Génesis
Kaainjarat maʼi wayuu süpüshua
6 6:1-2 Ayatüsia kooʼomüin wayuu sainküin mmakat süpüshua. Je tü jieyuukalüirua, anapüisü maʼi. Otta müshia noʼuluku na wayuu tooloyuu nüpüshikana Maleiwa, keejiasü namüin tü majayünnüükat süka anasüchoin maʼi shiairua. Müshiijeseʼe naapaain eekai nacheküin süpüleerua naʼwayuuseinjatüin. 2 — 3 Otta Jehová, müshi nia: “Nnojolüitpa anain tamüin katüin soʼu wayuu süpüla kaʼikat süpüshua. Ouktajanapajaʼa neʼe naya soʼu wane kaʼi süka wayuuin naya. Anakaja jooluʼu müleka nnojorüle sülatüin kataa oʼu namüin süchikijee tü nouyase 120 juya”, müshi. 4 Otta na nooʼuliwoʼukana na majayünnüü kaʼwayuusekana na nüpüshikana Maleiwa, miyoʼuyuu maʼi sümaa katsüniin maʼi naya. Eʼnnaajünüshii naya soʼu wainma juya sünain kojutüin sütüma wayuu saaʼujee yalayalain maʼi naya sünain atkawaa.
5 Niʼrüin Jehová tü wayuukolüirua sainküin mmakat sünain mojulaain maʼi shiairua je jülüjain saaʼin tü mojuluʼutkat waneepia. 6 Mojutaasü maʼi naaʼin saaʼu nükumajüin wayuu paala sümaiwa süpüla kepiainjatüin shia sainküin mma. Müsü naaʼin nüleʼeruʼu: “Aishaʼajaa, anashije müleka nnojolinkaleje takumajüin wayuu. 7 Anakaja jooluʼu tajaʼttirüle süpüshua wayuu sümaʼaleʼeya tü mürütkat je tü kasa lemütüsükat mmoluʼu otta tü wuchiikat”, müshi.
8 Otta müshia Noé, talatüsü maʼi naaʼin chi Maleiwakai nüka süka lotüin maʼi nükuaippa nuʼupala.
Nükumajüin Noé wane anua
9 6:9-10 Anuu nüchiki Noé, nashi na apünüinshiikana tooloyuu, kanüliakana Sem, Cam ooʼulaka müshia Jafet. Saʼakajee tü wayuukolüirua eejatkat wanaa nümaa Noé, niaʼala nümüiwa anamiaka waneepia sümüin wayuu je lotüin nükuaippa nuʼupala Maleiwa. Je wanaawajiraasü naaʼin waneepia nümaa Maleiwa. 10 —
11 “Otta wayuu süpüshua, mojulaasü waneepia nuʼupala Maleiwa. Atkaajiraashii naya sainküin mmakat süpüshua sünain paʼürülaajiraain naya. 12 Niʼrüin chi Maleiwakai sünain kamaʼüralüin wayuu süpüshua, sünain eʼrülin wayumüin maʼi naya.
13 Nümakalaka joo chi Maleiwakai nümüin Noé:
—Kaatei, shia taleʼeruʼuka neʼe tajaʼttirüinjatüin tü wayuukolüirua ütamüinreʼeya sainküin mmakat süpüshua. Tajaʼttireerü shiairua sükajee kooʼomüin kooʼomüin sükaluʼu kaʼi natüma mojulawaa sainküin mma. 14 Aluʼujasa piakai, anakaja jooluʼu müleka pükumajüle wane kasa maa aka saaʼin anua müleʼoshaatain maʼi süka wunuʼu anasüin eekai kajüin. Je tü anuakat, wainmeerü sütaüjia pütüma. Püshulereerü mena yaa suluʼujee ooʼulaka sütoutajee süpüshua suulia shikerojüin wüin suluʼumüin. 15 Tamüshi paala pia jamüinjatüin pütüma sükumajia tü anuakat: Tü sajaʼapüinjatkat, 140 “metro” shia, ooʼulaka piama shikii apünüinmüin “metro” tü seerulüinkat, ooʼulaka poloo pienchimüin “metro” sajaʼapüin iipünaamüin. 16 Apünüintua pütüma süpaʼa tü anuakat, wane yaa unaapünaa, wane yaa süseʼeruʼupünaa, je wane iipünaa. Yaleta pütüma tü saajunakat wane süseʼeruʼu “metro” suulia tü süsepükat süpüla shikerolüinjatüin jouktai je suwarala kaʼi. Je piʼitaa wane soʼu tü anuakat yaa shiatapaʼa —müshi.
17 Ayatüshi aashajaain chi Maleiwakai nümüin Noé sünain maa:
—Kaatei, anteerü tatüma wane wüin miyoʼushaata maʼi süpüla tajaʼttirüinjatüin tü wayuukot ütamüinreʼeya je kasa süpüshua sainküinkat mma. Shiimüin sünain ooʼuwoʼuleerüin sütüma tü wüinkat kasa süpüshua eekai katüin oʼu. 18 Aluʼujasa piakai, nnojoleechi ouktüin. Anuu wane pütchi pansaatüjütkalia tatüma teʼitaain joo püpüla: Oʼotoweechi pia suluʼumüin tü anua pükumajakat sümaa tü puʼwayuusekat ooʼulaka namaa na püchonniikana namaa naʼwayuuse. 19 6:19-20 Pikerotireerü kasa süpüshua eekai eein neʼe sünain piamawalin shia suluʼumüin tü anuakat, wane toolo ooʼulaka wane jierü süpüla kachooinjatüin shia kataiwa soʼu pütüma suulia sajaʼlajaain saaʼujee mmakat. Pikerotireerü kasa süpüshua, tü maüsükalüirua je tü simoluunakalüirua, tü wuchiikalüirua je tü mürütkalüirua je tü lemütüsükalüirua. 20 — 21 Pükotchireerü eküülü süpüshua süpüla jipijaaya jiakana je tü kasakalüirua süpüshua jümaainjatkat suluʼu tü anuakat —nümakalaka chi Maleiwakai nümüin Noé.
22 Oonooshi Noé sümaa nünüiki chi Maleiwakai sünain naaʼinrüin süpüshuaʼaya tü nuluwataakat anain.