Mateo

Tü kasa eeʼiyataainjatkat süpülapünaa niitaain Cristo

24 Nujuittakalaka Jesús suluʼujee tü aʼwaajüleekat Maleiwa. Wanaa sümaa nuʼunajachin yalajee, arütkaashii na nikirajüinkana nünainmüin sünain namüin nümüin:

—Piirakaa sümüin tü miichikalüirua yaaya suluʼu süpaatiase tü aʼwaajüleekat Maleiwa. Anasü maʼi shiyolojo —namakalaka nümüin.

2 Nümakalaka Jesús namüin:

—¿Ponosü maʼi jaaʼin tü aʼwaajüleekat? Shiimain tü tamakat jümüin: Süpüshua türa ipa jiʼrakat joo müinmaʼa yaa, ojuttinneerü shia mmoluʼumüin sünain süsolojüneerüin soʼuweena wane kaʼi —nümakalaka namüin.

3 Shiasa nantapa sünainmüin tü wutai kanüliakat Olivos, wanaa sümaa joyotüin Jesús chaʼaya, arütkaashii na nikirajüinkana namüiwa nünainmüin süpüla nasakirüin nia:

—¿Joujaleerü sujuttinnaka tü aʼwaajüleekat Maleiwa? —namakalaka nümüin.

Nasakirakalaka nia nachikua:

—¿Kasa shiyaawaseetka wamüin süpüla watüjaainjatüin saaʼu sünain sülüʼülüin pükalia süpüla piweetüinjachin, tü sükaliajatkat sajaʼlajaain kasakat süpüshua? —namakalaka nümüin.

4 24:4-5 Nümakalaka Jesús namüin na nikirajüinkana sümaa tü wayuukolüirua: “Anteerü wayuu wainma sünain maa: ‘Tayaʼaya Cristokai’, meena. Pülashii naya nütüma Maleiwa naashin. Jalia jia suulia anoujaʼalaa naʼalain naya wayuukana maa aka sünoujeerüin wayuu wainma nanain. 5 —6 Jaʼitaina jia aapüin süchiki kasachiki sainküin mmakat süpüshua, nnojo jainkuuin aaʼin sütüma. Jaʼitakaje tiairua, nnojotsü shiain shiyaawasein sünain süntüitpain tü kaʼi sajaʼlajaainjatkat oʼu kasakat süpüshua. Alatüinjatia neʼe kasa eekai müin aka tüü süpülapünaa süntüin kaʼikat tia. 7 Atkaajiraajeerü wayuu sainküin mmakat süpüshua. Mülieerü maʼi saaʼin wayuu sütüma jamü je sütüma ayuulii sainküin mma. Je akutkujaweerü tü mmakat sainküin mma. 8 Je süpüshua tü müliaa shiʼreetkat wayuu süpülapünaa teweetüin tayakai, meerü aka suʼttakai saalin joʼuu sümüin jieyuu.

9 “Ataʼünneena jia sütüma wayuu süpüla müliainjatüin maʼi jaaʼin sütüma sümaa suʼutireerüin jaaʼin. Je saaliijee jünoujain tanain, maalinjeena jia süpüla wayuu sainküin mmakat süpüshua. 10 Otta wayuu wainma, ooʼulaajeena suulia anoujaa tanain soʼuweena kaʼikat tia. Ataüjiraweerü wayuu nanainmüin na laülaayuukana saaʼu kanainjiraain saaʼin.

11 “Je soʼuweena kaʼikat tia, eejeena wainma na nünüikimaajanayaakana Maleiwa jaʼaka. Je anoujüneerü naʼalain sütüma wayuu wainma. 12 Kooʼomüinjeerü wayuu kaainjarat sainküin mmakat. Je sükajee tia, ooʼulaajeerü wayuu wainma suulia aijirawaa. 13 Otta chi eekai nüchecherüin naaʼin suʼunnaa tü müliaa niʼrakat, ayateechi oʼtteʼennüin tatüma. 14 Süpülapünaa süntüin tü kaʼi sajaʼlajaainjatkat oʼu kasakat süpüshua, aküjüneerü sümüin wayuu tü pütchi anasükat, tü süchikikat nukuaippa Maleiwa sünain aluwatawaa. Aküjüneerü sainküin mmakat süpüshua süpüla saapünüinjatüin sütüma wayuu süpüshua. Je kettaapa shia, anteerü sükalia sajaʼlajaainjatkat oʼu tü kasakat süpüshua.

