Naʼyataain na Aluwataaushikana

12 Wanaapünaa sümaa tia, müliashii waneinnua anoujashii nutuma Herodes, chi aluwataashikai. 2 Nuʼutira aaʼinchi Santiago süka chajaruuta, chi nuwalakai Juan. 3 Nütüjaapa saaʼu kamalain tia namüin na judíokana, nüpüreesajiraka Pedro. Alatüsü tia soʼu tü Miʼiraa Saainjünakalü oʼu tü Pan Maʼakasatkat Soolojia. 4 Nütaʼülirüinjeseʼe Pedro jee nüpüreesajirüin nia. Pienchisü neʼipapaʼa na surulaat eʼrajakana naaʼu, pachikuatüshii naya suluʼu pienchiwalin naya. Shia keeʼireeka naaʼin Herodes süsalainjachin Pedro nutuma sünainjee tü kasa naainjakat, naainjeein tia suʼupala wayuu süchikijee tü Pascuakat.* 5 Nüsürünnaka Pedro suluʼu tü kaatsetkat. Nayasaʼa na anoujashiikana, nnojoishii ooʼulaain suulia oʼuraajaa nümüin Maleiwa nüpüleerua.

6 Wanee ai süpülapünaa süsalainjachin Pedro nutuma Herodes suʼupala wayuu wainma, atunkushi Pedro pasanain nanain piamashii surulaat otta kaleenaluʼushi nia atumawaa, eejanaka waneinnua waaria aaʼinmajakana soʼu tü kaatsetkat. 7 Niiʼiyalaʼalaa nümakalaka wanee aapiee nümaʼanajeejachi Jehová* eejanale naya jee chuwatuuika maʼin eejachire Pedro, achijinnüshijeseʼe Pedro nutuma chi aapieekai sümaa nipettüin nuwatsenain jee nümakalaka nümüin: «¡Pütamawaataa!». Sujunuujaaka tü kaleenakat sünainjee najapükii Pedro. 8 Anuujeseʼe nünüiki chi aapieekai nümüin: «Paʼata püsheʼin sümaa türa pukoʼusuinkat». Ayatüsüjaʼaya naainjain Pedro tia. Anuu sooʼomüin nünüiki chi aapieekai nümüin: «Paʼata türa saajunakat püsheʼin, jooʼuya». 9 Nujuʼitakalaka Pedro suluʼujee eejachire nia püreesain, nuʼunakalaka nüchiirua chi aapieekai, nnojotpejeʼe niyaawatawalain saaʼu shiimain tü naainjakat chi aapieekai, nüʼlapüinñaa neʼe Pedro tia naaʼinruʼu. 10 Süchikijee nalatüin tü palajatkat jee tü chiiruaajatkat waariapülee, nantakalaka eemüin tü puettoʼu aainjuushikat süka kachueera, tü chaʼwatkat pueulopaʼamüin, sujutalaʼalaa sümaka tia puettoʼukot. Ojuʼitüshiijeseʼe naya sümaa noʼunuin suluʼupünaa wanee kaaye, yüüʼülaa nümaka chi aapieekai nuulia Pedro. 11 Wanaa maʼin sümaa tia, niyaawatakalaka saaʼu Pedro tü kasa alatakat, anuukalaka nünüiki: «Tatüjaaitpainjaʼa saaʼu jooluʼu nuluwataain Jehová* wanee aapiee suulia jamajüin taya nutuma Herodes otta suulia tü kasa mojusü alatajatiaakat tamüin natuma na judíokana».

12 Süchikijee niyaawatüin saaʼu Pedro tia, nuʼunakalaka shipialuʼumüin María, tü niikat Juan, chi Marcos münakai, eejanale jutkatüin sünain oʼuraajaa kojuyashii nikirajüin Jesús. 13 Wanaa sümaa nütaletüin Pedro tü miichoʼukot, suʼunakalaka wanee achepchiee sünain anaʼlawaa jaralin antüin, Rode sünülia tia achepchieekat. 14 Shiyaawatapa saaʼu niain kanüikin Pedro, talatakalaka maʼin shia jee suwataakalaka neʼe paülüʼümüin sünain aapiraa, nnojotpejeʼe sujutalawalain tü puettoʼukat nüpüleerua Pedro. 15 Anuukalaka nanüiki sümüin: «Mamainnasü neʼe pia». Ayatapejeʼeya shia ichein süchiirua niainña Pedro chi wayuu antakai. Anuukaʼa joo nanüiki sümüin: «Niataa wanee aapiee».* 16 Ayatüshijaʼaya Pedro atalejüin miichoʼukot, shiasaʼa nojutatpa tü miichoʼukot, sainkuukalaka naaʼin neʼrapa nia. 17 Nuchuntaka namüin süka najapü koʼutajanain naya jee nüküjaka namüin tü naainjakat Jehová* nüpüleerua süpüla niyuʼluinjachin nia suluʼujee tü kaatsetkat, anuujeseʼe nünüiki Pedro namüin: «Jüküja tia nümüin Santiago otta namüin na wane anoujashiikana». Süchikijee nüküjain tia, nuʼunakalaka yalejee.

18 Jaʼyuupa, yootooin namaka na surulaatkana, jama nnojoluin natüjaain saaʼu kasain maʼin alatüin nümüin Pedro. 19 Nüchajeʼeraka maʼin Herodes nüchiki Pedro, nnojoipejeʼe nia antünawalin anain, shiasaʼa suluʼujee tia, nüsakiijaka na waariakana jee süsalakalaka naya nutuma. Nuʼunakalaka Herodes Judeajee chaa Cesareamüin, makatakalaka nia chayaa maʼaka jeʼra kaʼi.

20 Jashichikalaka nia namüin na wayuu chajanakana Tiro otta Sidón. Wayuukana naainnua, ayaʼlajawaishii eküülü suluʼu tü mma nuluwataakalü aaʼu Herodes, antüshiijeseʼe naya sünain achuntaa kaalinwaa nümüin Blasto, chi sülaülajanashikai nipia chi aluwataashikai. Naashajaaka nümaa chi aluwataashikai süpüla anajiraainjanain naya. 21 Soʼu tü kaʼi suutkajaakalü oʼu wayuu, naʼatakalaka Herodes tü nüsheʼinkat süpüla aluwatawaa, nüikalaakalaka saaʼu tü einasee naikalaapuʼukalü aaʼu na laülaashiikana süpüla kasalajanainjatüin saainjala wayuu natuma, nikirajaka na wayuukana. 22 Nayasaʼa na wayuu jutkatakana naʼwaataka sünain maa: «Nnojoishi wayuuin chi makai aashajaain, maleiwan». 23 Wanaa maʼin sümaa tia, ayuuijaakalaka Herodes nutuma chi aapiee nümaʼanajeejachikai Jehová,* jama nnojolin nuʼwaajüin Maleiwa. Najaʼttaka sutuma jokoma.

24 Aʼwalakalaasü süchiki nünüiki Jehová,* wainmakalaka na wayuu anoujakana nünain.

25 Nüleʼejaakalaka Bernabé nümaa Saulo chaa Antioquíamüin süchikijee chajanain naya paala chaa Jerusalén sünain akaalinjaa na anoujashiikana, namaashi Juan, chi Marcos münakai.