Filipos
Ashataa nukuaippa Cristo sünain nnojolüin kapülain neʼe naaʼin nukuaippa nümüiwa
2 Talatüsü maʼi taaʼin jütüma, süka jüchecherüin jaaʼin waneepia sünain anoujaa sütümajee saʼaniraaitpain jukuaippa nümaa Cristo. Tatüjaa aaʼulu sünain jükaaliijünüin waneepia nütüma wanaa sümaa mojuin jaaʼin, süka alin maʼi jia nüpüla. Tatüjaa aaʼulu sünain wanaawajiraain jaaʼin nümaa chi Naaʼinkai Maleiwa, je sünain jümüliajüin na juwalayuukana eekai müliain. 2 Je jooluʼu, süpüla kooʼomüinjatüin tü talataa eekat tamaʼana, tachuntüin jooluʼu jümüin süka süpüshua taaʼin süpüla paaʼinwainjanain jia otta müsia süpüla aijiraainjanain jia jüpüla sünain jiʼyataain nümüin chi Senyotkai. 3 Tü kasa anasü jaaʼinrakat sümüin wayuu, nnojo jaaʼinrüin shia süpüla juʼwaajüneein süka ooʼulaka süpüla juʼwaataainjanain suluʼu sümaa pülayaain jaaʼin suulia wayuu. Je nnojo yaletayaain jukuaippa suʼupala wayuu. Shia anaka aluʼu kojutule napüshua na juwalayuukana jütüma. 4 2:4-5 Meeshii aka jia naaʼin Cristo Jesús sünain kapülain jaaʼin nakuaippa na juwalayuukana, nnojo kapülain jaaʼin jukuaippa neʼe jümüiwa. Anuu wane jayeechi aküjünakat aluʼu nüchiki Cristo: 5 —
6 Mayaainje wanaawain nukuaippa Cristo nümaa Maleiwa,
nnojotsü kachiiruain naaʼin laülawaa wanaa nümaa.
7 Nnojolüitpa kasajatüin nümüin kojutüinjachin wanaa nümaa Maleiwa.
Shia keeʼireeka naaʼin wayuuinjachin nia,
maa aka naaʼin achepchiaa süpüla nükaaliijain waya.
8 Je sünain wayuuin nia,
nnojoishi yaletayaain nukuaippa suʼupala wayuu, ayatshia jüüjüüin nümüin Maleiwa sünain ouktajachin nia.
Mayaainje mojutajachin nia sünain oʼutinnaa aaʼin sünain wane kuruusa,
nnojotsü niyouktüin tü nüchekakat Maleiwa nüpüleerua.
9 Je saaʼujee tü naaʼinrakat Cristo,
eʼitaanüshi nia nütüma Maleiwa süpüla kojutüinjachin sütüma wayuu süpüshua.
Aapünüsü laülawaa nümüin sünain kojutüinjachin nia sütüma wayuu
noulia napüshua na sülaülashiikana mmakat,
otta suulia kasakat süpüshua eekai eein.
10 Nücheküin chi Maleiwakai süpüleerua süsapainyoʼukainjatüin wayuu süpüshua nümülatuʼumüin Cristo
sünain neeʼiyatüin sünain kojutüinjachin nia natüma,
na eekana katüin oʼu maaʼulu yaa
ooʼulaka na ouktüinapakana,
otta müshiʼiya natüma na aapiee chakana iipünaa.
11 “Pia Wasenyotseka”, meena napüshua nümüin Jesucristo
sümaa naʼwaajeenain chi Washikai Maleiwa sükajee tia.
