Marcos

Tü nekirajakat anain na fariseokana

7 Antüshii noʼutku na fariseokana ooʼulaka na karalouktamaajanakana chajee Jerusalénjee eemüin Jesús. Akotchajaashii naya süpüla arütkawaa nünainmüin, 2 süka neʼnnapüʼüin na nikirajüinkana Jesús natüma sünain ekawaa sümaa moʼlojooin najapü, süka shiain wuleinjatüin atüma sukuaippa wayuu nuʼupala Maleiwa naashin. 3 (Ooʼulaka nakuaippa na fariseokana je na wayuu judíokana napüshua, müleka nnojorule noʼlojooin najapü süpüla wuleinjatüin nakuaippa nuʼupala Maleiwa, nnojoliishii naya eküin. Shiaʼaya nakuaippa na natuushikanairua napüleerua. 4 Tü eküülü nayalajakat metkaaraluʼu, müleka nnojorule noʼlojooin shia, nnojotsü neküin. Je naaʼinrüin wainma nakuaippa na natuushinuukana napüleerua, maa aka noʼlojooin iita, amüchi, wushu, ooʼulaka neinasepala.)

5 Namakalaka joo na fariseokana ooʼulaka na karalouktamaajanakana nümüin Jesús:

—¿Jamüshii na pikirajüinkana moonooinkaʼa naya sümaa tü ekirajünapüʼükat anain waya natüma na watuushinuukana? Nnojoliikalaka noʼlojooin najapü süpüla ekaa, maa aka wayakana, süpüla wuleinjatüin nakuaippa nuʼupala Maleiwa —namakalaka nümüin Jesús.

6 Nüsouktakalaka Jesús namüin:

—Alaayuukana cheje maʼi jia. Lotüsü maʼi nünüiki Isaías jüchiki, chi nünüikimaajachikai Maleiwa, sünain nümüin mayaa:

müsü nünüiki Maleiwa. 8 Jiyouktüin tü nuluwataakat anain Maleiwa süpüla joonooinjatüin sümaa tü shikirajapüʼükat anain wayuu —nümakalaka Jesús namüin.

9 Müshi Jesús namüin:

—¿Jamakalaka shiakaʼa neʼe jaaʼinrüin tü nekirajapüʼükat anain jia na jutuushikana, nnojottaapaʼa shiain joonooin amaa tü nuluwataakat anain Maleiwa? 10 Soto jaaʼin sünain juluwataanüin nütüma Moisés sünain kojutüinjachin jütüma jüshi ooʼulaka jii, je chi eekai eʼrülin wayumüin nümüin nüshi ooʼulaka sümüin nii, oʼutinnajachi aaʼin nia. 11 7:11-12 Otta saashin tü nekirajapüʼükat anain na jutuushikana, eeshii süpüla namüin na wayuukana namüin na kachooinkana naya: “Nnojoleena jia tasülajüin amüin jooluʼu süka taapüitpain shia nümüin Maleiwa”. 12 — 13 Je sükajee tia, juʼwanajaaitpa tü nuluwataakat anain Maleiwa sütümajee juʼunüin süchiirua tü nekirajapüʼükat anain na jutuushikana. Je wainma kasa jaaʼinrüin eekai müin aka tia —nümakalaka Jesús namüin.

Tü yarüttakat atüma sukuaippa wayuu noʼuluʼu Maleiwa

14 Nuuneküin Jesús nachikua na wattakana naalii wayuu nünainmüin sünain nümüin namüin:

—Jaapaja jumaala tanüiki jüpüshua jiyaawataiwa saaʼu tü tekirajeekat anain jia. 15 Nnojotsü shiain yarüttüin atüma sukuaippa wane wayuu nuʼupala Maleiwa tü kasa ekerotkat saanüküluʼupünaa. Shia yarüttaka atüma sukuaippa nuʼupala Maleiwa tü pütchi mojuluʼut ojuittakat saanüküluʼujee je tü kasa mojusü saaʼinrakat. 16 Chi eekai nüshateein tanüiki, anasü jülüjüle naaʼin süpüla niyaawatüinjatüin saaʼu tü tekirajakat anain —nümakalaka Jesús namüin.

17 Shiasa nuʼunapa Jesús suulia tü wattakat saalin wayuu, ekerotshi nia suluʼumüin wane miichi. Nasakirakalaka nia na nikirajüinkana sünain jamaluʼulüin tü nüküjaitpakat achiki sümüin tü wayuukolüirua. 18 7:18-19 Nüsouktakalaka Jesús neʼipajee:

—¿Nnojoliyüttaʼaya jiyaawatüin aaʼu tü tekirajakat anain jiakanaya? Tamüshii paala jia jüchikua: Tü ekerotokot suluʼupünaa saanükü wane wayuu, süleʼeruʼumüinjatü neʼe sünain shiyuʼlaain süchikua suulia. Nnojotsü yarüttüin nukuaippa nuʼupala Maleiwa sütüma süka nnojolüin shikerolüin suluʼumüin tü naaʼinkat —nümakalaka namüin.

