Mateo

Antüshii wayuu wattajeʼewalii nünainmüin chi joʼuukai

2 Wanaa sümaa jemelin Jesús suluʼu tü pueulokat Belén suluʼu tü mmakat Judea, nia aluwataaka Herodes suluʼu tü mmakat. Shiasa süchikijee jemelin nia, antüsü wane wayuuirua suluʼumüin tü pueulokat Jerusalén. Wattajeʼewalii naya, wüinpujeʼewalii. Atüjaashii naya saaʼu sukuaippa tü jolotsükat. 2 Nasakirakalaka:

—¿Jalashi chi joʼuu jemeikai aluwataainjachikai saaʼu tü wayuu judíokolüirua? Weʼrüitpa wane jolotsü eweetüsü wanaa sümaa chajanain waya wüinpümüin, watüjaakalaka saaʼu sünain jemelichipain nia, wantüinakalaka jooluʼu yaamüin süpüla weeʼiyatüinjatüin nujut nümüin —namakalaka.

3 Otta müshia Herodes chi aluwataashikai, ooʼulaka wainma tü kepiasükalüirua suluʼu Jerusalén, ashapapajaasü maʼi naaʼin naapapa süchiki tü namakat nala wayuukana. 4 Neenajitkalaka Herodes napüshua na laülaayuushiikana naʼakajee na sacerdote judíokana ooʼulaka na karalouktamaajanakana süpüla nüsakirüinjanain naya sünain jalainjachin jemelin Cristo chi Nüneekajalakai Maleiwa. 5 Nasouktakalaka nümüin:

—Jemeijeechi nia suluʼu tü pueulokat Belén suluʼu tü mmakat Judea, naashin wane nünüikimaajachi Maleiwa sünain nüshajüin paala tü nünüikikat, sünain maa:

6 “Tü pueulokat Belén suluʼu tü mmakat Judea,

7 Neenakakalaka Herodes na wayuu wüinpujeʼewaliikana süpüla naashajaainjachin namaa sujuuna wayuu sooʼopünaa joujatüin maʼi shiweetüin tü jolotsü neʼrakat paala. Süküjünakalaka nümüin natüma. 8 Nüjütakalaka naya Belénmüin sünain nümüin namüin:

—Juʼuna jumaala süpüla jüchajaainjachin nüchiki chi joʼuukai. Je jüntapa nünain, jaapiramaateechi taya nüchiki süpüla toʼunüinjachin nünainmüin tayakaʼiya süpüla teeʼiyatüinjatüin nujut nümüin —nümakalaka Herodes namüin.

9 Oʼuna müshiʼiya naya süchikijee naapüin nünüiki Herodes. Je tü jolotsü neʼrapüʼükat wanaa sümaa chajanain naya wüinpümüin, oʼunüsü jooluʼu napüleerua sünain süshaʼwalaain iipünaa saaʼu tü miichikat eere chi joʼuukai. 10 Talatashaanasü maʼi naaʼin süka neʼrüin tü jolotsükat. 11 Je nantapa eemüin tü miichikat, eeshi napüla chi joʼuukai sümaa tü niikat. Noʼnnuwaakalaka süka nasapain süpüla neeʼiyatüin nujut nümüin. Naakatakalaka shirouse tü juraskeerü kaluʼukot tü nakoloinkat nepialuʼujee nümüin chi joʼuukai. Nasülajakalaka kasa eekai kojutüin maʼi: ooro, wane wunuʼu jemeta eejuut, je wane wunuʼu kanüliasü “mirra”. 12 Shiasa noʼunapa süpüla naleʼejüinjanain noumainpaʼamüin, eitaashii suluʼupünaa wane wopu naatajatü. Nnojoliishii alatapünaain Jerusalénpünaa süka naapinnüin naʼlapüinruʼu nnojoliinjanain naleʼejüin nünainmüin Herodes.

Aaʼinmajünüshi chi joʼuukai nütüma Maleiwa chaʼaya Egipto

13 Shiasa süchikijee noʼunapa na wayuu wüinpujeʼewaliikana, eweetüshi wane aapiee nümaʼanajeejachi Maleiwa nümüin José nüʼlapüinruʼu sünain nümüin nümüin: “Püchijiraa maala süpüla pümaainjachin chi joʼuukai sümaa tü niikat chamüin suluʼumüin tü mmakat Egipto süpüla jujuittüinjanain nuulia Herodes. Nüchajaweechi achiki chi joʼuukai süpüla nuʼutüinjachin naaʼin. Anakaja makatüle jia chaʼaya waneʼereʼeya jaapinnapa tatüma”, nümakalaka chi aapieekai nümüin José.

14 Nüchijiraakalaka José sünain nujuittüin nümaa chi joʼuukai je tü niikat süseʼeruʼupünaa ai sünain noʼunüin Egiptomüin 15 eeinjanale kepiain naya waneʼereʼeya ouktapa Herodes. Alatüsü tüü süpüla keraainjatüin tü nünüikikat chi Maleiwakai aküjünakat paala nütüma wane nünüikimaajachi, tü makat: “Teenaküin chi Tachonkai suluʼujee tü mmakat Egipto”.

16 Je nütüjaapa saaʼu Herodes sünain nemeʼerainpalain nia na wayuu wüinpujeʼewaliikana, jashichishaatashi maʼi nia. Nuʼutirakalaka naaʼin na tepichi tooloyuuchonniikana eekai motsoyünnuuin suulia piama juya suluʼu tü pueulokat Belén je pejepünaa sünain. Tü sotokot naaʼin, shia tü naashajalakat paala namaa na wayuu wüinpüjeʼewaliikana sooʼopünaa joujatüin maʼi eweetüin tü jolotsü neʼrakat paala. 17 Alatüsü tüü süpüla keraainjatüin tü nünüikikat chi Maleiwakai aküjünakat paala nütüma Jeremías chi nünüikimaajachikai, tü makat:

Amaanüshi Jesús Nazaretmüin

19 Shiasa süchikijee ouktapa Herodes, eweetüshi chaʼaya Egipto wane aapiee nümaʼanajeejachi Maleiwa nümüin José nüʼlapüinruʼu 20 sünain nümüin nümüin: “Püchijiraa maala süpüla pümaainjachin chi jintüikai sümaa tü niikat nachikua chamüin suluʼumüin tü mmakat Israel. Na oʼuteepüʼükana naaʼin chi jintüikai, ouktüinapa”.

21 Nüchijiraakalaka José sünain nujuittüin nümaa chi jintüikai je tü niikat süpüla oʼunaa suluʼumüin tü mmakat Israel. 22 Mmotshi José seema ekerolaa suluʼumüin tü mmakat Judea süka naapüin nüchiki chi nüchonkai Herodes kanüliakai Arquelao sünain nuluwataain chaʼaya süchikijee ouktüin chi nüshikai. Je José, süka achiajaanüin nüʼlapüinruʼu suulia ekerolaa chamüin, oʼuna müshia chamüin suluʼumüin tü mmakat Galilea. 23 Je nüntapa chaʼaya, oʼunüshi suluʼumüin wane pueulo kanüliasü Nazaret süpüla kepiainjanain naya chaʼaya. Alatüsü tüü süpüla keraainjatüin tü nünüikikat chi Maleiwakai aküjünakat paala natüma na nünüikimaajanakana, tü makat: “Nazaretjeʼewai chii”.