Juan
Nukuaippa chi anneetpüʼü shiimüinshikai
10 Ayatshia aashajaain Jesús namüin na laülaayuu judíokana sünain nümüin namüin: “Shiimüin tü tamakat jümüin: Chi wayuu oototkai shiinaluʼupünaa sükulaatse anneerü, nnojoikai ekerolüin soʼuluʼupünaa, kaʼruwarai. 2 Aluʼujasaʼaya chi eekai nikerolüin soʼuluʼupünaa, niaʼaya chi shiimainkai anneetpüʼüin. 3 Ajutannüsü soʼu tü kulaatkat nüpüleerua. Je tü naʼanneetsekat, shiʼraajüin nünüiki neenajapa süka sünülia süpüla nikeʼerüin nüpüleerua. 4 Je nikeʼetpa shia, oʼunüsü süpüshua nümaa eepünaale shia nütüma süka shiʼraajüin nünüiki. 5 Aluʼujasa sümüin wayuu eekai naatajatüin, nnojoleerü oʼunüin sümaa süka nnojolüin shiʼraajüin sünüiki, aʼwalakajaweerü süpüleerua”, nümataalakalaka Jesús namüin. 6 Aashajaashi joo Jesús süka sukuaippa tü kasa eʼnnaajünakat sainküin mma süpüla niiʼiyatüinjatüin namüin na laülaayuu judíokana sünain nnojoliin naya müin aka naaʼin niakai sünain ekirajaa tü shiimüinkat sümüin wayuu. Otta nnojotkalaka nayaawatüin saaʼu jamaluʼulüin tü nüchikikat chi anneetpüʼükai nüküjaitpakat namüin.
Jesús, müshi aka naaʼin wane anneetpüʼü eekai anamiain maʼi
7 Nümakalaka Jesús namüin nüchikua süka nnojolüin nayaawatüin saaʼu na laülaayuu judíokana tü nikirajeekat anain: “Shiimain tü tamakat jümüin: Tayakai, müshi aka saaʼin wane soʼu sükulaatse anneerü. 8 Tü wayuu antakalüirua tapülapünaa, na aküjakana alawaa, müshii aka saaʼin kaʼruwaralii napüshua. Je tü anneetkalüirua, nnojotsü shiyaawatüin aaʼu nanüiki. 9 Tayakai, müshi aka saaʼin soʼu sükulaatse anneerü süka shikerolüin wayuu tanainjee nümaʼanamüin Maleiwa. Je chi eekai nünoujain tanain, aapüneerü nümüin nütüma Maleiwa süpüshua tü cheʼojaakat nümüin. 10 Chi kaʼruwaraikai, antüshi neʼe süpüla aʼluwajaa anneerü je oʼunaʼalaa saaʼin tü mürütkalüirua. Akaajasa tayakai, antüshi taya süpüla shiiʼiranajaainjatüin saaʼin wayuu tatüma süpüla eeinjatüin waneepia nümaa Maleiwa”, nümataalakalaka Jesús namüin.
11 Aashajaashi Jesús nüchikua namüin: “Tayakai, müshi aka naaʼin wane anneetpüʼü eekai anamiain maʼi, chi nnojoikai mmolüin seema ouktaa saaʼujee aaʼinmajaa naʼanneetse. 12 Akaajasa chi aaʼinmajiruushikai neʼe saaʼu neerü, nnojoishi müin aka naaʼin chi kaʼanneetseshikai. Müleka süntüle wane unaalü sünainmüin, nüpünaajeerü tü anneetkalüirua. Aʼwalakajaa meeria sainküin mmakat, shika sümeeria tü unaatkat. 13 Nüpütapünaain tü anneetkalüirua süka maalin shia nüpüla saaʼu nnojolüin nümüʼünüin, aʼyataashin neʼe nia saaʼu neerü.
14 “Saaʼu müin aka taya naaʼin wane anneetpüʼü eekai anamiain maʼi, teʼraajüin tü taʼanneetsekalüirua je neʼraajüin taya, 15 maa aka niʼraajüin taya chi Tashikai je teʼraajüin niaʼaya. Je yapashi taya süpüla aapajirawaa tekii süpüla ouktaa saaʼu tü taʼanneetsekalüirua. 16 Eeshiʼiya wane anneerüiruayaʼa waneejannuu. Tantireena nayaʼaya tanainmüin süpüla noonooinjanain sümaa tanüiki. Kotteeshii tatüma na taʼanneetsekana napüshua süpüla naaʼinmajünüinjanain tatüma tamüiwa, tayakai chi napüʼüyakai.
17 “Aishi maʼi taya nüpüla chi Tashikai saaʼu taapajiraainjachin tekii süpüla ouktaa saaʼu tü taʼanneetsekalüirua. Je osoʼiraweerü taaʼin süchikijee ouktaa. 18 Taapajiraain tekii süka taaʼin tamüiwa süpüla ouktaa, nnojotsü sükajeejachin oʼutünaa aaʼin sütüma wayuu. Laülaa taya tamüiwa süpüla aapajirawaa tekii ooʼulaka süpüla osoʼirawaa aaʼin, süka shiain aluwataana anain taya nütüma chi Tashikai”, nümataalakalaka Jesús namüin.
19 Otta müshiʼiya na laülaayuu judíokana sütüma tü nümakat Jesús, aʼülüjaajiraashii naya nachikua.
20 —Mamainnashi nia sütüma kaleʼeruʼuwaa yolujaa. Nnojotsü anain süpüla waapajüin nünüiki —müshii wainma na laülaayuukana.
