Génesis
Ooʼulaasü jooluʼu tü wüinkat
8 Jülüjüshi naaʼin chi Maleiwakai Noé sümaa tü kasakalüirua süpüshua nümaakat yaa suluʼu tü anuakat. Nüjütüin wane jouktai sooʼopünaa tü mmakat. Müsüjeseʼe oʼttüin sünain oyoolojoo tü wüinkat. 2 Ooʼulaasü suulia ojuittaa tü wüin palatüsükat süleʼeruʼujee mma. Je ooʼulaasü tü juya miyoʼukat suulia aʼitaa. 3 Ayatüsü oyoolojüin tü wüinkat soʼu tü 150 kaʼi. 4 Je shiasaʼa soʼu tü akaratshikat kashi sünainmüin tü polookot akaratshimüin kaʼi, aikkalaa müsia tü anuakat saaʼu wane namünashii saʼaka tü uuchikalüirua kanüliakat Ararat. 5 Ayatüsia oyoolojüin tü wüinkat. Je soʼu tü polookot kashi sünainmüin tü palajatkat kaʼi, eeʼiyataasü shiʼichi tü uuchikalüirua.
6 Shiasaʼa süchikijee pienchi shikii kaʼi joyotüin tü anuakat saaʼu tü uuchikat, naakatakalaka Noé wane shipentaanain tü anuakat. 7 Nüjütakalaka suluʼupünaa tü shipentaanasekat wane samulu anooipaʼamüin shiiʼiree nütüjaweein saaʼu sünteerüle sünain mma eekai josoin. Otta tü samutkat, aleʼejawaisü sümaa suʼunüin süchikua kojuyatua, eimalaaleesia süntapa sünain mma eekai josoin.
8 Je süchikijee nüjütüin Noé tü samutkat, nüjütakalaka wane toomasü, shiiʼiree nütüjaweein saaʼu müleka sünteerüle sünain mma eekai josoin. 9 Otta süka eeyüliain wüin sooʼopünaa tü mmakat süpüshua, alenaasü süchikua tü toomasükat. Niyurulüin nütüna Noé süpanapa süpüla nikeroleʼerüinjatüin suluʼumüin tü anuakat. 10 Otta müsia süchikijee akaratshisü kaʼi, nüjütakalaka tü toomasükat süchikua suluʼujee tü anuakat. 11 Je motsapa kaʼi, aleʼejüsü tü toomasükat nünainmüin sümaa sülüʼüjüin shiʼichiruʼu süpana wane wunuʼu “olivo” münüsü. Nütüjaaitpa aaʼulu Noé sütüma tia sünain sumoutalaaitpain wüinkat suulia tü mmakat. 12 Shiasaʼa akaratshi kaʼi süchikijee, nüjütakalaka tü toomasükat süchikua anooipaʼamüin. Müitkalaka shia maleʼejünüin süchikua.
13 Je Noé, 601 nuuyase wanaa sümaa sajaʼlajaain tü wüinkat. Je soʼu tü palajatkat kashi sünainmüin tü palajatkat kaʼi, eirakaashi nia suluʼupünaa shipentaanase tü anuakat sümaa nünalaain anooipaʼamüin. Niʼrüin tü mmakat sünain alüʼülüin süpüla oosolowaa. 14 Otta soʼu tü piamasükat kashi sünainmüin tü piamakat shikii akaratshimüin kaʼi, josoitpa maʼi tü mmakat.
15 Nümakalaka joo chi Maleiwakai nümüin Noé:
16 —Pujuitta pümaala suluʼujee tü anuakat sümaa tü puʼwayuusekat ooʼulaka na püchonniikana je naʼwayuuse. 17 Pujuittira pümaala tü kasakalüirua eekat jümaa suluʼu tü anuakat: tü wuchiikalüirua, tü kasakalüirua süpüshua eekai maüsüinje ekai simoluunain, ooʼulaka tü lemütüsükalüirua. Anakaja kachonle shia, wainmaiwa shia sainküin mmakat —mataashi.
18 Müshijeseʼe ojuittüin Noé suluʼujee tü anuakat sümaa tü nuʼwayuusekat ooʼulaka na nüchonnikana je naʼwayuuse. 19 Ojuittüshii naya suluʼujee tü anuakat sümaa süpüshua tü kasakalüirua je tü lemütüsükalüirua je tü wuchiikalüirua.
20 Otta müshia Noé, nüpaaʼuwajaakalaka ipa süpüla akumajaa wane aʼajüleepala süpüla naʼajüinjatüin kasa nümüin Maleiwa sünain niiʼiyatüinjatüin nujut nümüin. Naapaakalaka waneesüwai mürüt je wuchii saʼakajee tü kasakalüirua je tü wuchiikalüirua aneekajuushikat paala nütüma Maleiwa. Nuʼutakalaka saaʼin sünain naʼajüin shia süpüshua saaʼu tü ipa apaaʼuwajuushikat. 21 Talatüsü maʼi naaʼin chi Maleiwakai süka jemetüin maʼi sheejuu tü aʼajuushikat nümüin. Müsü naaʼin nüleʼeruʼu:
“Tatüjaa aaʼulu wayuu süpüshua sünain mojulaain joʼuuiwaʼaya sünainmüinreʼeya laülaapa. Müiria nnojolüin toʼulejüin tü mmakat saaliijee tü kasa mojusü saaʼinrakat wayuu. Je müiria nnojolüin toʼutüin saaʼin kasa süpüshua eekai katüin oʼu maa aka tü taaʼinrüitpakat. 22 Eeiwaʼaya tü mmakat, eeweerü kaʼi je saʼwai, je eeweerü juyapuʼuliaje jouktaleʼolu, aijeerü jemiai je aijeerü walatshi, je eeweerü kashi süpüla apünajaa je süpüla asüʼüjaa pünajüt”, müsü naaʼin Maleiwa.