Juan
Nuʼwanajaain Jesús tü wüinkat sünain wiinoin
2 1:1-2 Piama kaʼi süchikijee naashajaain Jesús nümaa Natanael, antüshi nia namaa na nikirajüinkana Galileamüin. Neenajinnakalaka namaa na nikirajüinkana ooʼulaka tü niikat sünainmüin wane miʼiraa shikiira kaʼwayuusee suluʼu tü pueulo kanüliakat Caná. 2 — 3 Shiasa shiʼrapa tü niikat Jesús sünain sajaʼttalaa sümüin tü wiinokat, sümakalaka nümüin:
—Ajaʼttüsü tü asüüshikat.
4 Asouktüshijeseʼe Jesús sümüin:
—Maachee, nnojo pikerotirüin taya sünainpünaa tüü. Nnojoyülia antüin takalia —nümataalakalaka sümüin tü niikat.
5 Sümakalaka joo tü niikat namüin na nüchepchiakana chi emiʼijitshikai:
—Anakaja jaaʼinrüle tü nümeetkat jümüin chi tachonkai.
6 Je yala eejatü aippiruasü tünaasha maluʼusat, sütapüʼükat tü wüin süpülajatkat naaʼinrüin tü kasa wuleinjatkat akajee nakuaippa nuʼupala Maleiwa. Je tü tünaashakat, kettatsü maa aka aippirua pasaana wüin suluʼu waneesia. 7 Nümataalakalaka joo Jesús namüin na achepchieekana:
—Jipiraja wüin tüü.
Nepirajakalajaʼaka shia sünain piratashaatain maʼi natüma.
8 Nümakalaka Jesús namüin:
—Je jooluʼu, jajaʼita süpüshi türa asüüshikat jiʼikajaaiwa nümüin chi emiʼijitshikai. Neʼikajaakalajaʼaka shia nümüin. 9 Nuuʼulakakalaka seʼejü tü asüüshikat. Süka wiinoitpain shia, nnojotsü nütüjaain aaʼu sünain wüiin neʼe paala shia, je nnojotsü nütüjaain aaʼu jalajeejatüin shia. Naya atüjaaka neʼe saaʼu na achepchiee epirajakana paala tü tünaashakat süka wüin. Chi emiʼijitshikai, neenakakalaka nünainmüin chi kaʼwayuuseshikai, 10 sünain nümüin nümüin:
—Sukuaippa sütüma wayuu süpüshua sünain wane miʼiraa, shia asülajünaka palajana tü wiino jemetüsükat. Je mapa süchikijee payutpa tü antüsükalüirua, asülajünüsü tü wiino mejeʼejütsükat namüin. Otta pütüma piakai, pünaajüin tü jemetüsükat süpüla asülajünaa chiirua —müshi.
11 Tü naaʼinrakat Jesús suluʼu tü pueulokat Caná suluʼu tü mmakat Galilea, shiimüin sünain shiain tü nütüjakat apüleerua Maleiwa nümüiwa. Nnojotsü naaʼinrüin paala suʼupala wayuu wane kasa eekai müin aka tia. Naaʼinrüin shia süpüla niiʼiyatüinjatüin nukuaippa namüin na nikirajüinkana süpüla natüjaainjachin naaʼu sünain wanaawain nia nümaa Maleiwa sünain anashaatain maʼi. Je na nikirajüinkana, neʼitaain naaʼin sünain nanoujain nünain süka neʼrüin tü naaʼinrakat.
Nujuittirüin Jesús na oikkaaliikana suluʼujee tü aʼwaajüleekat Maleiwa
12 Shiasa mapa süchikijee tü miʼiraakat suluʼu tü pueulokat Caná, oʼunüshi Jesús sümaa tü niikat je namaa na nuwalayuukana je na nikirajüinkana chamüin suluʼumüin tü pueulo kanüliakat Capernaum süpüla chainjanain naya chaʼaya kojuya kaʼi.
13 Je sülüʼülapa sükalia tü miʼiraa kanüliakat “Pascua” münüin, tü nemiʼirakat na judíokana, oʼunüshi Jesús chamüin chaʼaya Jerusalénmüin süpüla eʼrajaa sukua tü miʼiraakat. (Otta tia miʼiraakat, shia süpülajatü sotüinjatüin naaʼin na judíokana wanaa sümaa nojuittinnüin paala sümaiwa na natuushinuukana nütüma Maleiwa suluʼujee tü mmakat Egipto.)
