle nia wamaa, oʼuneenainjaʼa waya sünain ayalajaa eküülü pümüin. 5 Otta müleka nnojorüle püjütüin nia wamaa, nnojoleena waya oʼunüin sükajaʼa nümüin chi wayuukai wamüin: “Nnojoleena jia antüin tamaʼanamüin piantua müleka nnojoire jümaain chi jimüliakai” —nümakalaka Judá nümüin chi nüshikai.

6 Nümakalaka Jacob namüin:

—¿Jamüshiikai jia jüküjakalaka nümüin chi wayuukai sümaa eein wane juwala süpüla mojuinjatüin taaʼin sütüma makat aka tia?

7 Nasouktakalaka joo nayakana napüshua:

—Nüsakirüin maʼi waya chi wayuukai sünain wapüshi otta wanain wayakanaya. “¿Katayüliʼi noʼu chi jüshikai? ¿Eeshi wane juwala?”, müshi nia wamüin. Wasouktakalaka neʼe niʼipajee. ¿Watüjaakalaka maʼi joo naaʼu sünain “Jüntira tamüin chi jimüliakai” nümüinjachin wamüin sükajee tia?

8 Achuntüshi joo Judá nümüin chi nüshikai nüchukua:

—Püjüta chi jimaʼaikai tamaa eekaijeʼe woʼunamaateenain suulia ouktajüin waya sütüma jamü. 9 Shiimüinshaata sünain taaʼinmajeechin nia. Akaajaʼa müleka sülatüle mojukalü akuaippa nümüin suluʼupünaa wopu, naajaʼa takuaippa pütüma. Müleka nnojoire taleʼejirüin nia pümüin nüchukua, tayajaʼa kasitka nia waneepia. 10 Aishaʼajaa pia taataa. Müleka woʼunatüjüliinkalejeʼe, nnojoliire koulain waya, piantuairüjeʼe wakua chajee.

11 Nüsouktakalaka chi nashikai namüin:

—¿Jamüsaʼa? Naale joo jamüinjatüin sükuaippa tatüma. Shia mata jaaʼinra tüü: kokoloin jümata suluʼu tü jütoleekasekat, kasa anasü atpajuushikat wunaʼainküinjee, makat aka mapa je süjü wunuʼu tü jemetayuukalü eejuu, otta müsia “bálsamo” je “mirra”, je tü süchonkalüirua wunuʼu kanüliakalüirua “nuez” je “almendra”. 12 Ooʼulaka müsia kojuyaleʼeya jülüʼüjüin tü neetkat süpüla jiyalajia tü eküütkat je süpüla jüleʼejiria tü neetkat eejatkalüinka antüin yaamüin süchukua suluʼu tü toleekakalüirua. Kamaʼasüche maaʼuwaataale neʼe eera shia.

13 “Anii chi juwalakai, juʼuna jümatakaʼa jünalaaiwa nümüin chia wayuukai. 14 Je chi Maleiwa Pülashikai, kasataalejese nümüliajüin jia sünain nüjütüin nüchikü Simeón chi juwalakai je süpüla nnojolüin jamajachin nümüin Benjamín. Je müleka amülouirejeʼe na tachooinkana, ¿jamüinjatpaʼa tatüma shia?”

15 Nayasaʼa na nüchooinkana Jacob, yapajaashii naya. Naapaain tü nakoloinjatkat je tü neetkat, je namaashi Benjamín. Oʼunamaatüshii naya Egiptomüin. Nantakalaka eemüin José. 16 Niasaʼa José, niʼrapa Benjamín namaa nayakana, müshi nümüin chi aluwataashikai suluʼu tü nipiakat: “Wayuukana naa, eküinjana tamaa jooluʼu kaleʼo. Pümaa naya tepialuʼumüin. Puʼutira saaʼin wane paaʼa je püʼlakajeʼeraleʼeya shia”. 17 Ayatakalajaʼaya aaʼinnüin nümüin José tü nümakat nümüin chi aluwataashikai suluʼu tü nipiakat. Nümaashiijaʼa na wayuukana nipialuʼumüin José.

18 Je nayakana, ainkuusü maʼi naaʼin süka namaanüin nipialuʼumüin José. Namajiraakalaka:

“¿Jamüinjana cheje joo eera waya wantinnakalaka yaamüin? Ataʼünnajanataaka eera waya saaʼu tü neetkat eiteʼennakalüinka soʼu yaajeejanain waya. Achepchieeinjanataakajaʼa joo eera waya sümaa saapaanüinjatüin tü wapüliisekalüirua”.

