Juan
Wayuulaa müshi Cristo
1 Jesucristo, kanüliashi “Pütchi” münüin. Eetüjüʼiya nia paala sümaiwa nnojolüiwaʼaya kasain eein sooʼopünaa tü mmakat. Nümaatüjüʼiya Maleiwa sünain wanaawain nia nümaa. 2 Nümaashi Maleiwa waneepia paala sümaiwa je mayülinjaʼa nia sünain nümawaa.
3 Eʼitaanüshi nia nütüma Maleiwa sümaiwa paala sünain nükumajüinjatüin tü kasakalüirua süpüshua. Nnojotsü kasain eein eekai nnojolüin akumajuushin nütüma. 4 Nia eeʼiranajaaka atüma saaʼin wayuu. Je müshi aka nia saaʼin wane anakia. Maa aka jaʼyain süpüna wayuu sütüma nuwarala chi kaʼikai, akaajaa chi wayuu eeʼiranajaaichipakai aaʼin nütüma, niyaawateerü aaʼu tü shiimüinkat. 5 Maa aka jaʼyain süpüna wayuu wattaʼa maalü jaʼitairü kojoin paala tü piyuushikat, akaweeria tü shiimüinkat ayaawatüneerü aaʼu jaʼitasü joulüin tü aainjalaakat.
6 Shiasa soʼu wane kaʼi, nüntakalaka joo wane wayuu kanüliashi Juain saʼakamüin wayuu. Ajütünüshi nia nütüma Maleiwa 7 süpüla niainjachin aapirüin wayuu süpüshua sünain niweetajachin Cristo, chi anaküinjachikai süpüna wayuu. Otta Juan, nimeʼejakalaka saaʼin wayuu süpüla sünoujainjatüin nünain Cristo, chi nüküjakai achiki namüin. 8 Nnojoishi niain Juan anaküinjachin süpüna wayuu. Nüchikimaajachi neʼe 9 süpüla naapirüinjatüin wayuu nüpüla Cristo sünain niainjachin anaküin süpüna wayuu je sünain nüntajachin maalü saʼakamüin wayuu süpüla niiʼiyatüinjatüin tü shiimüinkat sümüin wayuu süpüshua.
10 Cristo, chi kanüliakai “Pütchi” münüin, antüshi yaa mmoluʼumüin süpüla kepiainjachin saʼaka wayuu. Mayaainje akumajuushin nütüma tü wayuukolüirua je tü kasakalüirua süpüshua yaa saaʼu mmakat, wainma wayuu mochoojokot oʼu nia sünain niain eeʼiyatüinjachin tü shiimüinkat sümüin. 11 Antüshi nia noumainpaʼamüin na nüpüshikana süpüla kepiainjachin nia namaa. Otta mamaneesalii naya nuulia. 12 Eesü wayuu eekai kamaneein nümüin sümaa neʼitaain naaʼin sünain anoujaa nünain. Je sükajee nanoujain nünain, eʼitaanüshii naya nütüma süpüla nayainjanain nüchooin Maleiwa. 13 Nnojoishii nüchooinshiin naya maa aka jemelin sütüma nei ooʼulaka nashi, sükajeejana jeketüin nakuaippa nütüma Maleiwa.
14 Cristo, chi kanüliakai “Pütchi” münüin, wayuulaa müshi süpüla kepiainjachin waʼaka je süpüla niiʼiyatüinjatüin nukuaippa Maleiwa wamüin. Je süka weʼrapüʼüin Jesucristo, chi waneeshikai Nüchon Maleiwa, sünain anashaatain maʼi nia, watüjaa aaʼuchi chi Maleiwakai sünain anashaatain maʼi niaʼaya, sünain anamiashaatain maʼi nia, je sünain pansaain tü nümakat sümüin wayuu.
15 Otta müshia Juan, soʼu wane kaʼi, naapirüin na wayuukana eekana nümaa süchiki sünain nüntüichipain naʼakamüin chi kanüliakai “Pütchi” münüin. Owootooshi sünain nüküjain nüchiki Cristo namüin. Müsü nünüiki: “Nia taküjaka achiki jümüin jooluʼu chi tamapüʼüka jümüin sünain maa: ‘Anteechi tachiiruajee sümaa kojuteechin nia toulia sükajee eetüjülin nia tapüleerua’”.
