Filipos
Asoʼinna aaʼinchii na anoujashiikana nütüma Pablo
4 Tawalayuwaa, jia aishiikana tapüla, jia teʼreekana maʼi, jia talatashaatakana atüma taaʼin, jia taʼwaataakana aluʼu, sünainjee süpüshua tü tashajüitpakat jümüin, jüchechera jaaʼin sünain anoujaa nünain chi Senyotkai.
2 Je jooluʼu, jia tawalayuu Evodia ooʼulaka Síntique, tachuntüin jümüin süpüla anajiraainjanain jia jüchikua saaʼu saʼaniraaitpain jukuaippa nümaa chi Senyotkai. 3 Otta pia tatünajutkai aʼyataajiraakai waneepia tamaa, tachuntüin pümüin süpüla pükaaliijainjanain na jieyuukana süpüla anajirawaa nachikua. Pütüjaa aaʼuna naya sünain naʼyataajiraapüʼüin tamaa süka süpüshua naaʼin sünain aküjaa nüchiki chi Oʼtteʼerüikai. Sotüshii jia taaʼin jüpüshua, maa aka chi wawalakai Clemente ooʼulaka napüshua na aʼyataajiraapüʼükana tamaa. Tatüjaa aaʼuna jiakana jüpüshua sünain shiimüin süshajünüin tü jünüliakalüirua chaʼaya suluʼu tü karaloukta kaluʼukat nanülia na wayuu eeʼiranajaainapakana aaʼin nütüma Cristo.
4 Otta müshiʼiya jiakana jüpüshua, saaʼu saʼaniraaitpain jukuaippa nümaa chi Senyotkai, tasoʼira aaʼinchii jia süpüla talatüin maʼi jaaʼin waneepia. Tamüshii paala jia jüchikua: Talata jümata jaaʼin. 5 Je sükajee jütüjaain saaʼu sünain sülüʼülüin nükalia chi Senyotkai süpüla nüleʼejüin, anakaja müleka ayatüle jia sünain kamaneein sümüin wayuu süpüshua.
6 Nnojo jüshapataain aaʼin sooʼopünaa wane kasa. Shia jaaʼinra achuntaa nümüin Maleiwa sooʼopünaa kasa süpüshua. Jüküja nümüin tü shapaakat atüma jaaʼin. Otta nnojo motüin jaaʼin aapaa analuʼut nümüin saaʼu tü anasü naaʼinrakat jümüin. 7 Müleka masütaajule jia sünain achuntaa nümüin Maleiwa, aapüneerü wane anaa jümüin nütüma. Isasü wachiki wayaawatüin saaʼu tia anaa naapakat wamüin, saaʼu wayuuin neʼe waya. Otta sükajee saʼaniraaitpain wakuaippa nümaa Cristo Jesús, jutateena waya suulia shapawaa aaʼin je suulia jülüjaa aaʼin kasa mojusü wanaa sümaa anain waya nütüma.
8 Tawalayuwaa, alüʼütsü jooluʼu süpüla kettaain tü tashajakat jümüin. Tasoʼira aaʼinchii jooluʼu jia süpüla masütaajuinjanain jia sünain jülüjaa aaʼin tü anasükat: maa aka tü shiimüinkat, maa aka tü kasa anasü kojutkat sütüma wayuu, maa aka tü lotokat atüma wakuaippa, maa aka tü wulekat atüma waaʼin, maa aka tü kasa anasü kamalainkat wamüin, maa aka tü waʼwaataakat saaʼu anain maʼi shia. 9 Je sükajee jiyaawatüin saaʼu tü tekirajakat anain jia, anakaja müleka jüshatüle tü takuaippakat. Jaaʼinra tü taaʼinrakat, tü jiʼrapüʼükat, je joonoo sümaa tü tekirajakat anain, tü jaapapüʼükat. Je chi Maleiwakai aapakai jümüin anaa, eeweechi jümaa waneepia.
