Marcos

Yapasü nütüma Juan nüpüna chi Senyotkai

1 Anuu suʼttia tü anasükat pütchi, tü nüchikikat Jesucristo chi Nüchonkai Maleiwa:

2 Tü suluʼukot tü karaloukta nüshajalakat Isaías chi nünüikimaajachikai Maleiwa, müsü yaa:

4 Süpüla shikeraajüinjatüin tü nüshajakat achiki paala Isaías, niweetakalaka Juan chi owoutisaajüikai sünain aküjaa nüchiki Maleiwa sümüin wayuu chaʼaya isashiipaʼa. Nuʼttakalaka sünain nimeʼejüin naaʼin na wayuukana shiiʼiree nayaawajaain suulia naainjala sümaa nakatalaain suulia süpüla sülatinnüinjatüin noulia. Je nuluwataain na oonookana sümaa nünüiki sünain nawoutisaajünüin. 5 Oʼunüsü wayuu watta saalin nünainmüin suluʼujee süpüshua tü mmakat Judea je suluʼujee tü pueulokat Jerusalén. Naküjüin tü naainjalakat nümüin Maleiwa, je owoutisaajünüshii nütüma Juan chaʼaya shiroku tü süchikat Jordán. 6 Otta Juan, kasheʼinshi nia wane süta tü mürüt kanüliakat “camello”, otta kasiʼirainshi paaʼata. Ekapüʼüshi nia kaashapü ooʼulaka mapa. 7 Anuu tü nümapüʼükat Juan sümüin wayuu: “Anteechi tachiirua wane wayuu alanaʼaleeshia toulia. Tayakai, wayuu neʼe. Nnojoishi wanaapünaain taya nümaa, süka pülashin maʼi nia toulia. 8 Tawoutisaajüin neʼe jia süka wüin. Otta müshia niakai, anteechi jünainmüin süpüla naapüinjachin jümüin chi Naaʼinkai Maleiwa süpüla eeinjachin nia waneepia jümaa”, mapüʼüshi Juan.

Owoutisaajünüshi Jesús

9 Je wanaa sümaa tia, nüntakalaka Jesús chajee Galileajee suluʼujee tü pueulokat Nazaret eemüin tü süchikat Jordán süpüla nuwoutisaajünüinjachin nütüma Juan shiroku tü süchikat. 10 Je wanaa sümaa nüshaʼwalaain Jesús süchikijee emetaa shirokujee tü wüinkat, eirakaashi nia iipünaamüin. Je wanaa maʼi sümaa tia, eerulaasü tü sirumakat chaa iipünaa. Niʼrakalaka chi Naaʼinkai Maleiwa maa aka saaʼin wane moʼuwa sünain ashakataa nünainmüin. 11 Saapünakalaka joo wane pütchi chaa iipünaajee sünain maa: “Pia chi Tachonkai aishikai tapüla. Talatüshi maʼi taya pümaa”.

Wanaa sümaa nuuʼulakünüin aaʼin Jesús

12 Oʼuninna müshia Jesús nütüma chi Naaʼinkai Maleiwa isashiipaʼamüin. 13 Chajachi nia maa aka pienchi shikii kaʼi sünain nuuʼulakünüin aaʼin nütüma Satanás chi sülaülakai yolujaa. Je chaa eejachire Jesús, eesü tü kasa jashichi kepiakat wunaʼainküin. Ooʼulaka aaʼinmajünüshi nia natüma wane aapieeirua nümaʼanajeejana Maleiwa.

Oʼttüshi Jesús sünain aküjaa nüchiki Maleiwa

14 Shiasa wanaa sümaa nüpüreesajünüin Juan nütüma Herodes, aleʼejüshi Jesús Galileamüin süpüla aküjaa tü anasükat pütchi, tü nünüikikat chi Maleiwakai, sünain maa: 15 “Antüitpa nükalia chi Maleiwakai süpüla nikeraajüin tü namapüʼükat na nünüikimaajanakana. Jiyaawajaa jumaala suulia jaainjala sümaa jünoujain tü anasükat pütchi, süka sülüʼülüin nükalia chi Maleiwakai süpüla aluwatawaa jaaʼu”, mapüʼüshi nia.

