Tü nüshajalakat Juan

5 Shiasaʼa süchikijee tia, nuʼunakalaka Jesús Jerusalénmüin, eejatkalaka wanee miʼiraa natuma na judíokana. 2 Shiasaʼa chaa Jerusalén, süʼütpaʼa tü potton kanüliakat Shikerojule Anneerü, eejatkalaka wanee süpülajana wüin Betzata münüsü suluʼu hebreo, jaʼraisü luma eejatka süʼütpaʼa tia wüinkat. 3 Watta naalii na wayuu juʼlejuletkana sümaa ayuulii, eejana eekai moʼupaʼain, eekai shalüʼütüin otta eejanaʼaya wayuu eekai josoin atüna sümaʼaleeya nasaʼa. 4 * 5 Eejachikalaka yala wanee wayuu apünüinchi shikii mekiisatmüin juya sünain ayuulii. 6 Niʼrüin Jesús juʼletüin chia wayuukai otta nütüjaa aaʼu kakaliaichin maʼin nia sünain ayuulii, nümakalaka nümüin: «¿Aawalaweeshi pia?». 7 Nusoutakalaka chi wayuukai nümüin Jesús: «Señotkalee, nnojoishi eein wanee wayuu emetirajachikai taya shiroku tü wüinkat sujurulajaapa, mayaashi temeteein shiroku, yalamaatüshi wanee tapüleerua». 8 Anuujeseʼe nünüiki Jesús nümüin: «Pütamaa pümaala, paapaa türa pujulejiakat sümaa puwaraʼiraain». 9 Naawalaamaataka chi wayuukai, naapaakalaka tü nujulejiakat sümaa nuwarairaain.

Sükalioʼulajatü eemerawaa tia makat. 10 Namakalaka na judíokana nümüin chi wayuu aawaleʼennüshikai: «Nnojotsü anain pülüʼüjale tü pujulejiakat, sükalioʼujana waya eemerawaa». 11 Nusoutakalaka chi wayuukai namüin: «‹Paapaa türa pujulejiakat sümaa puwaraʼiraain›, müshi tamüin chi wayuu aawaleʼerakai taya». 12 Anuujeseʼe nanüiki nümüin chi wayuukai: «¿Jaraikaʼa maʼin chi wayuu ‹paapaa türa pujulejiakat sümaa puwaraʼiraain› makai pümüin?». 13 Nnojotpejeʼe nütüjaain aaʼu chi wayuukai jaralin aawaleʼerüin nia süka nuʼunatüjülin Jesús naʼakapünaa na wayuu wattakana naalii, na eejanakana soʼu tia.

14 Süchikijee tia, chajachikalaka chi wayuukai nüpüla Jesús suluʼu tü aʼwaajüleekat, nümakalaka nümüin: «Aawalaaichipa pia. Puuʼulaa suulia aaʼinraa kasa mojusü suulia joo mojuleeinña maʼin tü kasa alateetkat pümüin». 15 Nuʼunakalaka chi wayuukai namaʼanamüin na judíokana jee nüküjakalaka namüin niain Jesús chi aawaleʼerakai nia. 16 Nüchajaanaka achiki Jesús natuma na judíokana sünainjee naaʼinrüin tia sükalioʼu eemerawaa. 17 Nusoutakalaka Jesús namüin: «Ayatayüiya aʼyataain chi Tashikai maaʼulu, akaʼaya tayakai ayatayüiya aʼyataain». 18 Shiasaʼa suluʼujee tia, nuʼutuneekalaka aaʼin Jesús natuma na judíokana, naashin nayakana mojutusat nümüin Jesús tü sükaliakalü eemerawaa jee noʼutee aaʼinchi nia sünainjee nüchooin nia Maleiwa naashin otta wanaawain nia nümaa.

19 Nümakalaka Jesús namüin: «Shiimain tanüiki jümüin, nnojotsü eein wanee kasa eekai taaʼinrüin süka taaʼin tamüiwaʼa, shia taaʼinraka tü teʼrakat naaʼinrüin chi Tashikai, süpüshuaʼa tü kasa naaʼinrakat chi Washi iipünaajachikai naaʼinrüinña shia chi Nüchonkai. 20 Aishi maʼin nüpüla chi Washi iipünaajachikai chi Nüchonkai, müshijeseʼe nikirajüin nia sünain süpüshuaʼa tü kasa naaʼinrakat otta nikirajeechi nia süpüla aaʼinraa kasa anaʼleeka maʼin süpüla ponuinjatüin shia jaaʼin. 21 Maʼaka nüsoʼireʼerüin saaʼin wayuu outusü chi Washi iipünaajachikai otta naapüin kataa oʼuu sümüin wayuu, akaweechia neʼe chi Nüchonkai naapeerü kataa oʼuu sümüin wayuu eekai kateein oʼu nutuma. 22 Nnojotsü kasalajanain saainjala wayuu nutuma chi Washi iipünaajachikai, nia niʼitaaka chi Nüchonkai süpüla naaʼinrüin tia, 23 kojuteechikalaka atumawaa nia maʼaka kojutuin atumawaa chi Nüshikai. Chi mojutukai amüin taya, nnojoishijaʼamata kojutuin chi Tashikai nutuma, jama niain kajünalain taya. 24 Shiimain tanüiki jümüin, chi wayuu aapajakai tanüiki otta anoujakai nünain chi Kajünalakai taya, kateerü noʼu süpüla kaʼikat süpüshuaʼa. Nnojoluitpa kasalajanain naainjala nümüin, oʼttaaichipa nia süchikijee outaa.

