1 Juan
Ee jaaʼin noulia na ekirajüliikana sünain alawaa.
4 Tawalayuwaa, jalia motojoyoo jaaʼin na nünüikimaajanayaakana Maleiwa. Jalia jia suulia jünoujajüin süpüshua tü nikirajeekat anain wane wayuu eekai nüntüin jaʼakamüin. Shia anaka aluʼu müleka jülüjüle jaaʼin palajana tü pütchikat süpüla jütüjaainjatüin saaʼu müleka shiimüinre sünain nünüikin Maleiwa tü nikirajakat anain. Süka jamüin, wainma na nünüikimaajanayaakana Maleiwa sainküin mmakat maaʼulu yaa. 2 ¿Jamüsü süpüla watüjaainjatüin saaʼu sünain eein chi Naaʼinkai Maleiwa nümaa wane ekirajüi? Shia müleka nikirajüle sünain wayuuin Jesucristo sünain antaa saʼakamüin wayuu, wayaawatakalaka naaʼu sünain eein chi Naaʼinkai Maleiwa nümaa. 3 Akaajasa müleka nunujulajüle nüchiki Jesús sünain wayuuin nia, watüjaa aaʼulu sünain nnojolin chi Naaʼinkai Maleiwa nümaa. Tü pütchi alawaa nikirajakat anain, eʼitaaushi nikiiruʼu nütüma chi Niʼipolokai Cristo. Otta jiakana, jaapapüʼü achikichi nia sünain nüntajachin saʼakamüin wayuu. Je jooluʼu maaʼulu yaa, eeichipa waʼakamüin.
4 Tachonniwaa, jia aishiikana tapüla, süka nüpüshinapain jia Maleiwa, juuntüin jükatalaain suulia tü alawaa nekirajakat anain na nünüikimaajanayaakana Maleiwa. Süka jamüin, chi Naaʼinkai Maleiwa jümaakai waneepia, alanaʼaleesia maʼi nüpülain nuulia Yolujaakai sümaakai tü wayuu manoujainsatkalüirua. 5 Kamalainsü nanüiki na nünüikimaajanayaakana Maleiwa sümüin tü manoujainsatkalüirua, süka napüshin naya je süka naashajaain süchiki tü kasa keejiakat namüin. 6 Saaʼujee nüpüshin waya Maleiwa, maa aka eere wane wayuu kamalainkat amüin wanüiki, nia eekai shiimüin sünain niʼraajüin Maleiwa. Je chi ayouktakai tü wekirajakat anain, nnojoishi nüpüshin Maleiwa. Shiakalaka watüjaain aka saaʼu jaralüin ekirajüin sünain tü shiimüinkat je sünain tü alawaakat.
Ayatüinjana aijiraain na anoujashiikana
7 Tawalayuwaa, süka alin waya nüpüla chi Maleiwakai, anashii müleka aijiraale waya wapüla. Wane wayuu, müleka aire tü wayuukolüirua nüpüla, atüjaaneechi aaʼu sünain niʼnnaajünüin Maleiwa nütüma je nüchoinchipain nia. 8 Müleka maalinre nüpüla wayuu, nnojoishija niʼraajüin chi Maleiwakai, süka niiʼiyatüin wamüin waya nüchooinkana jamüinjatüin wakuaippa süpüla alinjatüin wayuu süpüshua wapüla, maa aka alin waya nüpüla. 9 ¿Jamüsü watüjaakaʼa saaʼu alin waya nüpüla Maleiwa? Shia süka nuluwataain chi waneeshikai Nüchon yaa mmoluʼumüin süpüla niiʼiratüinjatüin waaʼin süpüla eeinjanain waya nümaa chaa iipünaa. 10 ¿Washatüin tü aijirawaakat saaʼujee alin maʼi chi Maleiwakai wapüla? Nnojo. Washatüin saaʼujee alin maʼi neʼe waya nüpüla chi Maleiwakai. Nuluwataainjese chi Nüchonkai süpüla ouktüinjachin saaʼu waainjala süpüla nülaʼajaainjatüin woulia. 11 Tawalayuwaa, anuu tanüiki jümüin süchikua: Saaʼu alin maʼi waya nüpüla chi Maleiwakai, anakaja aijiraale waya wapüshua. 12 Wainma wayuu eekai nnojolüin sütüjaain saaʼu saalii nüpüla Maleiwa sükajee nnojolin shiʼrüin nia. Müleka aire na wayuukana wapüla, nayaawateerü aaʼu sünain eein chi Maleiwakai wamaa je alin naya nüpülaya. Je sükajee tia, kettaasü tü nüchekakat chi Maleiwakai wapüleerua.
13 Watüjaa aaʼulu sünain wanaawajiraain waaʼin nümaa chi Maleiwakai je sünain eein nia wamaa, süka naapüin chi Naaʼinkai wamüin. 14 Je saaʼu teʼrüin chi Nüchonkai Maleiwa, taküjakalaka nüchiki sümüin wayuu sünain ajütüüshinkain nia nütüma chi Nüshikai süpüla nuʼtteʼerüinjatüin wayuu yaa suluʼu mmakat süpüshua. 15 Sünainjee waküjain nüchiki Jesús sümüin wayuu sünain niain chi Nüchonkai Maleiwa, watüjaa aaʼulu sünain wanaawajiraain waaʼin nümaa Maleiwa je sünain eein nia wamaa. 16 Shiimüin maʼi sünain alin waya nüpüla Maleiwa.
Nikirajüin waya chi Maleiwakai sünain jamüinjatüin saaliipala wayuu wapüla maa aka waalii nüpüla niakai. Chi aikai apüla wayuu, wanaawajiraasü naaʼin nümaa Maleiwa süka eein nia nümaa. 17 Maa aka niiʼiyatüin Cristo sümüin wayuu sünain alin nayakana nüpüla chi Maleiwakai, akaajaa wayakana, anakaja washatüle noʼupala tü nukuaippakat Cristo. Müleka waaʼinrüle tia, kettaasüja tü nüchekakat Maleiwa wapüleerua sünain alin wayuu süpüshua wapüla. Je nnojoleena waya mmolüin neema soʼu tü kaʼi wasouktinneenakat oʼu niʼipajee saaʼu tü kasa waaʼinrapüʼükat kataiwaʼaya woʼu. 18 Nnojoliishii waya mmolüin neema, süka watüjaain saaʼu sünain shiimüin nüchooin waya je alin waya nüpüla. Chi wawala eekai mmolüin neema, nnojotsü niyaawatüin aaʼu naalii nüpüla Maleiwa je nnojotsü niyaawatüin aaʼu sünain masalajanaitpain naainjala.
19 Wayakana, aijiraashii wapüla wapüshua je aishi wapüla chi Maleiwakai süka alin waya nüpüla palajana. 20 “Aishi tapüla chi Maleiwakai”, nümüle wane wayuu sünain kanaain naaʼin nuwalayuu, aküjashi neʼe naʼalain. Nnojoliireje alin nüpüla na nuwalayuukana nümaakana, nialeekaja aijeematüin Maleiwa nüpüla, nnojoishija niʼrüin. 21 Soto jaaʼin tü nuluwataakat anain waya chi Maleiwakai: Na wayuu aikana apüla Maleiwa, ai napüla na nawalayuukana wanaa nümaa.