Génesis

Aküjüshi José sünain niain nawalain

45 Naaʼinpünaaleekaliaka José na nuwalayuukana. Isakalaka maʼi nüchikü nüchecherüin nuʼwuira noʼupala na nüchepchiakana. Nuʼwaatakalaka sümaa nümüin namüin:

—Jujuitta yaajee yaa jüpüshua.

Nnojotkalaka jaralüin eejatüin yala nümaa José wanaa sümaa nüküjiraain nüchikü namüin na nuwalayuukana. 2 Niʼyalajakalaka emetulu maʼi. Naapakalaka na Egiptojeʼewaliikana napüshua tü niʼirakat. Wattasüjaʼaya süchikü tü niʼirakat antüin suluʼumüin nipia chi Faraónkai. 3 Nümakalaka namüin na nuwalayuukana:

—Taya Josékaʼaya anülia, chi juwalakai. ¿Katayüʼiya oʼu chi tashikai?

Ainkuusü maʼi naaʼin sümaa mmolüin maʼi naya neema. Nnojoliika nasouktaatüin nümüin.

4 Ooʼulaka José, nümüshii na nuwalayuukana:

—Tawalayuuchen, jalaina. Jürütkaapa tanainmüin.

Je nayakana, narütkaapa nünainmüin José, nümüshii naya:

—Taya chi juwalakai, Josékai, chi jüikkakainka süpüla tantinnajachin Egiptomüin. 5 Ooʼulaka jiakana, nnojo jüshapapatain. Nnojo jaashichijaajiraain saalin jüikküinkain taya. Nia Maleiwa kajünalaka taya jüpüleerua süpüla katüinjatüin soʼu wayuu tatüma. 6 Anuuka joo antüirüin piama juya sümaa alin jamü suluʼu tü mmakat. Majattaajaʼa paala wayuu mapünajüin saaʼu jaʼrai juya. 7 Maleiwakai nuluwataatüjüʼiya taya suluʼumüin tü mmakat süpüla katajanain joʼu je süpüla kooʼuliwoʼuinjanain jia süpüla wattainjatüin maʼi saalin yaa saaʼu tü mmakat. 8 Shiasaʼaya tia, nia Maleiwa kajünalaka taya suluʼumüin tü mmakat. Nnojoishii jiain jiakana. Niakai niʼitaain taya süpüla nünüikeʼejachinkain taya chi Faraónkai ooʼulaka müsia süpüla sülaülainjachin taya tü nipiakat je sülaülainjachin taya tü mmakat süpüshua yaa Egipto. 9 Juʼuna jumata eemüin chi tashikai. Jüküja tü tanüikükat nümüin: “Müshi chi püchonkai: ‘Anii taya, niʼitaain Maleiwa sülaülain tü mmakat yaaya Egipto. Jalaichi yaamüin piʼraiwa taya. Nnojo koulain pia. 10 Kepieechi pia suluʼu tü mmakat Gosén yaa taʼütpaʼa sümaa püchooin, sümaa püikeyuu, sümaa pümüʼünüin, ooʼulaka sümaa kasa süpüshua eekai eein pümaʼana. 11 Je yala tekireena jia jüpüshua suulia jajaʼlajeʼerüin tü kasa eekai eein jümaʼana süpüshua süka majattüinyüliain paala tü jamükat saaʼu jaʼrai juya’, müshi pümüin”, jüma nümüin.

12 “Je jiakana ooʼulaka chi tawalakai Benjamín, jiʼrüin taya süka joʼu sümaa tayain José chi aashajaakai jümaa. 13 Je jüküja nümüin chi tashikai süchikü süpüshua tü takuaippakat yaa Egipto je süchikü süpüshua tü jiʼrakat yaa. Juʼunaata jumaala sünain asaajaa chi tashikai”, nümakalaka namüin.

14 Niasaʼa José, nükoʼoyojookalaka nünain Benjamín je naʼyalajiraakalaka sümaa koʼojiraain naya. 15 Je mapa, nüchuʼtkalaka José na nuwalayuukana napüshua sümaa niʼyalajüin sümaa nujuuptüin naya. Je süchikijee tüü, naashajaakalaka na nuwalayuukana nümaa.

16 Je tü nachikükat na nuwalayuukana José sümaa nantüin, antüsü shia suluʼumüin nipia chi Faraónkai. Je chi Faraónkai, talatakalaka nia namaa na niʼipajanakana.

17 Nümünakalaka José nütüma chi Faraónkai:

—Püma namüin na puwalayuukana napaalaajaaiwa tü naisekat noʼunamaataiwa nachikuaʼa Canaánmüin 18 nantiraiwa tamüin chi jüshikai ooʼulaka tü jüpüshikalüirua. Taapeerü namüin wane mma anasü yaa Egipto. Nekeerü tü joutkat suluʼu tü mmakat. 19 Pümaʼaleʼeya namüin namaaiwa kareeta yaajee Egiptojee süpüla nantirüinjatüin naʼwayuuseirua, je nachooinchen, ooʼulaka müshia chi jüshikai. 20 Je nnojo kachiiruain naaʼin tü namaʼanakat jooluʼu süka nokoroloinjatüin joo tü saʼanasiakat Egipto —müshi nümüin José.

21 Makalajaʼaya shia natüma na nüchooinkana Jacob. Naapakalaka José tü kareetakat namüin, tü naapajiralakat chi Faraónkai, ooʼulaka eküülü nemia wopuluʼu. 22 Nüsülajakalaka nasheʼin jekennuu. Asülajüshi 300 shipesajia shiʼipachonnii pülaata nümüin Benjamín je jaʼraisü nüsheʼin. 23 Ooʼulaka nümüin chi nüshikai, nuluwateʼerüin poloosü püliikü sümaa saʼanasia tü kasa eekai eein Egipto, ooʼulaka müsia poloosü püliikü sümaa soʼu pünajüt, je pan, otta nimiainjatkat wopuluʼu nüntapa yaamüin. 24 Je José, wanaa sümaa nüjütüin na nuwalayuukana, nümüshii naya:

—Nnojo jüʼülüjaajiraain wopuluʼu.

25 Noʼunakalaka Egiptojee. Nantakalaka Canaánmüin eemüin chi nashikai. 26 Naküjakalaka nüchikü José nümüin Jacob sümaa namüin nümüin:

—Katoʼuchi José. Nnojoishi ouktüin. Nia aluwataaka chaʼaya Egipto.

Je joo chi nashikai, ponosü maʼi naaʼin tü naküjalakat. Isasü nüchiki anoujaa tü namüitpakat nümüin.

27 Je süküjünapa süpüshua nümüin Jacob tü nünüikikat José ooʼulaka niʼrapa tü kareetakalüirua nuluwanaajiralakalüirua José nüpüla, atütülaaitpa naaʼin. 28 Nümakalaka:

—Shiimaintaʼaleejaʼa maʼi katüin noʼu tachon. Achekataashi toʼunüin teʼraiwa nia süpülapünaa ouktüin taya.