Nüneeküin Jesús na wayuu nümaainjanakana

16 Je wanaa sümaa waraittüin Jesús sotpaʼapünaa tü palaa kanüliakat Galilea, niʼrakalaka Simón ooʼulaka Andrés chi nuwalakai. Ajunaʼatshii tü nakusüinkat shiroku tü palaakat süka olojüliin naya jime.

17 —Anashii tamaatalai jia. Maa aka olojüliin jia jime, okotchajüinjana jia wayuu tamüin süpüla saapüinjatüin tanüiki —nümakalaka Jesús namüin.

18 Napüta namüsüjaʼa tü nakusüinkat süpüla oʼunaa nümaa.

19 Nuʼunaiwaʼaya Jesús mamüin aka türa, niʼrüin joo Jacobo, chi nüchonkai Zebedeo, ooʼulaka Juan chi nuwalakai. Areweentajaʼatshii tü nakusüinkat yaa suluʼu tü anuakat nümaa chi nashikai. 20 Eenaküna müshiʼiya naya nütüma Jesús. Napütakalaka chi nashikai namaa na nüchepchiakana suluʼu tü anuakat süpüla oʼunaa nümaa.

Ayuʼnnüsü wane yolujaa nütüma Jesús

21 Nüntakalaka Jesús namaa na nüneekajalakana suluʼumüin tü pueulo kanüliakat Capernaum. Je soʼu tü kaʼi neemeraakat oʼu na judíokana, ekerotshi nia suluʼumüin tü ekirajüleekat sünain nuʼttüin sünain ekirajaa tü wayuukolüirua chaʼaya. 22 Je ponusü maʼi naaʼin na wayuukana tü nünüikikat, süka shiyaawatüin saaʼinyaka naaʼu sünain niʼitaaushin nütüma Maleiwa süpüla ekirajaa nünüiki, nnojoishi müin aka naaʼin na karalouktamaajanakana. 23 Ashaʼwalaa müshia wane wayuu suluʼu tü ekirajüleekat, kaleʼeruʼushi yolujaa. Suʼwaatakalaka joo tü yolujaakalüirua nüleʼeruʼukat chi wayuukai nümüin Jesús:

24 —Aluʼuleekaijaʼa waya pütüma Jesús, piakai chi Nazaretjeʼewaikai. Aashin weʼraajüin pia. Je watüjaa aaʼuchi pia sünain piain aneekuushin nütüma Maleiwa. ¿Jamüinjatü wakuaippa pütüma? ¿Püjütajanataaka waya yaajee? —sümakalaka.

25 Nüchiajaakalaka jooluʼu Jesús tü yolujaakat:

—Koʼuta pia. Pujuitta yalajee nuulia chi wayuukai —nümakalaka sümüin.

26 Sujuittakalaka joo tü yolujaakat nuulia chi wayuukai sünain nuʼkchichijaain sütüma sümaa nuʼwaatüin.

27 Otta na wayuukana napüshua, ponusü maʼi naaʼin tü neʼrakat sünain naashajaajiraain:

—¿Kasashikai wayuu chi Jesúskai? Jeket sukuaippa tü nikirakat anain, je laülaain nia suulia tü yolujaakalüirua. Kojutkalaka nünüiki sütüma wanaa sümaa nüjütüin shia süleʼeruʼujee wayuu —namakalaka.

28 Yootoo müsüjaʼa nüchiki Jesús sainküin tü mmakat Galilea.

Wainma wayuu niiyajüin Jesús

29 Nujuittaakalaka Jesús suluʼujee tü ekirajüleekat namaa Jacobo ooʼulaka Juan sünain noʼunüin nipialuʼumüin Simón ooʼulaka Andrés. 30 Eejatkalaka nüpüla tü nimeshikat Simón sünain ayuulin sütüma oushuwaa. Je achuntünüsü nümüin Jesús natüma na wayuukana niiyajüinjatüin shia namüin. 31 Nürütkaakalaka joo sünainmüin sünain naapaain sajapü süpüla nüikkaleʼerüin. Naawaleʼerakalaka tü ayuuliikat suulia. Je süka anaitpain shia, oʼttüsü shia sünain shikirüin na shiʼiyoukana.