15 “Jiʼreerü shaʼwatüin yaa suluʼu tü aʼwaajüleekat Maleiwa tü kasa kashüülasü nülerajüinjatkat anainjee Maleiwa tü aʼwaajüleekat, tü ashajünakat achiki paala nütüma Daniel chi nünüikimaajachikai Maleiwa. (Jia aashajeʼerakana tü tashajakat, anakaja jiyaawatüle saaʼu.) 16 Je soʼuweena kaʼikat tia, na wayuu kepiakana suluʼu tü mmakat Judea, anakaja müleka naʼluwataale saʼakamüin tü uuchikat süpüla nanujulaainjanain chaʼaya. 17 Chi wayuu joyotokoi sheemioushi tü nipiakat soʼu kaʼikat tia, nnojoi nikerolüin paülüʼümüin süpüla nükotchajaain nükorolo. 18 Otta chi wayuu eekai niʼyataain suluʼu niyüüjase, anakaja nnojoire nüleʼejüin nipialuʼumüin süpüla aʼwanajawaa nüsheʼin. 19 ‘Aishaʼajaa’ meerü tü wayuu eekai ipoolüin je eekai sütulayülüinya süchon soʼu kaʼikat tia, süka kapüleejeerüin maʼi süpüleerua awatawaa. 20 Jüchunta nümüin Maleiwa süpüla nnojolüinjatüin sülatüin jümüin tüü juyapü je soʼu sükalia eemerawaa. 21 Soʼuweena kaʼikat tia, alanaʼaleejeeria maʼi tü müliaa shiʼreetkat wayuu suulia tü shiʼrakat wayuu paala sümaiwa süchikijee sükumajünüin tü mmakat je suulia tü shiʼrakat wayuu maaʼulu yaa. Nnojoleerü wane müliaa eekai müin aka saaʼin tia mapeena. 22 Müleka nnojoruleje saawalaain tü müliaakat, ajaʼlajaweerü wayuu süpüshua sütüma. Akatsa naawaleʼereerüin shia Maleiwa naaʼujee na aneekuushikana nütüma.

23 “Je soʼuweena kaʼikat tia, müleka jümünüle ‘Jiirakaa, ichaa Cristo chi Nüneekajalakai Maleiwa chaʼaya’ je ‘Jiirakaa, anii nia yaaya’, müleka jümünüle, nnojo joonooin sümaa tia. 24 Je soʼuweena kaʼikalüirua tia, eweeteechi wayuu eekai ‘Taya Cristoka’ nümeechin, je eekai ‘Taya wane nünüikimaajachikai Maleiwa’ nümeechin. Alaayuu neʼe nayairua. Pülashiijeena naya sünain naaʼinreerüin tü kasa eekai müin aka saaʼin tü nütüjakat apüleerua Maleiwa nümüiwa shiiʼiree nanoujüneein anain sütüma wayuu süpüshua, jaʼitashii nnojoliin anoujünüin anain natüma na nüneekajalakana Maleiwa. 25 Taküjüin jümüin süchiki tü alateetkat nnojolüiwaʼaya sülatüin süpüla yapainjanain jia süpüla.

26 “Müleka jümünüle ‘Iraa Cristo chi Nüneekajalakai Maleiwa, ichaa chaʼaya isashiipaʼa’, nnojo juʼunüin shiʼipajee tia sünain jüchajaain tachiki. Je müleka jümünüle ‘Iraa paülüʼü’, nnojo jünoujain tia. 27 Süka jamüin, maa aka tü shiyaakat juya shiʼrakat wayuu süpüshua amachetaain chaa sirumatuʼupünaa, akaweechia tayakai, chi Shipayakai Wayuu, taleʼejapa, shiʼreechi wayuu süpüshua. 28 Müleka jiʼrüle wane samulüirua, jütüjaa aaʼut sünain eein wane mürüt ouktüsü.

29 “Soʼuweena kaʼikat tia, süchikijee sükalia tü müliaakat,

30 “Je wanaa maʼi sümaa tia, eʼnneerü chaa sirumatuʼu wane kasa atüjaaneetkat atüma saaʼu sünain tantamaateechin tayakai chi Shipayakai Wayuu. Je tü wayuukolüirua sainküin mmakat süpüshua eekai nnojolüin saʼatapajüin taya, aʼwaateena naya süka mmolüin naya teema. Je shiʼreechi taya wayuu, tayakai, chi Shipayakai Wayuu, sünain antaa saʼaka tü sirumakat. Anashaateerü maʼi tü tantiakat, süka tanteechin sünain pülashin je sünain eʼitaaushin nütüma Maleiwa süpüla aluwatawaa wanaa nümaa. 31 Eweeteerü wane shipijana jontoroyoi emetuluinjatü maʼi. Je ajütüneena na aapiee nümaʼanajeejanakana Maleiwa süpüla nakotchajüinjatüin tü wayuu aneekuushikalüirua nütüma sainküinjee tü mmakat süpüshuaʼale.