Na anoujashiikana, shia neeʼiyateeka nünüiki Maleiwa sünain anain maʼi
12 Tawalayuwaa, aishiikana maʼi tapüla, jaʼitaichi nnojolin taya jümaa maaʼulu yaa, tatüjaa aaʼuchii jia sünain joonooin sümaa tanüiki maa aka paala wanaa sümaa chajachin taya jümaa. Anakaja jooluʼu ayatüle jia sünain jaaʼinrüin süpüshua tü kasa nüchekakat Maleiwa jüpüleerua sümaa kojutüinjachin nia jütüma süpüla sütüjaainjatüin wayuu jaaʼu sünain shiimüin sünain juʼtteʼennüin. 13 Nia Maleiwa nümüiwa juuntakai atüma aaʼinraa tü kasa anasü nüchekakat jüpüleerua, maa aka saaʼin tü keeʼireekat jaaʼin sünain tü talatakat atüma naaʼin. 14 Jaaʼinra süpüshua tü nuluwataakat anain sümaa nnojolüin mojujiraain jünüiki je sünain nnojoliin jüʼülüjiraain, 15 süpüla lotüinjatüin jukuaippa suʼupala wayuu. Je sükajee nnojolüin jaaʼinrüin tü kasa yarüttakat atüma jaaʼin, maa aka saaʼinrakat süpüshua wayuu eekai manoujain, atüjaaneena aaʼu jia sütüma wayuu sünain nüchooin jia Maleiwa. Meena aka jia saaʼin tü jolotsükalüirua chakat iipünaa chuwatuuin saʼakapünaa tü piyuushikat, 16 sükajee jiiʼiyatüin sümüin wayuu sünain anain maʼi tü nünüikikat chi Maleiwakai katakat atüma oʼuu. Je soʼu tü kaʼi nüleʼejajatkat oʼu Cristo, aʼwaataajeechi taya suluʼu nnojolüin sümalajaain tü taʼyataainkat jaʼaka. 17 Jaʼitashi taya oʼutinneechin aaʼin je amüleerüin tasha atümawaa saaʼu takaaliijain jia sünain tü jünoulakat, müleka katsüinre jaaʼin teʼrüin sünain anoujaa, ayateechi taya sünain talatüin taaʼin. 18 Je anakaja müleka talatüle jaaʼin wanaa tamaa jaʼitashi taya oʼutinnüin aaʼin.
Ajütüneechi Timoteo süpüla analawaa namüin na anoujashiikana
19 Anasü saaʼin tamüin tajütüle Timoteo maalü jünainmüin, müleka nücheküle chi Senyotkai Jesucristo, süpüla jütütülaainjanain aaʼin. Tacheküin taaʼinyaka taapeein jüchiki süpüla tatütülaainjachin aaʼinya. 20 Nnojoishi eein tamaa wane wayuu makai aka naaʼin Timoteo, eekai kapülain maʼi naaʼin süpüshua tü kasa anasü aamüinjatkat jümüin. 21 Na wayuukana yaakana yaa, shia kapülaka neʼe naaʼin nakuaippa namüiwa, nnojotsü kapülain naaʼin nukuaippa Jesucristo. 22 Jütüjaa aaʼuchi Timoteo sünain lotüin maʼi nukuaippa nuʼupala Maleiwa. Maa aka wane wayuu eekai niʼyataain nümaa nüshi, akaʼaya nia tamaa sünain aküjaa nüchiki chi Oʼtteʼerüikai. 23 Je sükajee tia, tacheküin tajütüinjachin nia jünainmüin. Tajütamaateechi nia tatüjaapa saaʼu takuaippa, müleka tojuittinnajachire je müleka toʼutinnajachire aaʼin. 24 Müleka nücheküle chi Maleiwakai tapüleerua sünain tajuittinnüin, tatüjaa aaʼulu sünain toʼunamaateechin jünainmüin.
Ajütüneechi Epafrodito nüchikua Filiposmüin
25 Otta müsia jooluʼu, anasü saaʼin tamüin müleka nüleʼejüle nüchikua jünainmüin chi wawalakai Epafrodito, chi jüjütakai paala tanainmüin süpüla naaʼinmajüin taya. Aʼyataashi nia tamaa nümüin chi Senyotkai sünain eejiraain waya nuulia chi Kamaʼüraikai. 26 Niʼreein maʼi jia je shapaasü maʼi naaʼin süka jaapüin nüchiki sünain ayuulin. 27 Shiimüin sünain ayuulin nia paala, mayeinshi maʼi. Otta chi Maleiwakai, nümüliajüin nia sümaa niiyajüin. Je sükajee tia, nümüliajüin tayakaʼiya suulia kooʼomüinjain mojuu aaʼin tamüin. 28 Saaʼu anaichipain nia, anasü saaʼin tamüin müleka tajütamaatüle nia nüchikua jünainmüin süpüla talatüinjatüin jaaʼin nümaa jiʼrapa nia je süpüla nnojolüinjatüin shapaain taaʼin jaaʼu. 29 Saaʼu nünoujiraain wanaa jümaa nünain chi Senyotkai, anakaja müleka kamaneere jia nümüin sümaa talatüin maʼi jaaʼin nümaa. Anakaja kojutüle jütüma wayuu eekai müinya aka nia. 30 Saaʼu niʼyataweein maʼi nümüin Cristo, mayaashije ouktajachichin nia sünainjee naaʼinmajüin taya, ayatsia naaʼinrüin tamüin tü kasa anasü isakat jüchiki süka wattain jia toulia.