1 Tesalónica

Yapajaa nüpüla Cristo nüntapeena

5 Tawalayuwaa, nnojotsü cheʼojaain tashajüin jooluʼu jümüin sooʼopünaa joujaleerüin sülatüin tü taküjüitpakat achiki jümüin, süka taküjain paala jümüin süchiki sukuaippa nükalia chi Senyotkai sünain aleʼejaa. 2 Maa aka wane wayuu nipiajachi sünain nnojolüin nütüjaain saaʼu joujaleechin nüntüin wane kaʼruwarai nünainmüin, meeria aka tü wayuukolüirua süpülapünaa tü nükaliakat chi Senyotkai, nnojoleerü sütüjaain aaʼu joujaleechin nüntüin. 3 Je maa aka wane wayuu ipoolu sünain süntalaa sümüin tü saaliikat sümüin, akaweeria tü wayuukolüirua süpülapünaa tü nükaliakat chi Senyotkai. Wanaa sümaa saashajaʼalaataain süchiki anaa akuaippa, anta meeria wane müliaa miyoʼushaata nanainmüin sünain süsaleenain naya tü naainjalakat. Nnojoleena ojuittüin naya suulia tü müliaa neʼreetkat.

4 Chi nipiajachikai, ainkuusü maʼi naaʼin nüntapa chi kaʼruwaraikai, ¿aashi müin? Otta jiakana tawalayuukana, nnojoleerü ainkuuin jaaʼin süntapa nükalia chi Senyotkai süka eein jaaʼin sünain nükalia suulia majüin aka jia naaʼin na wayuu kaainjaraliikana meʼraajüinkana chi Maleiwakai. 5 Sükajee jiʼraajüin nia, nnojoleena jia mmolüin seema süsalainjanain jia jaainjala nütüma chi Senyotkai nüntapa. 6 5:6-7 Maa aka wane epetshi sünain nnojolüin eejüin naaʼin sünain tü alatakat nüʼünnaa, akaajaa wane manoujainsai sünain nnojolüin eejüin naaʼin sünain nükalia chi Senyotkai sünteetkat nünainmüin. Otta jiakana, anakaja nnojoliire müin aka jia naya, aluʼujasa eeinjatü jaaʼin sünain nüntajachin chi Senyotkai süpüla laülaainjatüin jaaʼin sünain süpüshua tü jaaʼinrakat. 7 — 8 Nnojoliishii müin aka waya naaʼin na manoujainsaliikana sünain aaʼinraa tü mojusükat, süka eein waaʼin sünain sülüʼülüin nükalia chi Senyotkai. Anakaja jooluʼu müleka ayatüle waya sünain laülaain waaʼin. Je suulia wakanajuʼulaajüin sütüma tü mojusükat, anashii ayatüle waya sünain katsüin waaʼin sünain anoujaa je sünain aijiraain wapüla wapüshua. Je anashii wachecherüle waaʼin sünain anoujaa süka watüjaain saaʼu sünain woʼtteʼennüinapain nütüma chi Senyotkai.

9 Nnojoliishii waya eʼitaanüin nütüma chi Maleiwakai süpüla süsalainjanain waya waainjala, aluʼujasa süpüla woʼtteʼennüinjanain sünainjee tü naaʼinrakat chi Wasenyotsekai Jesucristo. 10 Müleka wayale wane na ouktüshiikana soʼu tü kaʼi niitaainjachikat oʼu Cristo, müsia aka neʼe wayale na katoʼuchiikana, ayateena waya anoujashiikana wapüshua nümaa waneepia, süka shiainjaʼa ouktüin apüla nia. 11 Je jooluʼu, süka watüjaain saaʼu sünain eeinjanain waya wapüshua nümaa waneepia, anakaja müleka ayatüle jütütüjüin na juwalayuukana sünain anoujaa süpüla laülaajiraainjatüin jaaʼin sünain anoujaa jüpüshua.

