Mateo

Aapünüsü laülawaa namüin na polooshiikana piammüin

10 Neenakakalaka Jesús na polookana piammüin nikirajüinkana nünainmüin sünain nümüin namüin: “Taapüin laülawaa jooluʼu jümüin süpüla ayuʼlaa yolujaa süleʼeruʼujee wayuu je süpüla eiyajaa wayuu eekai ayuulin”, nümakalaka.

2 Niʼitaakalaka joo nanülia na polooshiikana piammüin “Aluwataaushi” münüin, süka nuluwataainjanain naya sünain aküjaa nünüiki sümüin wayuu.

Anuu nanülia na Aluwataaushikana: Simón, chi eʼitaanakai anülia Pedroin nütüma Jesús. Andrés, chi nimüliakai Simón. Jacobo nümaa Juan nüchonnii Zebedeo. 3 Felipe, Bartolomé, je Tomás. Mateo, chi okotchajüikai neerü nümüin chi sülaülashikai mma. Jacobo, chi nüchonkai Alfeo. Tadeo. 4 Simón, wane noʼutku na wayuukana kanüliakana Zelote. Je Judas Iscariote, chi aapüinjachikai nikii Jesús.

Nakuaippainjatü na polooshiikana piammüin wanaa sümaa noʼunüin sünain aküjaa

5 Nüjütakalaka Jesús na polookana piammüin sünain nuluwataain naya sünain nümüin namüin: “Nnojo juʼunüin saʼakamüin tü wayuukolüirua nnojotkat judíoin, tü ‘gentile’ münakat. Je nnojo juʼunüin suluʼumüin tü pueulokalüirua chaʼaya suluʼu tü mmakat Samaria. 6 Aluʼujasa, juʼuna sünainmüin tü wayuu Israelkalüirua sümüiwa, tü makat aka saaʼin anneerü eekai amüloulin. 7 Juʼuna süpüla jüküjainjatüin namüin sünain maa namüin: ‘Alüʼütsü nükalia chi Maleiwakai süpüla aluwatawaa’, meena jia namüin. 8 Jiiyaja wayuu eekai ayuulin. Jüsoʼireʼera saaʼin wayuu eekai ouktüin. Jiiyaja wayuu eekai ayuulin sütüma ajaʼttaa ata. Jiyuʼla yolujaa süleʼeruʼujee wayuu. Saaʼu nnojolüin juwalaajüshin tamüin süpüla juuntüin jaaʼinrüinjatüin tü anasükat, anakaja müleka nnojorule jüchuntüin awalaajünaa saaʼu tü kasa anasü jaaʼinrakat sümüin wayuu. 9 Je nnojo jülüʼüjüin makat aka ooro, pülaata je ‘cobre’ suluʼu tü juwoʼolüinkat. 10 Nnojo jüchisein jükattoʼuise je wunuʼu jüshepüʼüjia. Nnojo jülüʼüjüin suwalaʼata jüsheʼin je suwalaʼata jüsapaatse. Maa aka nuwalaajünüin wane aʼyataai, akaajaa jiakana. Anakaja saapajünüle tü cheʼojaakat jümüin sütüma tü wayuu jikirajakat.

11 “Je jüntapa suluʼumüin wane pueulo, jikerola suluʼumüin sünain jüchajaain nüchiki wane wayuu eekai kamaneeinjachin jümüin süpüla niʼiyouinjanain jia. Je nnojoleerü jiiʼiratüin tü miichi jüntakat aluʼu palajana. Waneeitpaleerü jüpülee sümaʼinruʼu eein jia suluʼu tü pueulokot. 12 Je jikerolapa suluʼu tü miichikat, ‘Eeshi Maleiwa jümaa’, meena jia namüin na kepiakana suluʼu. 13 Je müleka kamaneere naya jümüin, anakaja jüchuntüle nümüin Maleiwa süpüla niiʼiyatüinjatüin naʼanasia namüin. Akaajasa müleka nnojorule kamaneein naya jümüin, nnojoleena jia achuntüin nümüin Maleiwa naaʼu nala wayuukana. 14 Je müleka nnojoliire kapülain aaʼinyüü jia suluʼu wane pueulo je shiyouktünüle tü pütchi jüküjüinjatkat sümüin, juʼunamaata suulia sünain joʼotojooin tü mmakat sünainjee juuʼui jümaʼichiki shiyaawase jümüin: ‘Nnojotsü wasirüitpain eekai manoujüinyeein ale saaʼin neʼe’. 15 Shiimüin tü tamakat jümüin: Soʼu tü kaʼi kasalajaneetkat oʼu sümüin saainjala wayuu nütüma Maleiwa, na ayouktakana jünüiki, mülialeweena maʼi naya suulialeʼeya tü kaainjaratkalüirua sulujutkat paala tü pueulokat Sodoma ooʼulaka Gomorra.