(Sütüma tü nümakat Jesús, sütüjaaitpa aaʼu wayuu sünain anain noʼuluʼu Maleiwa tü eküütkat süpüshua süpüla ekünaa.) 19 — 20 Ayatshi Jesús aashajaain namüin:

—Tü pütchi mojuluʼut ojuittakat suluʼupünaa jaanükü, je tü kasa mojusü jaaʼinrakat, shia yarüttaka atüma jükuaippa nuʼupala Maleiwa. 21 Je müleka yarüttüle naaʼin wane wayuu, kachiiruasü naaʼin waneepia kasa mojusü, maa aka aʼluwajirawaa akuaippaa sümaa wayuu jierü otta wane jierü nümaa wane toolo, maa aka aʼluwajaa, maa aka oʼutaa saaʼin wayuu, maa aka amaʼüjawaa sümaa wayuu nnojotkat nuʼwayuusein otta nnojoikai suʼwayuusein, 22 maa aka kachiiruaa aaʼinyüü washirüü, maa aka kanain aaʼinyüü wayuu, maa aka aküjaa alawaa, maa aka yarüttaa aaʼinyüü sümaa jieyuu, maa aka kachumulaa sükorolo wayuu, maa aka mojaa anüiki sümüin wayuu, maa aka pülaa aaʼinyüü suulia wayuu, je maa aka maaʼinyuwaa aaʼin. 23 Süpüshua tü aainjalaa eekai müin aka tüü, naaʼinrüin na wayuukana süka yarüttüin naaʼin. Shia yarüttakaʼaya atüma nukuaippa wane wayuu nuʼupala Maleiwa —nümakalaka Jesús namüin na nikirajüinkana.

Tü sünoulakat wane wayuu nnojotkat judíoin

24 Shiasa mapa süchikijee tia, oʼunüshi Jesús namaa na nikirajüinkana yalajee yala Genesaretjee suluʼumüin tü mmakat kaluʼukot tü pueulokalüirua Tiro ooʼulaka Sidón. Je chaʼaya, nikerotakalaka suluʼumüin wane miichi. Niyouktakalaka süchiki sütüjaainjatüin wayuu naaʼu. Otta isasü nüchiki nunujulaain suulia wayuu nüntapa chaʼaya saʼakamüin. 25 7:25-26 Eekalaka wane jierü kepiasü chaʼaya aashajaasü pütchi griego. Sirofeniciajeʼewat shia. Kaleʼeruʼusü yolujaa süchon tü wayuukot. Je sütüjaapa naaʼu Jesús sünain nüntüin, antüsü shia nünainmüin sünain süsapainyoʼukain nümülatuʼu sünain süchuntüin süka süpüshua saaʼin shiiʼiree nujuittirüinjatüin tü yolujaakat suulia tü süchonkot. 26 — 27 Nümakalaka Jesús sümüin tü jietkat:

—Emirainjana palajana süchooin wane wayuu. Nnojotsü anain müleka saapünüle tü shiküinjatkat sümüin tü etkalüirua —nümakalaka.

28 Sümakalaka nümüin:

—Aa, shiimüin Ekirajüikalee, ayatapajaʼaya neʼe aʼlumujüin chi etkai tü ojutuusükat saaʼujee nemeesain na ekaashiikana —sümakalaka.

29 Nümakalaka Jesús sümüin:

—Tamüsü paala pia: Anakaja müleka püleʼejüle pipialuʼumüin. Anaitpa tü püchonkot saaʼujee tü pümakat tamüin, ojuittüitpa tü yolujaakat suulia.

30 Suʼunakalaka joo tü jietkat shipialuʼumüin sünain eein süpüla tü süchonkot suluʼu suʼula sünain anaitpain shia. Nnojolüitpa tü yolujaakat sünain.

Anashi nütüma Jesús wane wayuu manüisai sümaa macheʼein

31 Shiasa süchikijee tia, nuʼunakalaka Jesús suluʼujee tü mmakat kaluʼukot tü pueulokat Tiro. Alatüshi nia suluʼupünaa tü pueulokat Sidón süpüla nüntüinjachin eemüin tü palaakat Galilea. Je chajee chaʼaya, oʼunüshi nia eemüin tü mma kanüliakat Decápolis. 32 Nüntinnakalaka nünainmüin Jesús wane wayuu macheʼesai. Kapüleesü nümüin aashajawaa. Nachuntakalaka na wayuu antitshiikana nümüin Jesús shiiʼiree niʼitaain najapü nünain süpüla anainjachin nia nütüma.

33 Najattakalaka Jesús chi wayuukai saʼakajee tü wayuukolüirua. Niʼitaakalaka nejepira suluʼu nücheʼe chi wayuukai. Nejetakalaka saaʼu nejepira sünain nushulerüin sünain niyee chi wayuukai. 34 Niirakaakalaka Jesús iipünaamüin nümüin Maleiwa sünain süsanalüin naaʼin. Nümakalaka nümüin chi wayuukai: “Efata”. (“Jutata mata pücheʼe”, maluʼut tia.) 35 Je wanaa maʼi sümaa tia, aapatüjüʼiya je analeesia naashajaaya.

36 Otta müshia Jesús, nüchiajaakalaka na wayuukana suulia naʼwalakajüin süchiki tü neʼrakat. Mayaainje achiajaanüin naya suulia aashajawaa, yootoʼoin müshii süchiki 37 süka ponoin maʼi naaʼin tü neʼrakat. “Anashaatasü maʼi süpüshua tü naaʼinrakat Jesús. Chi eekai macheʼein, kacheʼeshi nütüma. Chi eekai manülin, kanüishi nütüma”, müshii naya sünain yootoʼoin namüin sainküin mma.