Mateo
Osoʼiraasü naaʼin Jesús
28 Je suwasajaapa aikat süchikijee tü kaʼi neemeraakat oʼu na judíokana, oʼunüsü María Magdalena ooʼulaka María tü niikat Jacobo je José eemüin tü woowirakat eejachire niʼitaanüin Jesús.
2 Akutkujaasü tü mmakat sükajee nüntüin chajee iipünaajee wane aapiee nümaʼanajeejachi Maleiwa sünainmüin tü woowira eʼitaanakat aluʼu paala müliashii. Je nüntapa, nüsünneʼerüin tü shirousekat waneemüin saʼata sümaa nüikkalaain saaʼu. 3 Kamacherasü maʼi nuʼupünaa. Kasuusü maʼi nüsheʼin. 4 Otta na surulaatkana, ainkuusü maʼi naaʼin süka mmolüin neema chi aapieekai. Müinapa aka naya saaʼin wane ouktüsü sütüma tü neʼrakat.
5 Je nantapa na jieyuukana, nümakalaka chi aapieekai namüin:
—Nnojo jainkuuin aaʼin. Tatüjaa aaʼut sünain jüchajaain nüchiki Jesús chi akachennakai paala süpüla ouktaa. 6 Nnojoishi nia yaaya. Osoʼiraaitpa naaʼin nüchikua, maa aka tü nümapüʼükat paala sünain naaʼinrüinjatüin. Jürütkaa jümaala jiʼrajaaiwa tü nüchikanainkat eejachire nia süpütüin wayuu. 7 Anakaja jooluʼu müleka juʼunamaatüle süpüla jüküjainjatüin nüchiki namüin na nikirajüinkana sünain jümüinjatüin namüin: “Osoʼiraasü naaʼin süchikijee ouktaa je oʼuneechi jooluʼu nia jüpüleerua Galileamüin. Jiʼreechi nia chaʼaya”, meena jia namüin. Soto jaaʼin tü tamüitpakat jümüin —nümakalaka chi aapieekai namüin.
8 Napantajaakalaka na jieyuukana eejee tü woowirakat. Jaʼitairü ayoʼujaain naaʼin, talataleesia maʼi naaʼin sütüma tü neʼrakat. Nawataakalaka eemüin na nikirajüinkana Jesús süpüla naküjainjatüin namüin süchiki tü aküjünakat. 9 Shiasa suluʼu tü wopukot, napanapajiraakalaka nümaa Jesús. “Eeshi Maleiwa jümaa”, nümakalaka namüin. Narütkaakalaka na jieyuukana nünainmüin sünain nasapainyoʼukain naya nümülatuʼumüin sünain naʼwaajüin nia sümaa najapuluʼujain nuuʼui. 10 Nümakalaka Jesús namüin:
—Nnojo mmolüin jia. Shia anaka aluʼu müleka juʼunüle nanainmüin na tawalayuukana jaapiraiwa naya süchiki noʼunüinjanain Galileamüin. Neʼreechi taya chaʼaya —nümakalaka namüin.
Tü naküjakat achiki na surulaatkana
11 Wanaa sümaa noʼunüin na jieyuukana eemüin na nikirajüinkana Jesús, oʼunüsü pueulopaʼamüin waneeirua tü surulaat eʼrajüsükalüirua saaʼu tü woowirakat. Naküjakalaka namüin na laülaayuushiikana naʼakajee na sacerdote judíokana süchiki süpüshua tü alatüitpakat. 12 Naashajaajiraakalaka na laülaayuushiikana naʼakajee na sacerdotekana namaa na waneeirua laülaayuu judíokana sooʼopünaa tü naaʼinrüinjatkat. Naapakalaka wainma neerü namüin na surulaatkana 13 sünain namüin namüin:
—Jüküjainjatü sümüin wayuu sünain süntüin tü nikirajüinkalüirua saʼwaipa wanaa sümaa jutunküin sünain suʼluwajüin müliashii. 14 Je müleka naapinnüle Pilato sünain nnojolichipain müliashii, aashajaweena waya nümaa süpüla nnojoliinjanain süsalain jia nütüma saaliijee tia —namakalaka na laülaayuukana namüin na surulaatkana.
15 Naapaakalaka joo na surulaatkana tü neetkat sünain naaʼinrüin tü namakat namüin. Je mapa, tü nachikikat na nikirajüinkana Jesús sünain naʼluwajüin müliashii, suʼwalakajaakalaka saʼaka tü wayuu judíokolüirua. Ayatsia joulüin maaʼulu yaa.
Aluwataanüshii na nikirajüinkana nütüma Jesús
16 Noʼunakalaka na polookana waneemüin nikirajüinkana Jesús Galileamüin saaʼumüin tü namünakat aküjünakat achiki paala nütüma. 17 Shiasa nantapa chamüin sünain neʼrüin nia, naʼwaajüin nia. Otta wane noʼutku, naashajaain suluʼu naaʼin sünain maa:
—¿Niayaa cheje maʼi eera Jesús chii? —müshii.
18 Nürütkaakalaka joo Jesús nanainmüin sünain nümüin namüin:
—Laülaashi taya nütüma chi Tashikai Maleiwa saaʼu wayuu süpüshua yaa mmaluʼu ooʼulaka saaʼu tü kasakalüirua süpüshua chakat iipünaa. 19 Je sükajee tia, juʼuna jumaala sainküin mmakat süpüshua süpüla jüküjainjatüin tachiki sümüin wayuu süpüla sünoujainjatüin tanain. Jikirajeena naya süpüla nayainjanain na tekirajüinkana maa aka jiakana. Je juwoutisaajeena naya saaʼu nünülia chi Tashikai, saaʼu tanülia tayakai chi Nüchonkai, je saaʼu nünülia chi Naaʼinkai Maleiwa. 20 Jikirajeena naya sünain tü taluwataapüʼükat anain jia süpüla noonooinjatüin sümaa. Shiimüin sünain jümaainjachin taya waneepia waneʼereʼeya süntapa tü kaʼi sajaʼlajaweetkat oʼu kasa süpüshua. Shiimüin sünain jümaainjachin taya süpüla kaʼikat süpüshua.