Achiajaanüshii naya noulia na nüʼünüükana Jesús

16 “Jülüja jaaʼin tü tamüinjatkat jümüin jooluʼu: Tajütüin jia maa aka saaʼin anneetchen saʼaka unaalü, süka eein wainma na taʼünüükana saʼaka tia wayuukolüirua. Ee jaaʼin sünain tü wayuukolüirua, otta nnojo jütkaain namaa. 17 Jalia jia noulia, süka nataʼülireenain jia süpüla naapaa ekii namüin na laülaayuukana je süka naʼyaatireenain jia suluʼu tü ekirajüleekat naya. 18 Saaliijee jünoujain tanain, ashaʼwaleʼenneena jia namülatuʼu na sülaülashiikana mma ooʼulaka namülatuʼu na aluwataashiikana saaʼu wayuu süpüla jüsouktüinjanain namüin saaʼu tü jünoulakat. Je wanaa sümaa jüshaʼwaleʼennüin namülatuʼu, jüküjainjatü tachiki namüin je sümüin tü wayuu gentilekalüirua. 19 Je soʼuweena tü kaʼi jütaʼünneenakat oʼu natüma, nnojo jüshapataain aaʼin saaʼu tü jüsouktüinjatkat aka namüin. Aapüneerü jümüin soʼu maʼi kaʼikat tia tü pütchi jümüinjatkat namüin. 20 Otta tü pütchi jüsouktüinjatkat aka, nnojoleerü jüleʼeruʼujeejatüin, aapüneerü shia jümüin nütüma chi Naaʼinkai chi Jüshikai Maleiwa.

21 “Je sükuaippainjatkat wayuu soʼu kaʼikat tia, aapüneerü ekii süpüla ouktaa natüma na suwalayuukana je nütüma chi süshikai. Eejeena wayuu eekai neʼnnüin amüin sütüma nachooin sümaa noʼutinnüin aaʼin natüma. 22 Aʼürülaajeerü saaʼin wayuu süpüshua jünain saaliijee jünoujain tanain. Otta jia, müleka jüchecherüle jaaʼin suʼunnaa tü müliaa jiʼrakat, ayateena jia oʼtteʼennüin tatüma. 23 Müleka jashichire wayuu jümüin suluʼujee wane pueulo, anakaja jujuittüle yalajee sünainmüin waneʼeya. Shiimüin tü tamakat jümüin: Nnojoleerü jikeraajüin tü jaaʼinrüinjatkat suluʼu tü pueulokalüirua süpüshua suluʼu tü mmakat Israel süpülapünaa tantüin tayakai chi Shipayakai Wayuu.

24 10:24-25 “Maa aka eein wayuu eekai shiʼrüin wayumüin tamüin tayakai chi Jüsenyotsekai, akaweenia jia tekirajüinkana atümaʼaya. Maa aka eein wayuu eekai mojuin sünüiki tamüin, sünain Beelzebú tamünüin sütüma, alanaʼaleejeeria sünain mojuin nanüiki jümüin. Wane ekirajaashi, nnojoishi alanaain nuulia chi ekirajüikai, je wane achepchiee, nnojoishi alanaain nuulia chi kachepchiakai 25 —

Achechennüsü naaʼin suulia mmoluu.