Tü wakuaippainjatkat namüin na wawalayuukana

12 Tawalayuwaa, tachuntüin jooluʼu jümüin sünain kojutüinjanain jütüma na laülaayuukana jaaʼu chaʼaya suluʼu tü outkajaaleekat, süka eʼitaaushin naya nütüma chi Senyotkai süpüla tia. Aʼyataashii naya waneepia jümüin sünain nasoʼijirüin jaaʼin sünain tü nüchekakat Maleiwa jüpüleerua. 13 Anakaja müleka aire naya jüpüla sümaa kojutüin naya jütüma waneepia süka naʼyataain maʼi jümüin. Jalia jia suulia jüʼülüjaajiraain namaa je sümaa tü juwalayuukat süpüshua.

14 Tawalayuwaa, tamüshii jia süpüla jükaaliijainjanain na juwalayuukana sünain kamaneein jia namüin napüshua. Chi eekai shukulain, anakaja müleka jüchiajaale nia suulia. Je chi eekai japülin sünain aʼyatawaa nümüin chi Maleiwakai, anakaja müleka jimeʼejüle naaʼin. Je chi eekai matsüin naaʼin sünain anoujaa, anakaja müleka jüchecherüle naaʼin. 15 Anakaja müleka jüchiaale na juwalayuukana suulia pasalaweejüin na napüshikana natüma. Jaʼitaichi aaʼinrüin wane juwala tü mojusükat jümüin, anakaja müleka jaaʼinrüle tü anasükat nümüin shiʼipajee otta sümüin wayuu süpüshua.

16 Talata jaaʼin waneepia. 17 Nnojoleena jia ooʼulaain suulia achuntaa nümüin chi Maleiwakai, ayata jia sünain waneepia. 18 Jaapa analuʼut nümüin chi Maleiwakai suʼunnaa tü kasa alatakat jümüin, müleka mojule, müleka anale. Shia nüchekakaʼaya chi Maleiwakai jüpüleerua saaʼu jünoujain nünain Jesucristo chi Nüchonkai.

19 Jalia jia suulia macheʼeyaajüin suulia nünüiki chi Naaʼinkai Maleiwa jümüin. 20 Je müleka jaapinnüle süka nünüiki chi Maleiwakai nütüma wane juwala, nnojoleerü jimeʼerainpalain shia. 21 Anakaja müleka jülüjüle jaaʼin sünain tü jaaʼinrakat, jütüjaaiwa saaʼu müleka anale, müleka mojule. Tü eekai anain, shia jaaʼinrüinjatka waneepia, 22 jiyouktajüinjatü tü eekai mojuin süpüshua.

23 Achuntüshi taya nümüin chi Maleiwakai jooluʼu jaaʼu, chi aapakai anaa jümüin, süpüla jükatalaainjanain suulia kaainjalaa süpüla lotüinjatüin tü jülüjakat jaaʼin, tü keeʼireekat jaaʼin, je tü jaaʼinrakat. Je achuntüshi taya nümüin süpüla nükaaliijain jia sünain tü jünoulakat suulia eejüin jütüma kasa mojuinjatkat atüma naaʼin chi Wasenyotsekai Jesucristo soʼuweena tü kaʼi nüleʼejüinjachikat oʼu nüchikua. 24 Tü tachuntüitpakat jaaʼu nümüin Maleiwa chi eenakakai jia, shiimüin sünain naaʼinrüinjatüin shia süka pansaain nünüiki waneepia.

25 Tawalayuwaa, anakaja müleka jüchuntüle waaʼu wayakana. 26 Anakaja jüsakiraale jüpüshua süka aijiraain jia jüpüla sünainjee anoujaa nünain Cristo.

27 Je sünainjee tajütüüshin nütüma chi Senyotkai, tachuntüin jümüin süka süpüshua taaʼin süpüla jülatirüinjatüin tü karaloukta tashajakat jümüin süpüla saashajeʼennüinjatüin namüin na juwalayuukana napüshua.

28 Achuntüshi jooluʼu taya nümüin chi Wasenyotsekai Jesucristo süpüla niiʼiyatüinjatüin waneepia naʼanasia jümüin.