25 »Shiimain tanüiki jümüin, eejeerü wanee kaʼi saapüneetka oʼu nünüiki Nüchon chi Maleiwakai natuma na wayuu outuinnapakana, nasoʼiraajeenaka aaʼin na aaʼinrakana tü nuluwataakalü anain Maleiwa. Antüitpa tia kaʼikat. 26 Maʼaka katüin soʼu kasa süpüshuaʼa nutuma chi Washi iipünaajachikai, niʼitaainña chi Nüchonkai süpüla katajatüin soʼu kasa süpüshuaʼa nutuma. 27 Naapüinña laülawaa nümüin chi Süchonkai Wayuu* süpüla kasalajanain nutuma saainjala wayuu. 28 Nnojo ponuin jaaʼin tia süka sünteerüin wanee kaʼi naapeetka oʼu napüshuaʼa na wayuu outushiikana nünüiki chi Süchonkai Wayuu 29 otta atamaajeena naya. Nayasaʼa na wayuu aaʼinrapuʼukana kasa anasü asoʼiraweena aaʼin süpüla katajatüin noʼu otta na wayuu aaʼinrapuʼukana kasa mojusü asoʼiraajeena aaʼin süpüla kasalajanain naainjala namüin. 30 Nnojotsü eein wanee kasa eekai süpüla taaʼinrüin süka taaʼin tamüiwaʼa. Kasalajanapa tatuma wanee kasa, kasalajanasü tatuma wanaapünaa sümaa tü taapakat otta lotusü sukuwaʼipa tatuma. Süka nnojoluin keeʼireein taaʼin shikeraajüinjatüin tü tachekakat neʼe tamüiwaʼa, shia keeʼireeka taaʼin shikeraajüinjatüin tü nüchekakat chi Kajünalakai taya.

31 »Anale tanüiki tachikijiraa, nnojotsüjaʼamata shiimain tü tamakat. 32 Eepejeʼe wanee wayuu anakai anüiki tachiki otta tatüjaa aaʼu shiimain tü nümakat tachiki. 33 Aluwataashii jia wayuu nümaʼanamüin Juan otta nüküjain jümüin süchiki tü shiimainkat. 34 Nnojotsü choʼujaain tamüin anainjatüin sünüiki wayuu tachiki, taküjapejeʼe jümüin süpüshuaʼa tia shiiʼiree juʼttaainjanain. 35 Chia wayuukai müshi aka saaʼin wanee ranpara chuwataka maʼin otta warattaka maʼin atuma wanee kasa. Talatapünaasü jaaʼin nümaa süka müin nia maʼaka saaʼin wanee luusa. 36 Kaawainsü maʼin tü taküjakalü achiki jümüin suulialeʼeya tü nüküjakalü achiki Juan. Atüjaana aaʼuchi nüjünalain taya chi Tashikai sünainjee taaʼinrüin süpüshuaʼa tü nuluwataakalü anain taya. 37 Anasü nünüiki tachiki chi Tashikai, chi Kajünalakai taya. Nnojotsü jaapüirüin nünüiki otta nnojoishi jiʼrüichin nia. 38 Nnojotsü suluʼuin jaaʼin tü nünüikikat süka nnojoliin junoujain nünain chi nüjünalakai.

39 »Jülüjasü maʼin jaaʼin tü jaashajeʼerakat suluʼu tü Karaloʼuta Nüchikimaajatkat Maleiwa süka kateerüin joʼu waneepia jaashin sünainjee jaashajeʼerüin shia, ashajünapejeʼe tachiki suluʼu tia karaloʼutakat. 40 Mayaainjeʼe müin tia nnojoishii arütkaweein jia tanainmüin süpüla katüinjatüin joʼu tatuma. 41 Nnojotsü choʼujaain tamüin taʼwaajünüinjachin sutuma wayuu. 42 Tatüjaapejeʼe saaʼu maalin Maleiwa jüpüla. 43 Antüshi taya saaʼu nünülia chi Tashikai, mamaneepejeʼe jia tamüin. Jamüshijaʼa nüntataarüle wanee wayuu saaʼu nünülia neʼe, niainjaʼa kapüleechin jaaʼin. 44 ¿Jamataalainjatü süpüla junoujain tanain shiale neʼe jüchajaain achiki juʼwaajünüinjanain sutuma wayuu, suulialeʼeya anain jukuwaʼipa noʼuluʼu chi waneeshikaijaʼa suluʼu Maleiwain? 45 Nnojo jülüjain jaaʼin taküjeerüin nümüin chi Tashikai süchiki tü kasa mojusü jaaʼinrakat. Nia Moisés aküjaka süchiki tia, chi jiʼitaakai anain jaaʼin. 46 Shiimainrejeʼe junoujain nünain Moisés, anoujashiije jia tanain, ¿aashin niain Moisés ashajüin tachiki? 47 Nnojoliirejeʼe junoujain sünain tü nüshajakat Moisés, ¿shieemataka junoujain tanüiki?».