32 “Soto jaaʼin sukuaippa tü wunuʼu ‘higuera’ münakat. Wanaa sümaa iyotüin süpana tü wunuʼukot, jütüjaa aaʼulu sünain sülüʼülüin süpüla süʼitüin iiwa. 33 Akaʼaya jiʼrapeena tü taküjaitpakat achiki jümüin, jütüjaweerü aaʼu sünain sülüʼülüin maʼi takalia süpüla antaa. 34 Shiimüin maʼi tü tamakat jümüin, alateerü tüü süpülapünaa shiʼrüin ouktaa tü wayuu eekat maaʼulu yaa. 35 Tasoʼiree aaʼinchii jia jooluʼu sünain wane kasa: Mayaainje sajaʼtteerüin tü kasakat chaʼaya iipünaa ooʼulaka yaa mmoluʼu soʼuweena wane kaʼi, tü pütchi tekirajapüʼükat anain jia, ayateerü süpüla kaʼikat süpüshua.

Matüjaajuu aaʼulu joujaleechin nüleʼejüin Cristo

36 “Nnojotsü sütüjaain aaʼu wayuu joujaleerüin sülatüin tü taküjaitpakat achiki jümüin. Jaʼitakaje na aapiee chakana iipünaa, nnojotsü natüjaain aaʼu. Nia neʼe chi Tashikai Maleiwa atüjaaka saaʼu nümüiwa. 37 24:37-39 Soto jaaʼin nüchiki Noé. Tü wayuukolüirua nnojoliiwaʼaya noʼotooin Noé suluʼumüin tü anuakat, eeʼeraashii neʼe naya sünain nnojolüin jülüjain naaʼin tü naainjalakat. Nnojotsü natüjaain aaʼu tü kasa alatajatkat namüin. Je mapa noʼotoopa Noé suluʼumüin tü anuakat, aʼitüsü tü juyakat sünain miyoʼuin maʼi shia süpüla ouktajatüin tü wayuukolüirua süpüshuaʼale eekai nnojolüin nümaain Noé suluʼu tü anuakat. Akaweeria takalioʼu tayakai, chi Shipayakai Wayuu, wanaa sümaa tanteechin tachikua. 38 — 39 — 40 Eejeena piamashii wayuu sünain aʼyatawaa suluʼu nayüüjase. Tamaweechi wane. Ooʼulaka wane, tapüteechi. 41 Eejeena piamashii jieyuu sünain amoliinajaa. Tamaweerü wane. Ooʼulaka wane, tapüteerü.

42 “Je sükajee tia, anakaja müleka eere jaaʼin tapüla tayakai, chi Jüsenyotsekai, süka taleʼejüinjachin tachikua jünainmüin soʼuweena wane kaʼi matüjaajuukat aaʼu jütüma. 43 Soto jaaʼin wane kasa. Wane wayuu nipiajachi, müleka nütüjaaleje saaʼu tü kaʼi nüntajaikai oʼu wane kaʼruwarai, nnojoireeja süpüla nutunküinjachin suulia nikerolüin chi kaʼruwaraikai. 44 Müinjanaya jiakana, anashii müleka keraajüle jia sümaa eein jaaʼin tapüla tayakai, chi Shipayakai Wayuu, süka taleʼejüinjachin tachikua jünainmüin soʼuweena wane kaʼi matüjaajuukat aaʼu jütüma”, nümakalaka Jesús namüin.

Nüchiki chi achepchiee moonooinkai sümaa nünüiki chi laamakai

45 Nikirajakalaka Jesús jooluʼu süka sukuaippa tü kasa eʼnnakat sainküin mma sünain jamüinjatüin nukuaippa nüntapeena sünain nümüin: “¿Jameechi wane achepchiee eekai kekiin maʼi sünain tütüin maʼi sünain tü aluwataanakat anain nia? Eʼitaaneechi nia sünain nekiipüʼüin na waneeirua süpüla ekiraa naya. 46 Je nüleʼejapa chi nülaamainkai, talateerü maʼi naaʼin nümaa müleka ayatüle naaʼinrüin süpüshua tü niʼitaakat nüpüleerua. 47 Shiimüin tü tamakat jümüin, eʼitaaneechi nia nütüma chi nülaamainkai süpüla laülaain saaʼu süpüshuaʼale tü kasa eekat nümaʼana.

48 “¿Jama müleka nnojorule jüüjüüin nia sümüin nünüiki chi nülaamainkai, müleka ‘Nnojoleechi antamaatüin chi talaamainkai nüchikua’ nümataarüle neʼe 49 sünain emiʼijawaa ooʼulaka sünain eperuwawaa je sünain niʼyaajüin na achepchieekana wanaa nümaa? 50 Antalaa meechia chi nülaamainkai soʼu wane kaʼi nnojotkat naʼatapüin oʼu nia. 51 Süsala meechia nia nütüma. Niʼikajaajeechi nia naʼakamüin na anoujayaashiikana nünüiki Maleiwa eere neʼrüin müliaa napüshua”, nümakalaka namüin na nikirajüinkana.