21 Otta sünüiki waneeirua:
—Wane wayuu eekai kaleʼeruʼuin yolujaa, nnojotsü aashajaain pütchi eekai müin aka tüü. Je wane yolujaʼaya, nnojotsü anain wane wayuu eekai moʼuin sütüma —müshii naya.
Aʼürülaashii maʼi waneeirua laülaayuu judío nünain Jesús
22 Wanaa sümaa alin jemiai chaa Jerusalén, oʼttüsü wane miʼiraa natüma na judíokana chaʼaya süpüla sotüinjatüin naaʼin wanaa sümaa süikkaleʼennüin süchikua paala tü aʼwaajüleekat Maleiwa. 23 Warai müshi Jesús suluʼu tü aʼwaajüleekat Maleiwa suupünaapünaa tü luma eʼitaanakat anain nünülia Salomón. 24 Narütkaakalaka wane laülaayuu judíoirua nünainmüin süpüla nooʼulaküin naaʼin. Nasakirataalakalaka nia:
—¿Jamüshi pia kamaʼakaʼa maʼi süpüla aküjaa wamüin sünain jaralin pia? Müleka shiimüinre sünain piain Cristoin chi Nüneekajalakai Maleiwa, püküjaa wamüin süka pütchi eekai jaʼyashin —namakalaka nümüin Jesús.
25 Nüsouktakalaka Jesús namüin:
—Taküjüitpaʼasa jümüin sünain tayain Cristoin, otta jiakana, nnojotsü kapülain jaaʼin tanüiki. Tü kasa anasü taaʼinrakat, tü aluwataanakat anain taya nütüma chi Tashikai, tü nütüjakat apüleerua nümüiwa, shiiʼiyatüin jümüin takuaippa. 26 Masütaajukaʼa jia sünain manoujain tanain, shia süka nnojoliin taʼanneetsein jia. 27 Otta na taʼanneetsekana, teʼraajüin naya je oʼunüshii tamaa süka neʼraajüin tanüiki. 28 Eeʼiranajaaitpa naaʼin tatüma süpüla eeinjanain naya nümaa Maleiwa waneepia. Müina nnojoliin amüloulin naya. Je nnojotsü jaralüinjatüin asütüin naya tajapuluʼujee. 29 Saaʼu naapajalain naya tamüin chi Tashikai, chi alanaʼaleekai sünain pülashin suulia kasakat süpüshua, nnojoruleejaʼa nasütünajanain najapuluʼujee. 30 Tü takuaippakat, aʼaniraasü nümaa chi Tashikai, akaajaa tü nukuaippakat tamaa —nümakalaka Jesús namüin.
31 Na laülaayuu judíokana, naapaakalaka ipa nachikua süpüla naʼinaʼalüinjachin nia. 32 Nümakalaka joo Jesús namüin:
—Tountüin taaʼinrüin nütüma chi Tashikai kasa wainma eekai anashaatain maʼi juʼupala, tü nütüjakat apüleerua niakai nümüiwa. ¿Jaratkaʼa juʼuteein anainjee taaʼin süka ipa? —nümakalaka namüin.
33 Nasouktakalaka nümüin:
—Nnojoishi waʼiteein pia süka ipa saaliijee paaʼinrüin kasa eekai anain, saaliijeejatü eʼrülin wayumüin pia sümaa pünüiki “Tayaʼaya Maleiwa” pümüin sümaa wayuuin neʼe pia —namakalaka nümüin.
34 10:34-35 Nüsouktakalaka Jesús namüin:
—Pansaasü tü karaloukta nüchikimaajatkat Maleiwa. Soto jaaʼin tü nümakat chi Maleiwakai ashajünakat suluʼu nütüma Moisés sünain “maleiwa jia” nümüin. Saaʼu “maleiwa” namünüin na wayuu kamüinjanakana tü pütchikat, 35 — 36 ¿jamakaʼa joo mojushiikaʼa jümüin “Nüchon taya Maleiwa” tamüin jümüin? Nnojotsü teʼralain wayumüin tia nümüin Maleiwa. Tayakai, akatannüshi nütüma Maleiwa süpüla nüjütüinjachin taya saʼakamüin wayuu. 37 Müleka nnojorule taaʼinrüin tü naaʼinrakat chi Tashikai, anasüjaʼa suluʼu nnojorule kapülain jaaʼin tanüiki. 38 Akaajasa taaʼinrüle shia, jaʼitaichi jiyouktüin taya, anakaja müleka kapürale jaaʼin tü taaʼinrakat juʼupala süpüla jiyaawatüinjatüin saaʼu sünain saʼaniraain nukuaippa chi Tashikai tamaa je saʼaniraain takuaippa nümaʼaya —nümataalakalaka Jesús namüin.
39 Nataʼüleekalaka nachikua Jesús, akaisa isain nia noulia.
40 Aleʼejaa müshia Jesús chamüin waneemüin saʼata tü süchikat Jordán eejechire paala Juan sünain owoutisaajaa wayuu. Je saaʼu makatüin Jesús chaʼaya, 41 antapaayaa müsü wayuu wainma nünainmüin sünain sümajiraain nüchiki mayaa:
—Mayaainje nnojolüin naaʼinrüin Juan wane kasa anasü nütüjakat apüleerua Maleiwa nümüiwa, shiimainshaana tü nümapüʼükat nooʼopünaa Jesús —namakalaka.
42 Je chaʼaya, anoujasü wainma wayuu nünain Jesús.