Mateo
Eeʼiranajaasü nukuaippa Jesús
17 Je mapa aippirua kaʼi süchikijee tia, neenajaakalaka Jesús apünüinshii na nikirajüinkana: Pedro, Jacobo ooʼulaka Juan, chi nimüliakai Jacobo, süpüla noʼunajanain nümaa namüiwa eemüin wane uuchi. 2 Je chamüin chaʼaya, eeʼiranajaasü nukuaippa Jesús noʼupala. Chuwatsü maʼi nuʼupünaa maa aka naaʼin chi kaʼikai. Otta nüsheʼin, jorojorotsü maʼi. 3 Eweenaa müshiʼiya noʼupala wane piamashii wayuu sünain naashajaain nümaa Jesús: nia Moisés ooʼulaka Elías, na nünüikimaajanakana Maleiwa paala sümaiwa.
4 Nümakalaka Pedro:
—Senyotkalee, anasü maʼi süka weʼrüitpain tü kasa alatakat woʼupala. Müleka pücheküle, anasü müleka takumajüle apünüinsü luma: wane püpüla, wane nüpüla Moisés, je wane nüpüla Elías —nümakalaka.
5 Wanaa sümaa naashajaain Pedro, eweetalaa müsü wane siruma kasuutalü maʼi nanainmüin. Süsouktakalaka wane pütchi saʼakajee tü sirumakat: “Anii chi Tachonkai aishikai tapüla. Talatüshi maʼi taya nümaa. Jüüjüü jümata sümüin nünüiki”, sümakalaka tü pütchikat namüin.
6 Je na apünüinshiikana nikirajüin, naapapa tü pütchikat, aʼwachiraashii mmaluʼu süka mmolüin maʼi naya. 7 Nürütkaakalaka Jesús nanainmüin sünain niʼitaain najapü nanain sünain nümüin namüin:
—Jüshaʼwalaa, nnojo mmolüin jia —nümakalaka namüin.
8 Otta nayaletpa nekii, neʼrüin Jesús sünain nümüiwain.
9 Je wanaa sümaa nashakatüin saaʼujee tü uuchikat, niʼikakalaka joo Jesús naaʼin sünain nümüin namüin:
—Nnojo jüküjüin süchiki tü kasa jiʼrüitpakat waneʼereʼeya jüküjüin tasoʼiraapa aaʼin süchikijee ouktaa, taya chi Shipayakai Wayuu —nümakalaka Jesús namüin.
10 Nasakirakalaka nia:
—¿Jamüshii naküjakaʼa na karalouktamaajanakana nüchiki Elías sünain niainjachin antüin palajana nüpüleerua chi Cristo Nüneekajalakai Maleiwa? —namakalaka.
11 Nüsouktakalaka Jesús namüin:
—Shiimüin sünain niainjachin Elías antüin palajana süpüla yapainjatüin nütüma süpüshua tü nüpüshikalüirua Maleiwa. 12 Tamüshii paala jia: Antüichipa Elías, akaisa nnojolin shiyaawatüin nia wayuu. Eʼrüliishii wayumüin nümüin. Akaweechia tayakai chi Shipayakai Wayuu, neʼreechi amüin tayakaʼiya —nümakalaka namüin.
13 Je na apünüinshiikana nikirajüin, nayaawatüitpa jooluʼu saaʼu sünain niain Juan chi owoutisaajüikai naashajaain achiki Jesús.
Anashi nütüma Jesús wane jintüi kaleʼeruʼushi paala yolujaa
14 Nantapa saʼakamüin tü wattakat saalin wayuu, arütkaashi wane wayuu nünainmüin Jesús sünain nüsapainyoʼukain nümülatuʼu sünain nümüin nümüin:
15 —Ekirajüikalee, anii tachon ayuuishi, anakaja pümüliajüle nia. Müliasü maʼi naaʼin wanaa sümaa nuʼkchichijaain. Ojutuʼuwaishi nia sütüma saʼaka tü sikikat je shiroku wüin. 16 Toʼunirüin paala chi tachonkai nanainmüin na pikirajüinkana shiiʼiree neiyajeein nia. Isasü nachiki —nümakalaka nümüin Jesús.