Aapüshi Pablo analuʼut saaʼu nükaaliijünüin natüma na anoujashii chakana Filipos
10 Jiiʼiyatüitpa süchikua tamüin sünain jaaʼinmajeein taya süka saʼaniraaitpain wakuaippa nümaa chi Senyotkai. Alanaʼaleesia maʼi jooluʼu sünain talatüin taaʼin sükajee tia. Kakaʼiya maʼi sünain nnojolüin jaaʼinrüin wane kasa anasü tamüin. Tüü, nnojotsü sükajeejatüin maalin taya jüpüla, shia süka isain jüchiki saaʼu wattain jia toulia. 11 Tü tamakat jümüin, nnojotsü sükajeejatüin cheʼojaain kasa tamüin. Mayaasüje eein tü oʼttaakat tamüin, nnojotsü ponüin taaʼin, süka talatirüin tü müliaakat wainmatua. 12 Teʼraaja aaʼut tü cheʼojawaakat amüin wane kasa maaʼaya aka tü kamaʼanaakat süpüshua tü tachekakat. Tountakalaka sünain talataa aaʼin maa aka keküinre taya ooʼulaka aire jamü tamüin, maa aka kaletsere taya ooʼulaka maletsere taya. 13 Nükajee Cristo, tountüin talatirüin süpüshua tü oʼttaakat tamüin, süka naapeerüin waneepia tamüin sütsüin taaʼin.
14 Mayaasüje tountüin jooluʼu sünain talataa aaʼin wanaa sümaa müliain taya, anasü maʼi tü jaaʼinrakat jooluʼu sünain juluwataain tamüin tü kasa cheʼojaakat tamüin yaa suluʼu tü kaatsetkat.
15 4:15-16 Tayaawata aaʼulu sünain sotüin jaaʼin tü takuaippakat taküjaiwaʼaya paala nüchiki chi Oʼtteʼerüikai jümüin. Süchikijee toʼunüin jaʼakajee chamüin Tesalónicamüin, juluwataain tü cheʼojaakat tamüin piantua. Jaʼitakaja tojuittapa suulia Macedonia, jia neʼe jümüiwa aaʼinmajaka taya süka tü kasa juluwataakat tamüin. 16 — 17 Nnojotsü shiain keeʼireein taaʼin asülajünaa amüin, shia shiiʼiree juwalaajünüin nütüma chi Senyotkai saaʼu jiʼyataajiraain tamaa waneepia nümüin. 18 Nnojolüitpa kasain cheʼojaain tamüin jooluʼu süka juluwataain tamüin sooʼomüin nümaa chi juwalakai Epafrodito. Tü juluwataakat tamüin, müsü aka saaʼin wane asülajuushi talatakat atüma naaʼin Maleiwa. 19 Saaʼu saʼaniraaitpain jukuaippa nümaa Cristo, aapüneerü jümüin nütüma chi Tashikai Maleiwa süpüshua tü cheʼojaakat jümüin süpüla jiʼyataain nümüin.
20 Anakaja jooluʼu kojutüle watüma chi Washikai Maleiwa süpüla kaʼikat süpüshua. Amén, jooʼuya waʼwaajaiwa nia weinshi.
Süpütaaya nünüiki Pablo napüla na anoujashiikana
21 Tayakai nümaa Timoteo, wasaküin jia nüchooinkana Maleiwa chaʼaya, jia anoujashiikana nünain Cristo Jesús. Napüshua na tawalayuu yaakana suluʼu Roma, asakitshii naya jünain, 22 otta na tawalayuu yaakana aʼyataain nümüin chi sülaülashikai mma. Asakitshii jünain napüshua na nüchooinkana Maleiwa yaakana Roma.
23 Achuntüshi jooluʼu taya nümüin chi Senyotkai Jesucristo süpüla niiʼiyatüinjatüin naʼanasia waneepia jümüin. Amén, kasataalejese naaʼinrüin tia.