26 “Nnojo mmolüin jia seema wayuu eʼrütkat wayumüin jümüin. Müleka sunujunnule wane kasa, eweeteerü süchikua. Müsüya aka tü nüchikikat chi Maleiwakai. Jaʼitairü nnojolüin aküjünüin paala sümüin wayuu sainküin mmakat süpüshua, aküjüneerü jooluʼu sümüin. 27 Sükajee tia, tü tekirajakat anain jia sujuuna wayuu, anakaja jikirajüle wayuu süpüshua sünain. 28 Je nnojo mmolüin jia seema wayuu eekai suʼuteein jaaʼin. Müleka juʼutünüle aaʼin, tü ajaʼtteetkat, shia neʼe tü jiʼirukukat. Nnojoleerü kasain saaʼinrüin tü wayuukolüirua jüka süchikijee. Taküjeerü joo jümüin jaralin chi mmolüinjachin eema jia. Anakaja niale mmolüin eema jia Maleiwa, nia kapülainka nümüiwa süpüla nuʼunirüin jia Hadesmüin eemüin süpülee tü ouktüsükalüirua. Anakaja niale mmoluukain eema. 29 Nnojo motüin jaaʼin sünain naaʼinmajüin jia Maleiwa waneepia. Eesü süpüla süikkünüin piamasü wuchii saaʼu wane neerü kachueerachen neʼe, ¿aashi müin? Otta tü wuchiikalüirua süpüshua, nnojotsü juunasüin nütüma chi Jüshikai Maleiwa. 30 10:30-31 Müshii aka jiakana sünain nnojoliin ooʼulaanüin jümüiwa nütüma, süka alanaʼaleein maʼi jujut nümüin suulialeʼeya tü wuchiikalüirua süpüshua. Je sükajee jaaʼinmajünüin nütüma Maleiwa, nnojo mmolüin jia seema wayuu eʼrütkat wayumüin jümüin. 31 —

32 “Müleka ‘Anoujashii waya nünain Jesús’, jümüle suʼupala wayuu, ‘Shiimüin sünain nanoujain tanain’, meechi taya jüchiki nümüin chi Tashikai Maleiwa chakai iipünaa. 33 Aluʼusa müleka juunjulajüle tachiki suʼupala wayuu, ‘Nnojoishii teʼraajüin naya’, meechi taya jüchiki nümüin.

34 “¿Aluwataaushi taya, saaʼin jümüin, süpüla achiajawaa wayuu atkaasü yaa mmaluʼu? Nnojoishi süpülajachin taya tia. Süpülajachi mojujiraainjatüin wayuu tatüma saaliijee tü taaʼinrakat je tü tekirajakat anain. 35 Aʼülüjeechi wane wayuu nümüin chi nüshikai. Aʼülüjeerü wane wayuu sümüin tü shiikat. Aʼülüjeerü wane wayuu sümüin tü saʼütkat. 36 Suluʼu wane miichi, aʼülüjiraweena na apüshiikana maa aka natkaain wayuu eekai paʼünüüwajiraain.

37 “Tamüshii paala jia: Nnojoleerü kasain jaamüin tamüin müleka aire jüpüla chi jüshikai je tü jiikat je tü jüchooinkalüirua suulialeʼeya alin taya jüpüla. 38 Chi wayuu eekai niyouktalaa nümüin taya niʼrapa müliaa sümaa mmoluu sheema oʼutinnaa aaʼin tanainjee, nnojoishi wanaain sümaa niainjachin wane tekirajüin. 39 Chi eekai niyouktüin taya süka naaʼinmajiraweein nukuaippa suulia ouktaa, amülouijeerü nukuaippa süpüshua. Otta chi wayuu eekai naapajiraain nukuaippa süpüla niʼyataainjachin tamüin, mayaashije oʼutüneechin aaʼin sünainjee tia, ayateechi oʼtteʼennüin tatüma.

40 “Chi wayuu kapülakai aaʼin jia, kapülashi naaʼin tayakaʼiya wanaa jümaa. Je saaʼu kapülain naaʼin taya, kapülashi naaʼin chi kajünalakai taya. 41 Chi wayuu kapülakai aaʼin wane nünüikimaajachi Maleiwa sümaa kojutüin nia nütüma sünainjee tü naaʼinrakat, wanaaweerü tü nümüinjatkat maa aka tü awalaajünakat nümüin chi nünüikimaajachikai. Je chi wayuu kapülakai aaʼin wane wayuu eekai anain noʼuluʼu Maleiwa sünainjee naaʼinrüin tü anasükat, wanaaweerü tü nümüinjatkat maa aka tü awalaajünakat nümüin chi wayuu anamiakai. 42 Shiimüin tü tamakat jümüin: Chi eekai kamaneein nümüin wane wayuu anoujashi sünainjee niain wane tekirajüin maa aka jiakana, maa aka nüsülajüin neʼe wüin nüsüin, shiimüin sünain nuwalaajüneechin sükajee tia”, nümakalaka Jesús namüin.