17 Nümakalaka Jesús sümüin tü wayuukolüirua süpüshua:
—Jiakana manoujüinyeekana tanain, jia eʼrüliikana wayumüin tamüin, wattairü sümaʼa taʼatapajüin jia shiiʼiree jünoujeein tanain —nümakalaka namüin.
—Pücheʼera chira püchonkai —nümakalaka nümüin nüshi chi jintüikai.
18 Otta müshia Jesús, nuuʼuleʼerakalaka tü yolujaakat suulia tü saaʼinrakat nüka chi jintüikai. Sujuittakalaka nüleʼeruʼujee. Anakalaka chi jintüikai wanaa sümaa tia.
19 Narütkaakalaka na nikirajüinkana nünainmüin sujuuna tü wattakat saalin wayuu sünain nasakirüin nia:
—¿Jamüsü nnojotkaʼa wountüin wayuʼlüin tü yolujaakat nuulia? —namakalaka nümüin.
20 Nüsouktakalaka Jesús namüin:
—Isasü jüchiki süka nnojolüin jünoujain tanain. Shiimüin tü tamakat jümüin: Müleka jünoujüle tanain, jaʼitairü nnojolüin katsüin jooluʼu tü jünoulakat, jaaʼinreerü tü kasa isakat süchiki wayuu. Maa aka jümataarüle paala sümüin wane uuchi, “Anakaja puʼunüle yaajee kaʼyatamüin”, sünoujeerü jünüiki. Nnojoleerü kasain isain jüchiki. 21 Otta yolujaa eekai müin aka tü ojuittinnakat nuulia chi jintüikai, nnojoleerü ojuittüin müleka nnojorule jüchuntüin nümüin Maleiwa sümaa jaamajüin —nümakalaka Jesús namüin.
Aküjüshi Jesús nüchikua nüchiki sünain ouktajachin
22 Shiasa mapa tia, wanaa sümaa jutkatüin Jesús namaa na nikirajüinkana chaʼaya Galilea, müshi nia namüin:
—Tayakai, chi Shipayakai Wayuu, aapüneematüichi ekii taya sajapuluʼumüin wane wayuuirua. 23 Oʼutinneechi aaʼin taya natüma. Je soʼu apünüin kaʼi süchikijee tia, osoʼireʼenneechi aaʼin taya —nümakalaka namüin.
Je na nikirajüinkana, mojukalaka maʼi naaʼin sütüma tü nümüitpakat namüin.
Tü neerü okotchajünakat süpüla tü aʼwaajüleekat
24 Nüntakalaka Jesús namaa na nikirajüinkana suluʼumüin tü pueulokat Capernaum. Eeshii wane okotchajülii neerü süpülajatü tü aʼwaajüleekat Maleiwa. Nantakalaka nünainmüin Pedro sünain nasakirüin nia:
—¿Naapüin chi ekirajüikai pia tü neerü süpülajatkat tü aʼwaajüleekat Maleiwa? —namakalaka nümüin.
25 —Aa —nümakalaka Pedro namüin.
Shiasa nikerolapa Pedro suluʼumüin wane miichi, arütkaa müshia Jesús nünainmüin sünain nümüin nümüin:
—Simón, tasakirüin paala pia sünain wane kasa: ¿Jaralii na wayuu awalaajüinjanaka nümüin chi sülaülashikai mma? ¿Naya na nüchooinkana? ¿Nayataapa na wayuu nnojoliikana nüchooin, na wayuu nuluwataakana neʼe aaʼu? —nümakalaka Jesús nümüin Pedro.
26 —Naya na wayuu nnojoliikana nüchooin —nümakalaka Pedro niʼipajee.
Nümakalaka Jesús nümüin:
—Nnojoluja mata awalaajüinjanain na nüchooinkana. 27 Otta müsia suulia mojujain naaʼin na wayuu aashajaayüliikana pümaa, anakaja müleka puʼunüle jooluʼu sotpaʼamüin tü palaakat süpüla pujutüin tü kuliʼrakat shiroku. Je tü palajateetkat jime piyuʼlüin, pujutala saanükü, je eejeerü püpüla wane neerü kachueera. Paapa tia namüin na okotchajüliikana süpüla wawalaajüin wayakana piamale süka, piakai ooʼulaka tayakai —nümakalaka Jesús nümüin Pedro.