14 Je nüntapa Jesús Jerusalénmüin, nikerolokoloko suluʼumüin süpaatiase tü aʼwaajüleekat Maleiwa eere nüntüin sünain wane wayuuirua oikkaannuu paaʼa, anneerü, ooʼulaka wuchii toomasü süpüla suʼutinnajatüin aaʼin sütüma tü wayuukolüirua nümüin Maleiwa. Je eesü nüpülaya wane aʼwanajaalüirua neerü yaa joyotüin süʼütpaʼa tü nemeesainkat. 15 Nükumajataalakalaka Jesús wane jiiku lakta süpüla niipiijüinjatüin na wayuukana napüshua ooʼulaka tü mürütkalüirua, paaʼa je anneerü, suluʼujee süpaatiase tü aʼwaajüleekat. Nuʼwalakajakalaka nanneetse na aʼwanajüliikana neerü sümaa nujunaain tü nemeesainkat. 16 Nümakalaka Jesús namüin na oikkaashiikana wuchii toomasü: “Jujuittira tü wuchiikalüirua yaajee yaa. Nnojotsü oikkaaleein nipia chi Tashikai jüpüla”.
17 Je neʼrapa na nikirajüinkana tü naaʼinrakat Jesús, sotüsü naaʼin tü ashajünakat paala nüchiki suluʼu tü karaloukta nüchikimaajatkat Maleiwa, sünain müin mayaa: “Keeʼireesü maʼi taaʼin shiiʼiree kojuteein tü pipiakat sütüma tü wayuukalüirua”, müsü.
18 Otta na laülaayuu judíokana, sütümajee tü naaʼinrakat Jesús suluʼu süpaatiase tü aʼwaajüleekat Maleiwa, nasouktakalaka nümüin:
—Süpüla watüjaainjachin paaʼu sünain shiimüin eʼitaaushin pia nütüma Maleiwa süpüla tü paaʼinrüitpakat yaaya, anakaja müleka paaʼinrüle jooluʼu woʼupala wane kasa nütüjakat apüleerua Maleiwa nümüiwa —namakalaka nümüin Jesús.
19 Asouktüshi Jesús namüin:
—Müinka jujuttirüle jooluʼu aʼwaajüleekat tüü, tatameʼereerü shia süchikua soʼu apünüin kaʼi —nümakalaka namüin.
20 Namakalaka nümüin Jesús:
—Atak, pienchi maʼi shikii juya aippiruamüin naʼyataain na watuushinuukana sünain akumajaa tü aʼwaajüleekat Maleiwa. Je piakaiche maʼi, kaalapeechin pütamateʼerüinjatkaʼa shia soʼu apünüin kaʼi paajüin —namakalaka nümüin. 21 2:21-22 (Je mapa süchikijee süsoʼiraain naaʼin Jesús, sotüsü naaʼin na nikirajüinkana tü pütchi nümakat paala namüin na judíokana sünain nayaawatüin saaʼu sünain shiain tü niʼirukukat naashajaain achiki Jesús wanaa sümaa naashajaain süchiki tü aʼwaajüleekat Maleiwa. Je sükajee tia, nanoujain süpüshua tü ashajuushikat nüchiki suluʼu tü karaloukta nüchikimaajatkat Maleiwa je süpüshua tü nümapüʼükat Jesús namüin.) 22 —
23 Otta müshia Jesús, wanaa sümaa niʼrajüin sükua tü miʼiraakat kanüliakat Pascuain chaʼaya Jerusalén, naaʼinrüin suʼupala tü wayuukolüirua kasairua nütüjakat apüleerua Maleiwa nümüiwa süpüla niiʼiyatüinjatüin sümüin sünain nüjünalain nia Maleiwa. Je wainma tü wayuukolüirua, sünainjee neʼe tü shiʼrakat, anoujaitpa nünain. 24 Otta müshia Jesús, nnojoishi maʼi ataralaain namaa na wayuukana, süka nütüjaain saaʼu nanoujain neʼe sünainjee naaʼinrüitpain kasa anasü noʼupala. 25 Nnojotsü cheʼojaain süküjünüin nümüin jamüin sukuaippa wayuu, süka nütüjaatüjülüinya saaʼu.