16 Saaʼu anamiashaatain maʼi Cristo wamüin waya anoujashiikana nünain, ayatshi nia sünain aaʼinraa kasa anasü wamüin. 17 Tü nuluwataakat anain chi Maleiwakai na wayuu judíokana, atüjaana aaʼulu sütüma tü nüshajakat Moisés paala sümaiwa. Akaajasa maaʼulu yaa, tü nukuaippakat chi Maleiwakai sünain anamiashaatain maʼi nia, atüjaana aaʼulu nünainjee Cristo, süka anamiashaatain maʼi nia. Majaʼa aka tü nukuaippakat sünain pansaain nünüiki, atüjaana aaʼulu nünainjee Cristo, süka pansaain nünüiki. 18 Nnojotsü wayuu eekai shiʼrüichin Maleiwa. Otta chi Nüchonkai Maleiwa, chi waneeshikai nüchoin, chi wanaawajiraakai aaʼin nümaa, nia eeʼiyataka nukuaippa Maleiwa wamüin, süka shiimüin sünain niain Maleiwain maa aka naaʼin chi Nüshikai.
Asakinnüshi Juan sünain jaralin nia
19 Soʼu wane kaʼi, nantakalaka wane sacerdote judíoirua ooʼulaka wane nuuʼuliwoʼuirua Leví nünainmüin Juan süpüla nasakirüinjachin nia sünain jaralin nia. Ajütüüshi naya natüma na laülaayuu judíokana chakana Jerusalén. 20 Nnojoijaʼa ayouktüin Juan asouktaa neʼipajee.
—Nnojoishi tayain Cristoin chi Nüneekajalakai Maleiwa —nümakalaka namüin.
21 Nasakirakalaka sünain müleka niale Elías.
—Nnojo, nnojoishi tayain Elías —nümakalaka Juan namüin.
Nasakirakalaka joo nia sünain müleka niale chi Nünüikimaajachikai Maleiwa ajütünajachikai soʼuweena wane kaʼi saʼakamüin wayuu.
—Nnojo, nnojoishi tayain chi wayuukai —müshijaʼa joo nia namüin.
22 —Püküja pümaala wamüin sünain jaralin pia, watüjaaiwa paaʼu, waküjaiwa namüin na kaluwanaajalakana waya pünainmüin —namakalaka nümüin Juan.
23 —Taya chi owoorolooshikai yaaya isashiipaʼa süpüla yapainjatüin tü wayuukolüirua süpüla anoujaa nünain chi Senyotkai —nümakalaka Juan namüin.
Je tü pütchi nüsouktakat aka Juan, shia tü münakat sümaiwa paala nütüma Isaías wane nünüikimaajachikai Maleiwa.
24 Eesü wane wayuuirua fariseo naʼaka na ajütünakana nünainmüin Juan. Naya na judío aʼwaataakana suluʼu nekeraajüin süpüshua saaʼin namüin tü nuluwataakat anain Moisés. 25 Nasakirakalaka nia:
—¿Jamakaʼa puwoutisaajakaʼa wayuu sünain nnojolin piain Cristoin, sünain nnojolin piain Elías, je sünain nnojolin piain chi Nünüikimaajachikai Maleiwa? —namakalaka nümüin Juan.
26 —Tawoutisaajüin neʼe jia süka wüin. Otta eeshi yaa jaʼaka wane wayuu mochoojokai soʼu wayuu sünain niainjachin eeʼiyatüin tü shiimüinkat sümüin. 27 Nia taküjaka achiki jümüin, chi anteechikai tachiiruajee. Nnojoishi wanaapünaain taya nümaa, süka pülashin maʼi nia toulia —nümakalaka Juan namüin.
28 Eejechire nüsakinnüin Juan chajachi suluʼu tü pueulo kanüliakat Betania chaʼaya wane saʼata tü süchikat Jordán chaa wüinpümüin saaʼujee eere nuwoutisaajüin wayuu.