32 Je motsopa kaʼi, antinnüsü wainma wayuu eekai ayuulin je eekai kaleʼeruʼuin yolujaa nünainmüin Jesús. 33 Okotchajaasü tü wayuu kepiasükalüirua suluʼu tü pueulokat süʼütpaʼa tü soʼukot tü miichikat. 34 Niiyajakalaka wainma wayuu eekai ayuulin, tü ayuuisükat sütüma ayuulii eekai eein neʼe sünain. Je nujuittirakalaka yolujaa süleʼeruʼujee wainma wayuu. Otta nüchiajaain tü yolujaakalüirua suulia saashajaain nüchiki, süka sütüjaain naaʼu sünain jaralin nia.

Tü naaʼinreekat Jesús suluʼupünaa Galilea

35 Je eeiwaʼaya aikat, achijiraashi Jesús sünain oʼunaa chamüin chaʼaya eere yüütüülin mmakat süpüla aashajawaa nümaa Maleiwa. 36 Otta müshia Simón je na eekana nümaa, oʼunüshii naya sünain achajawaa nüchiki Jesús. 37 Je nantapa nünainmüin,

—Asukaasü wayuu wainma püpüla —namakalaka nümüin.

38 Nüsouktakalaka Jesús:

—Anakaja woʼunüle yaajee yaa. Oʼuneeshi taya chamüin chaʼaya eemüin tü pueuloirua chakat wapüleerua taküjaiwa nüchiki Maleiwa sümüin tia wayuukolüirua, süka shiain ajütünüin apüla taya —nümakalaka namüin.

39 Nuʼunakalaka Jesús sainküinpünaa tü mmakat Galilea sünain nüküjain nüchiki Maleiwa suluʼupünaa tü ekirajüleekalüirua wayuu judío chaʼaya je sünain nujuittirüin yolujaa süleʼeruʼujee wayuu.

Eiyajünüshi wane wayuu ajaʼtta atachi

40 Arütkaashi nünainmüin Jesús wane wayuu mayeinshi sütüma ajaʼttaa ata. Nüsapainyoʼukashi nia nümülatuʼu Jesús sünain nüchuntüin nümüin:

—Müinka pücheküle, piiyaja taya —nümakalaka chi wayuukai.

41 Nümüliajakalaka naaʼin Jesús chi ayuuishikai sünain niyurulain nütüna nünainmüin sünain naapaain nia:

—Tacheküin süpüleerua anainjachin pia —nümakalaka.

42 Anaichipa joo chi wayuukai. Nnojolüitpa ajaʼttüin tü nütakat. 43 Nüjüta nümüshia Jesús chi wayuukai sünain nüchiajaain nia sünain maa nümüin:

44 —Nnojo püküjain sümüin wayuu püchiki sünain teiyajüin pia. Puʼuna palajana eemüin chi sacerdotekai süpüla piiʼiyatüinjatüin nümüin tü pütakat süpüla naapüinjatüin nümüin Maleiwa tü pümüʼünüin ouktajatkat saaʼu anaichipain pia, maa aka tü nuluwataakat anain Moisés paala sümaiwa. Je sükajee tia, sütüjaajeechi aaʼu pia wayuu sünain anaichipain pia süpüla saʼakainjachin pia püchikua —nümakalaka Jesús nümüin.

45 Otta chi wayuukai, nnojoishi koʼutüin. Nuʼunakalaka sümaa aküjaa süchiki tü kasa anasü alatakat nüka. Je süka sütüjaaichipain naaʼu Jesús tü wayuukolüirua, nnojoishi ekeroteein suluʼumüin tü pueulokalüirua. Makatüshi nia anooipaʼa eere yüütüülin mmakat. Otta tü wayuukolüirua, antüsü nünainmüin suluʼujee mmakat süpüshua.