Apocalipsis

Tü niinase Maleiwa chakat iipünaa eere nuluwataain

4 Shiasa süchikijee kettaapa tatüma tü karaloukta ashajinnakat taya sümüin tü akaratshisükat outkajaalee, eirakaashi taya chaa iipünaamüin. Shiiʼiyataakalaka tamüin wane kasa maa aka saaʼin soʼu miichi jutatüin chaʼaya eere Maleiwa. Je chi wayuu aashajaakai tamaa paala, chi makai aka saaʼin shiʼira konneeta nünüiki, nümakalaka aaʼin tamüin: “Jalaichi yaamüin, teeʼiyataiwa pümüin tü alatajateetkat”. 2 Shiasa mapa yaaulerü, naʼanaain taya chi Naaʼinkai Maleiwa. Shiiʼiyataakalaka tamüin chaa iipünaa wane einasee süpülajatü aluwatawaa, je eeshi chi Maleiwakai joyotüin saaʼu. 3 Chinatüshi nia maa aka saaʼin tü kakuuna kanüliakat “jaspe” ooʼulaka “cornalina”. Je tü niinasekat, pasanainsü shia sünain wane kaspolüin jorottüsü maʼi, müsü aka saaʼin tü kakuuna kanüliakat “esmeralda”. 4 Je pasanaintaasü joo shiaʼaya sünain piama shikii pienchimüin einasee. Eeshii joyojoyolüin saaʼu tü einaseekalüirua piama shikii pienchimüin laülaayuu. Kasuujasü maʼi nasheʼin. Otta sünain nekii waneʼewaire nakua, eesü wane kotse ooroleʼeya maa aka nakotse na sülaülakana mma. 5 Je sünainjee tü niinasekat chi Maleiwakai, sümachetaakalaka shiyaa juya sümaa sütüttaain. Je joo sümülatuʼu tü niinasekat, eesü akaratshisü rampara chuwachuwatsü. Tiairua, shia niyaawasekaʼaya chi Naaʼinkai Maleiwa suluʼukai tü akaratshisükat outkajaalee. 6 Je sümülatuʼu tü niinasekat, eesü wane kasa jamatüin müsü aka saaʼin wüin suluʼu wane laa, jorottüsü maʼi maa aka saaʼin wane rouya.

Je süʼütpaʼa tü niinasekat, eesü pienchisü kasa katoʼulu. Pasanainsü tü niinasekat sünain. Koʼuyaa müsüirua süpüleeruajee je süchiiruajee. 7 Wane, müshi aka saaʼin kannajapüt. Je waneʼe, müshi aka naaʼin paaʼa toolo. Otta nuʼupünaa chi waneʼe, müsü aka saaʼin suʼupünaa wayuu. Je joo chi waneʼeya, müshi aka saaʼin warulapai sünain waawataa. 8 Katünayaa müshii naya maa aka saaʼin sütüna wuchii. Aippiruasüwai natüna waneʼewai nakua. Je koʼuyaa müsüʼüya sütoutajee je sütuʼujee tü natünakat. Meemerüinsalii naya sünain eeʼirajaa nümüin Maleiwa, chi joyotokai saaʼu niinase. Eeʼirajüshii saʼwai je soʼukaʼi sünain namüin:

“Shiimüinshaata sünain maainjalain chi Maleiwa Aluwataakai Pülashikai maʼi.

Eetüjüʼiya nümaiwa, eeshi nia maaʼulu yaa, je eeinjachi nia waneepia süpüla kaʼikat süpüshua”.

9 4:9-10 Mawaisü neeʼirain na pienchishiikana kasa katoʼuchii naʼwaajapa Maleiwa, chi joyotokai saaʼu tü einaseekat, chi matüjainkai ouktaa. Je wanaa sümaa naʼwaajüin nia sümaa naapüin analuʼut nümüin, aʼwachiraawaishii nümülatuʼu Maleiwa na laülaayuu piamakana shikii pienchimüin je neʼitaʼawalin tü nakotsekalüirua nümülatuʼu süpüla neeʼiyatüin nujut nümüin sünain namüin neeʼirainruʼu: 10 —