Aküjüshi Juan nüchiki Jesús sünain niain Nüchoin Maleiwa
29 Shiasa mapa wattaʼamüin, niʼrakalaka Juan Jesús sünain nürütkaain nünainmüin. Nümakalaka Juan namüin na wayuu eejanakana nümaa: “Jiirakaa, iseeichi chi wayuu aneekünakai nütüma Maleiwa süpüla nuʼutünajachin aaʼin süpüla nülaʼajaainjatüin saainjala wayuu süpüshua sainküin mmakat, maa akaapüʼü tü anneerü oʼutünapüʼükat aaʼin watüma wayakana judíokana shiiʼiree sülaʼajaanüin waainjala. 30 Nia taküjaka achiki jümüin chi tamapüʼükai jümüin: ‘Anteechi tachiiruajee sümaa kojuteechin nia toulia sükajee eetüjülin nia tapüleerua’. 31 Otta mayaainje nnojolin tatüjaain aaʼu paala sümaa jaralin chi taküjakai achiki, antüshijaʼa neʼe taya süpüla owoutisaajaa jia süpüla niʼnnaajünüinjachin sütüma tü wayuu Israelkalüirua”, nümakalaka Juan namüin.
32 Ayatshi jooluʼu Juan sünain aküjaa süchiki süpüshua tü kasa niʼrakat, sümaa nümüin namüin: “Teʼrüin chi Naaʼinkai Maleiwa sünain ashakataa iipünaajee eejee Maleiwa maa aka saaʼin wane moʼuwa. Antüshi nia nünainmüin Jesús sünain makataleʼeinya nia nümaa. 33 Mayaainje nnojolüin tatüjaain aaʼu paala sümaa jaralin chi taküjakai achiki, tatüjaaichipa aaʼu nia soʼu tü kaʼi nüshakatakat oʼu chi Naaʼinkai Maleiwa naaʼu süka tamünüin paala nütüma chi kajünalakai taya süpüla owoutisaajaa. Müshi nia tamüin: ‘Chi wayuu piʼreechikai sünain nüshakatüin chi Naaʼinkai Maleiwa nünain sümaa makatüin nia nümaa, nia aapajachika chi Naaʼinkai Maleiwa namüin na eekai nanoujain nünain’, müshi. 34 Otta tayakai, sünainjee tü kasa teʼrakat, tountüin jooluʼu taküjain jümüin nüchiki Jesús sünain shiimüin sünain niain chi Nüchonkai Maleiwa”, nümakalaka Juan namüin na wayuukana.
Na piamashiikana nikirajüin Juan, oʼunüshii nümaa Jesús
35 Shiasa mapa wattaʼamüin, aleʼejüshi Juan namaa piamashii na nikirajüinkana eejachire paala naashajaain namaa na wayuukana. 36 Shiasa niʼrapa Jesús nülatüin naʼütpünaa, nümakalaka namüin na nikirajüinkana:
—Jiirakaa, ichaaichi chi wayuu aneekünakai nütüma Maleiwa süpüla nuʼutünajachin aaʼin maa akaapüʼü tü anneerü oʼutünapüʼükat aaʼin watüma wayakana judíokana shiiʼiree sülaʼajaanüin waainjala —nümakalaka.
37 Otta na piamashiikana nikirajüin, sünainjee tü nümakat namüin, noʼunakalaka nüchiirua Jesús. 38 Nujununtaakalaka Jesús nanainmüin. Je niʼrapa na piamashiikana wayuu nüchiirua,
—¿Kasa keeʼireeka jaaʼin? —nümakalaka namüin.
—Rabí, ¿jalashi pia katunkülein? —namakalaka nayakana nümüin. (Otta tü pütchikat “Rabí” makat, “Ekirajüi” maluʼut.)
39 —Jooʼuya jiʼraajaiwa eere tatunkule —nümakalaka Jesús namüin.
Noʼunakalaka nümaa süpüla neʼraajüinjatüin eere nia kepiain. Je saaʼu nantüin aliuukapa kaʼikat chamüin, natunkaakalaka nümaʼana.
