2 Pedro

Ajaʼttinneena na ekirajüliikana sünain alawaa

2 Otta saʼaka tü wayuukolüirua paalainka, eejana wane nünüikimaajanayaakana Maleiwa, na aküjapüʼükana alawaa. Eejeerü mapeena jaʼaka jiakana wane ekirajülii eekai müin aka naya sünain aküjaa alawaa. Kemeʼerieerü maʼi nanüiki je nnojoleerü shiyaawatüin aaʼu wayuu sünain shiain alawaain tü nekirajakat anain. Amalajaajeerü sünoula tü wayuu kapülakat aaʼin nanüiki, süka nnojoleerüin lotüin tü nekirajeetkat anain nooʼopünaa Cristo. Antaleejeena sünain ayüülajaa chi Senyotkai awalaajakai naainjala ooʼulaka nayoukteechi süpüla laülaainjachin nia naaʼu. Kasalajana meeria namüin naainjala mapeena süpüla najaʼttinneenain nütüma. 2 Wainmeerü tü wayuu oushikajaakat süchiirua tü kasa mojusü nekirajeetkat anain sümaa süshatüin sukuaippa tü kasa mojusü naaʼinrakat. Je mojeerü sünüiki wayuu sümüin tü pütchi shiimüin nikirajapüʼükat anain Jesús sükajee tia. 3 Nala ekirajüliikana sünain alawaa, saaʼu kachiiruain naaʼin washirüü, naküjeerü jümüin pütchi naleʼeruʼujeejatü neʼe süpüla neʼikeʼerüinjanain jia süka naʼalain saaʼu jükorolo. Otta saaʼu shiimüin sünain kasalajaneerüin namüin naainjala nütüma Maleiwa, ajaʼttinneena naya nütüma maalü.

4 Soto jaaʼin chi Maleiwakai sünain nnojoliin naawalüin na aapiee kaainjalashiikana. Nüjünajaain naya eemüin süpülee tü ouktüsükalüirua kanüliakat Hades, süpüla püreesainjanain naya saʼaka piyuushi waneʼereʼeya süntapa tü nakalia kasalajaneetkat oʼu naainjala. 5 Maaʼaya aka nukuaippa Maleiwa sümaiwa paala sünain nnojoliin naawalüin na wayuu mojutkana atüma nia. Nüʼitirüin wane juya naaʼu miyoʼushaata maʼi süpüla ouktajanain naya sütüma. Achiajaanüshiiyaaje naya nütüma Noé, chi wayuu aaʼinrakai kasa anasü nuʼupala Maleiwa, suulia süsalajüin naya tü naainjalakat nütüma Maleiwa. Niakalaka neʼe oʼtteʼennüin namaa akaratshishii na kepiakana nümaa suulia wüinsirüin naya.

6 Maaʼaya aka nukuaippa Maleiwa sümaiwa paala sünain nnojolüin naawalüin tü wayuukolüirua mojutkat atüma nia kepiasükat suluʼu tü pueulokat Sodoma ooʼulaka Gomorra. Naʼajüin tü pueulokalüirua süka siki süpüla shiyaawatüinjatüin wayuu saaʼu tü alatajatkat sümüin süpüshua tü eekai müin aka naya sünain mojutüin Maleiwa natüma. 7 2:7-8 Otta müshia Lot, chi wayuu aaʼinrakai kasa anasü, ajuittinnüshi nütüma Maleiwa suluʼujee Sodoma eejachire kepiain nia saʼaka wayuu kaainjarannuu. Mojusü maʼi naaʼin Lot sütüma naainjala na wayuukana süka yarüttüin maʼi shia. Müliasü maʼi naaʼin süka kaainjalain naya nuʼupala je süka naapüin süchiki süpüshua tü kasa mojusü saaʼinrakat waneepia. 8 —

9 Saaʼu noʼtteʼennüinapain Noé ooʼulaka Lot nütüma Maleiwa, shiimüin sünain nuuntüin Maleiwa niyuʼlüin waya saʼakajee ooʼulakünaa aaʼin, waya aaʼinrakana tü anasükat. Otta na kaainjaraliikana, shiimüin sotüinjatüin naaʼin Maleiwa tü naainjalakat waneʼereʼeya süntapa tü kaʼi kasalajaneetkat oʼu tü naainjalakat.