19 Shiasaʼa joo nantapa yaa soʼuluʼumüin tü nipiakat José, namakalaka nümüin chi aluwataashikai:

20 —Piirakaa, waʼlee. Antüshiinka waya yaamüin sünain ayalajaa eküülü. 21 Ooʼulaka waleʼejapa woumainpaʼamüin, wanaa sümaa watunkapünaain, wajutatkalaka tü watoleekasekalüirua. Eejatkalaka tü wanneetsekalüirua süpüshua shiʼipoʼujee waneʼewai sukua tü watoleekasekalüirua, tü süliajatüyaakat paala tü eküütkat. Anuukalaka joo shia walüʼüjüin süpüla weiteʼerajatüin jümüin süchukua. 22 Je müsia anuʼuya walüʼüjüin sooʼomüin neerü süpüla ayalajaa eküülüyaasaʼa. Akatsaʼa nnojolüin watüjaain aaʼu jaralüin keʼitaalain tü neetkat suluʼumüin tü watoleekasekalüirua.

23 Nüsouktakalaka joo chi aluwataashikai:

—Jimata jia. Nnojo mmolüin jia. Nia eera chi jümaleiwasekai ooʼulaka nümaleiwase chi jüshikai eʼitaaka eera tü neetkat suluʼu tü jütoleekasekat. Aapünüsüsaʼa tamüin tia neetkat.

Niasaʼa joo chi aluwataashikai, niyuʼtkalaka Simeón nanainmüin suluʼujee tü miichikat. 24 Nekerotkalaka jooluʼu napüshua. Naapakalaka wüin namüin süpüla noʼlojooinjatüin tü nooʼuikalüirua je ekinnüsü joo tü napüliisekalüirua. 25 Natüjaatüjülia aaʼu sünain neküinjanain yala. Yapajüsüjeseʼe natüma tü nasülajüinjatkat nümüin José süpülapünaa nüntüin kaleʼo kaʼikat. 26 Shiasaʼa nüntapa José nipialuʼumüin, naapakalaka nümüin tü kasa nasülajüinjatkat. Nejepinnajaakalaka nümülatuʼumüin shiyaawase kojutüin nia natüma. 27 Asakinnüshii joo naya nütüma José sünain nümüin namüin:

—¿Anayaashiijee jia? ¿Jama chi laülaakai jüshikai jüküjakaliinka achikü tamüin? ¿Anayaashije nia? ¿Katayüʼiya oʼu?

28 Nasouktakalaka nayakana:

—Chi washikai, ichaʼaya. Anashi. Katayüʼiya oʼu.

Nejepinnajaakalaka nachikua nümülatuʼumüin.

29 Niasaʼa José, niʼrapa Benjamín chi nimüliakai, süchonkai tü niikat, nümakalaka namüin:

—Nia jimüliakai chii, jüküjakaliinka achikü tamüin, ¿aashi müin? —müshi nia namüin.

Nümakalaka jooluʼu nümüin Benjamín:

—Tacheküin süpüleerua anainjatüin pükuaippa nütüma Maleiwakai, tachee.

30 Naaʼinpünaaleekalaka maʼi naaʼin süka niʼrüin chi nimüliakai. Je süka niʼyalajeein aaʼin, nuʼunakalaka namaʼanajee sünain ekeroloo suluʼumüin tü nütunkülekat. Niʼyalajakalaka yalamüin. 31 Je nojoloopa suulia tü aʼyalajaakat, nuʼlojookalaka nuʼupünaa. Nujuittakalaka nüchukua nanainmüin na nuwalayuukana sünain maa nümüin chi aluwataashikai:

—Juttanaja jümaala tü eküütkat.

32 Shiʼitaanakalaka tü niküinkat José naata sümüiwa. Ooʼulaka neküin na nuwalayuukana, naata sümüiwa. Ooʼulaka neküin na Egiptojeʼewaliikana ekapüʼükana nipialuʼu José, naata sümüiwa süka nalerajüin ekawaa namaa na hebreokana. 33 Je sünain naikkaleʼennüin na nuwalayuukana José niʼipoʼujee, aikkaleʼennüshi palajana chi epayaakai nünainmüinreʼe chi emülieekai sünain lotüin sükuaippa. Ponokalaka maʼi naaʼin sükajee tia. Eirakaajirawaʼain müshii sümaa namajiraain: “¿Jamakuaippat cheje eera watüjaanaka aaʼu?”

34 Niʼikajeʼetkalaka José süpüshi tü niküinkat namüin na nuwalayuukana. Otta jaʼraitua maʼi tü eküülü aapünakat nümüin Benjamín noulialeʼeya na waneeirua. Nasaakalaka nümaa José sünain talatüin maʼi naaʼin.