40 Waneeshia chi aapüshikai paala nünüiki Juan sümaa noʼunüin nümaa Jesús, kanüliashi Andrés, nimülia wane wayuu kanüliashi Simón Pedro. 41 Je mapa nuʼunapa Andrés nipialuʼujee Jesús, oʼunüshi yaawalajaʼa nünainmüin chi nipayakai sünain maa nümüin:
—Wantüichipa anain chi Mesíaskai. (Otta tü pütchi “Mesías” makat, “Cristo Nüneekajalakai Maleiwa” maluʼut.)
42 Naanejaakalaka joo Andrés chi nipayakai nünainmüin Jesús. Niirakaataalakalaka Jesús nümüin Simón sünain nümüin nümüin:
—Simón, pia nüchonkai Jonás, teʼitaainjatü jooluʼu wane anüliee pünain, Cefas müsü. (Tü anüliee “Cefas” süka pütchi griego, “Pedro” maluʼut.)
Eenakünüshii Felipe ooʼulaka Natanael nütüma Jesús
43 Shiasa mapa wattaʼamüin: “Anashi toʼunüle suluʼumüin tü mmakat Galilea”, müsü naaʼin Jesús. Je süpülapünaa nuʼunüin chamüin, nüntakalaka nünainmüin wane wayuu kanüliashi Felipe. Nümakalaka nümüin:
—Jooʼuya tamaaiwa pia.
44 Chi Felipekai anülia, chajeʼewai nia suluʼu tü pueulokat Betsaida wanaa namaa Andrés ooʼulaka Pedro. 45 Je mapa, nüntakalaka Felipe nünainmüin wane nütünajut kanüliashi Natanael. Nümakalaka nümüin:
—Wantüichipa anain chi nüshajapüʼükai achiki Moisés, chi nashajapüʼükai achiki na nünüikimaajanakana Maleiwa. Nia chi Jesúskai anülia, chajeʼewaikai suluʼujee tü pueulokat Nazaret, chi nüchonkai José —nümakalaka.
46 —¿Jeratuairü ajuittüin kasa anasü sünainjee wayuu eekai müin aka saaʼin tü wayuuirua kepiakat Nazaret eekai nnojolüin kasain anain apüla? —nümakalaka Natanael.
—Jooʼuya piʼraajaiwa Jesús —nümakalaka Felipe nümüin.
47 Otta müshia Jesús, wanaa sümaa niʼrüin Natanael nüpanapa, nümakalaka namüin na eekana nümaa:
—Iseeichi wane wayuu loto akuaippachi, napüshi na wayuu Israelkana, nuuʼuliwoʼu chi Israelkai anülia —nümakalaka.
48 —¿Jamüshi pütüjaakaʼa taaʼu? —nümakalaka Natanael nümüin Jesús.
Asouktüshi Jesús:
—Teʼrüin pia joyotüin sheemioushi tü wunuʼu “higuera” münakat, nnojoliiwaʼaya peenakünüin nütüma Felipe —nümakalaka nümüin.
49 —Ekirajüikalee, tatüjaaichipa aaʼut pia jooluʼu sünain piaʼinya chi Nüchonkai Maleiwa, je sünain piaʼinya chi Aluwataashijaikai waaʼu wayakana na wayuu Israelkana —nümakalaka Natanael nümüin Jesús.
50 Nüsouktakalaka Jesús:
—Anoujaichipa neʼe pia tanain sükajee taküjüin püchiki sünain teʼrüin pia joyotüin sheemioushi tü wunuʼu “higuera” münakat. Je jooluʼu, eʼreechi pia kasa eekai sülanaʼaleein sünain anain suulia tüü —nümakalaka nümüin Natanael.
51 Aashajaashi jooluʼu Jesús namüin na wayuukana napüshua:
—Shiimüin tü tamakat jümüin: Jiʼreena na aapieekana sünain nashakatüin chajee iipünaajee eejee Maleiwa yaa tanainmüin tayakai chi Shipayakai Wayuu je sünain naliikajaain nachikua chamüin —müshi nia namüin.