10 Shiimüinreʼeya maʼi sünain süsaleenain na ekirajüliikana sünain alawaa soʼu kaʼikat tia, süka kaleʼeruʼuin süchiki kaainjalaa je süka naaʼinrüin waneepia tü yarüttakat atüma naaʼin. Eʼrülii wayumüin naya nümüin Maleiwa süka nayouktüin süchiki laülaain nia naaʼu. Püla aaʼinchii naya waneepia suulia wayuu süpüshua. Je mojusü nanüiki namüin na laülaayuushii chakana iipünaa. 11 Otta na aapieekana nümaʼana Maleiwa, eereje pülashin maʼi noulia na laülaayuushiikana chakana iipünaa, nnojotsü mojuin nanüiki namüin nuʼupala Maleiwa. 12 Na ekirajüliikana sünain alawaa, mojulaashaatashii maʼi naya. Mojusü maʼi nanüiki süchiki kasa eekai nnojolüin natüjaain saaʼu. Müshii aka saaʼin mürüt sünain aaʼinraa tü nachekalakat neʼe namüiwa. Je maa aka sütaʼünnüin mürüt süpüla suʼutinnüin aaʼin süpüla ekünaa, meena naya ajaʼlajaain.

13 Na ekirajüliikana sünain alawaa, neʼreerü müliaa saaliijee müliain wayuu natüma paala je saaliijee maaʼin naaʼin wanaa sümaa naaʼinrüin kasa mojusü suʼupala wayuu wainma je wanaa sümaa nekaain jümaa. Meeʼerapalashii jia sütüma wayuu sükajee tia. 14 Kaleʼeruʼushii naya süchiki kaainjalaa. Jülüjasü waneepia naaʼin amaʼüjawaa sümaa wayuu nnojotkat naʼwayuusein. Otta na eekai joʼuuin sünain anoujaa, aaʼinreeshii kasa mojusü sütüma neʼrüin tia. Na ekirajüliikana sünain alawaa, neʼikeʼereerü wayuu süka naʼalain saaʼu sükorolo süka kachiiruain naaʼin washirüü. Shiimüin sünain süsalainjaneenain naya nütüma Maleiwa sükajee tia. 15 Nayouktüin tü shiimain ekirajünakat anain naya, maa aka naaʼin chi nünüikimaajachikai Maleiwa paala sümaiwa kanüliakai Balaam chi nüchonkai Beor, chi aaʼinrakai kasa mojusü shiiʼiree walaain nümüin. 16 Achiajaanüshi nia nütüma wane püliikü. Jaʼitaichi manülin chi neʼejenakai saaʼu mürülüin nia, ayatshia aashajaain süka sünüiki wayuu süpüla nuuʼulaainjachin chi nünüikimaajachikai suulia macheʼein nia sünain tü kasa mojusü naaʼinrüinjatkat.

17 Na ekirajüliikana sünain alawaa, müshii aka naya saaʼin wane ishi eekai meʼwiirain eere nnojolüin wüin süpüla wayuu. Müshii aka naya saaʼin wane siruma eekai sülatüin neʼe sümaa nnojolüin süʼitüin tü juyakat sütüma. Ajütüneena naya chaʼaya shiinaluʼumüin tü mmakat saʼakamüin tü piyuushikat nütüma chi Maleiwakai süsala naainjala. 18 Aʼwaataashii maʼi na ekirajüliikana sünain alawaa suluʼu nakuaippa süka pütchi naleʼeruʼujeejatü noʼupala na wayuu ajuittüinapakana naʼakajee na manoujainsaliikana. Shiiʼiree kachiiruain naaʼin süchiki kaainjalaa na anoujashiikana natüma, aʼwaataashii noʼupala, süka pütchi eekai kemeʼeriain, suluʼu tü kasa saaʼinrakat wayuu kaainjarannuu. 19 Na ekirajüliikana sünain alawaa, jaʼitaina nayaʼinya neʼe süchepchiain tü kaainjalaakat, ekirajüshii naya wayuu sünain laülawaa namüiwa süpüla aaʼinraa eekai nacheküin. Naʼalain neʼe tü namakat. Maa aka wane wayuu eekai naapajiraain nukuaippa süpüla aʼyatawaa nümüin nülaamain, akaajaa na ekirajüliikana sünain alawaa sünain süchepchiain kaainjalaa süka naapajiraain nakuaippa sünain aaʼinraa waneepia kasa mojusü.

20 Eere wane wayuu, saaʼu aleewain nümaa chi Wasenyotsekai Jesucristo chi Oʼtteʼerüikai, müleka nujuittüle saʼakajee tü kaainjarannuukat sünain süchepchiain kaainjalaa nüchikua, alanaʼaleejeeria maʼi sünain mojuin nukuaippa suulia palajana paala. 21 Anasüje nümüin müleka nnojoruleje nütüjaain saaʼu tü anasükat, tü aluwataanakat anain nütüma Maleiwa, suulia nütüjaain saaʼu sümaa niyouktüin shia. 22 Shiimüin tü ashajünakat achiki suluʼu tü karaloukta nüchikimaajatkat Maleiwa sünain müin mayaa: