Karaloʼuta namüinjatka na Hebreokana
6 Süka watüjaaitpain saaʼu tü kasa nütüjaainjatkalü aaʼu wanee wayuu palajana nüchiki Cristo, anakajaʼa waaʼinmaale maʼin laülaainjatüin waaʼin sünain anoujaa, nnojotsü anainjatüin neʼe waaʼin sümaa tü kasa choʼujaakat maʼin süpüla watüjaain aaʼu palajana maʼaka saaʼin wayaawajaain suulia tü kasa nnojotkat kasain anain apüla, maʼaka saaʼin kanoulain waya nünain Maleiwa, 2 tü ekirajünakalü anain süchiki woutiisaa, tü süchikikat eʼitawaa ajapü saaʼu shikii wayuu, tü süchikikalü asoʼirawaa aaʼin süchikijee outaa otta tü süchikikat kasalajanainjatüin saainjala wayuu nutuma Maleiwa süpüla kaʼikat süpüshuaʼa. 3 Shiaʼaya waaʼinreetka tia nüchekülejeʼeya shia Maleiwa.
4 Eekajasaʼa na aapünakana amüin wanee luusa, asülajünüsü namüin wanee kasa iipünaajeejatü jee aapünüsü namüin tü nüpülainkat Maleiwa. 5 Naapaa amaalü tü nünüikikat Maleiwa jee müsü neʼrakai saaʼin tü kasa anasü eejeetkat mapeena suluʼu tü mma jeketükat, 6 ooʼulaapejeʼe naya suulia anoujaa, nnojoliikalaka süpüla nakaalinjünüin sutuma wayuu süpüla nayaawajaainjanain suulia naainjala, jama müin nachitakai naaʼin nüchikuaʼa sünain wanee wunuʼu* chi Nüchonkai Maleiwa otta eʼrüshi nia japülii natuma. 7 Jamüsüjaʼa tü mmakat, anasü sukuwaʼipa nutuma Maleiwa süʼitawaipa juya saaʼu, susonuwaakalaka wunuʼulia, kachonkalaka maʼin tia nümüin chi apünajakai shia. 8 Susotule neʼe wunuʼu keipüsesü sümaa manna süpaʼa tia mmakat, mma mojusü neʼe jee nuʼulejeerü shia Maleiwa sümaa saʼajüneerüin mapa.
9 Tawalayuu aishiikana tapüla, mayaainjeʼe müin wanüiki mayaa, watüjaa aaʼu jiʼreenain kasa anasü, tü kasa juʼttaajeetkalü atuma. 10 Lotusü nukuwaʼipa Maleiwa, nnojotsü motuin naaʼin tü kasa anasü jaaʼinrakat, nnojotsiaʼaya motuin naaʼin alin jüpüla tü nünüliakat, jama jiʼyataain napüleerua na aneekuushikana jee ayatayülia jaaʼinrüin tia. 11 Shiapejeʼe wacheküin jüpüleerua waneʼewai jukua ayatüinjanain jiʼyataaliin süpüla shiimainjatüin jümüin shikeraajeerüin tü kasa jaʼatapajakat. 12 Nnojoliinjana jia shokulain, jüshatajatü nakuwaʼipa na wayuu aapünajanakana amüin tü kasa aküjünatüjütkalia achiki paala. Aapünajatü tia namüin süka kanoulain naya jee nnojoliin nashapajaain.
13 Soʼu nüküjatüjülin Maleiwa nümüin Abrahán tü kasa naaʼinrajatkat nüpüleerua, nüpansaajüin nünüiki nümüin naaʼujiraa, jama nnojolin eein wanee wayuu eekai miyoʼuin nuulia. 14 Anuu nünüiki Maleiwa nümüin: «Shiimain maʼin taapeerüin kasa anasü pümüin sümaa watteenain naalii na püikeyuukana tatuma». 15 Saaʼujee nnojolin nüshapajaain aaʼin Abrahán, nüpansaajüin Maleiwa tia pütchikat nümüin. 16 Jamüshiijaʼa na wayuukana naapüin nanüiki naaʼu wanee wayuu eekai miyoʼuin noulia, nnojoliikalaka naʼülüjiraakuʼu namüin saaʼujee tia, jama kaawain tia namakat. 17 Akaataajaʼaya neʼe sukuwaʼipa nutuma Maleiwa wanaa sümaa nüküjaleeinña namüin na wayuu eʼrüinjanakana tü kasa anasü nüküjakalü achiki paala, nüküjain namüin nnojoluin suʼwanajaain tü kasa nüchekakat napüleerua, naaʼinrüin tia wanaa sümaa nüpansaajaleʼeinña maʼin nünüiki süchiki shiimain tü nümakat. 18 Naaʼinrüin tia shiiʼiree wachecheraʼaleeinña maʼin süchiirua tü kasa waʼatapajakat waya awataakana nünainmüin Maleiwa sünain achuntaa kaalinwaa nümüin. Nükatsüinrüin waaʼin sükajee tia, nnojoishi süpüla nüküjainjachin alawaa chi Maleiwakai, jama matüjain eeʼirataa sukuwaʼipa tü pütchi nüküjakat jee naaʼinreerü tü nüpansaajakat. 19 Tü kasa waʼatapajakat müsü saaʼalijakai saaʼin waaʼin* maʼaka saaʼalijünüin wanee anuwa sutuma karapin. Shiimain shikeraajeerüin tia jee nnojoleerü aʼwüinjaain shia, walateenakalaka süchikumüin tü kuluut soʼulujunakat tü kuatta suluʼukat tü aʼwaajüleekat Maleiwa. 20 Nia ekeroloko Jesús wapüleerua chamüin jee müsü neerutkai saaʼin wapüleerua wanee wopu jee yapasü shia nutuma wapüla, laülaashitchipa nia napüleerua na sacerdotekana süpüla kaʼikat süpüshuaʼa maʼaka nukuwaʼipa Melquisedec.