Génesis
17 Soʼu mekietsalüin shikii mekietsatmüin nuuyase Abrán, eeʼiyalaashi Jehová nümüin jee nümakalaka nümüin: «Taya chi Maleiwa Pülashikai maʼin, anakajaʼa poonoole sümaa tanüiki jee ayataʼaya wulein pukuwaʼipa. 2 Tapansaajeerü tanüiki pümaa jee watteena maʼin naalii na püikeyuukana tatuma».
3 Nüsapainkaka Abrán mmoluʼu jee ayataka naashajaain Maleiwa nümaa, anuu nünüiki nümüin: 4 «Tapansaajüin tanüiki pümüin, shiimain maʼin süshinjachin pia watta saalii wayuu. 5 Nnojoleechi Abrán münüin pia, shieerü pünüliaka joo Abrahán, jama süshinjachin pia tatuma watta saalii wayuu. 6 Watteena maʼin naalii püikeyuu tatuma jee watteerü saalii wayuu akumajaaka pünainjee, eejeena wayuu aluwataashii naʼakajee na püikeyuukana.
7 »Tekeraajeerü pümüin tü pütchi tapansaajakat pümaa, tekerajeeriaʼaya shia namüin na püikeyuu eejeenakana mapeena. Tia pütchi tapansaajakat süpülajatü tayainjachin Pümaleiwasein jee süpüla tayainjachin Namaleiwasein na püikeyuukana. 8 Taapeerü pümüin tü mmakat Canaán eejachire poʼonoʼowalin, taapeeriaʼaya tia mmakat namüin na püikeyuukana, juumainjeerü shia süpüla kaʼikat süpüshuaʼa. Tayeechi Namaleiwaseka na püikeyuukana».
9 Anuukalaka nünüiki Maleiwa nümüin Abrahán: «Anashi poonoole sümaa tü pütchi tapansaajakat pümaa, anashiʼiya noonoole sümaa tü pütchi tapansaajüitpakat na püikeyuu eejeenakana püchikumüin. 10 Anuu tü pütchi tapansaajüitpakat jümaa, tü poonooinjatkalü amaa jee tü noonooinjatkalü amaa na püikeyuukana: achotoonajatü süta nakorolo eekai tooloin jaʼaka. 11 Achotoonajatü süta nakorolo shiyaawase tü pütchi tapansaajüitpakat jümaa. 12 Achotoonajatü süta nükorolo chi eekai joʼuuin jaʼaka mekisatpa kaʼi nia. Müinjatü nukuwaʼipa jemeire nia jipialuʼu, nnojoire jüpüshin nia sümaa niyaʼlajuushin suulia wayuu wattajeʼewat. Jaaʼinrajatü tia namüin napüshuaʼa na jüikeyuukana. 13 Achotoonajatü süta nakorolo napüshuaʼa na tooloyuu joʼuukana jaʼaka otta chi eekai jümaa ayaʼlajuushikai saaʼu nneerü. Süpülajatü kaʼikat süpüshuaʼa tü pütchi tapansaajüitpakat jümaa süchiki süchotoonajatüin süta nükorolo wanee wayuu. 14 Outajachi wanee wayuu niyoutule süchiki nüchoteʼerüin süta nükorolo süka nnojolin noonooin sümaa tü pütchi tapansaajakat jümaa».
15 Anuukalaka nünüiki Maleiwa mapa nümüin Abrahán: «Nnojoishi Sarái müinjachin pia sümüin tü puʼwayuusekat. Sara müinjatü sünülia putuma. 16 Eʼreerü anaa tatuma, jemeyuleerü shia nümaa wanee püchon shiʼreetkalaka anaa sümaa watteenain naalii suuʼuliwoʼu. Eejeena wayuu aluwataashii naʼakajee na suuʼuliwoʼukana». 17 Nüsapainkaka Abrahán mmoluʼu naapaiwaʼaya tia, nüsirajakalaka sümaa müin nünüiki nüleʼeruʼu: «¿Jeʼratuaichi kachooin wanee wayuu eekai polooin shikii nuuyase? ¿Shiimainchejeʼe jemeyuleerüin Sara mekietsalüirüle shikii suuyase?».
18 Anuujeseʼe nünüiki Abrahán nümüin chi shiimainshikai suluʼu Maleiwain: «Jalia maa tamüin Ismael, anasü anale nukuwaʼipa putuma». 19 Anuupejeʼe nünüiki Maleiwa nümüin: «Jemeyuleeriaʼaya Sara tü puʼwayuusekat nümaa wanee püchon, piʼitaainjatü Isaac nünülia. Tapansaajeerü wanee pütchi nümaa, tapansaajeerü tia pütchikat waneepia namaa na nüikeyuukana. 20 Taapeeriaʼaya nümüin Ismael tü puchuntakat nüpüleerua, eʼreechi nia anaa tatuma. Kachonjeechi nia jee watteerü maʼin saalii nüikeyuu, polooshiijeena piamamüin shikiipüʼü wayuu eejeenaka nünainjee, watteetkalaka maʼin saalii nüikeyuu. 21 Nieechipejeʼe Isaac tapansaajüin amaa tü tanüikikat, nia chi püchon jemeyuleetka amaa Sara. Jemeyuleerü shia juyakat tüseena maaʼutpünaa yaa».
22 Nuʼunakalaka Maleiwa kettaapa nia suulia aashajawaa nümaa Abrahán. 23 Nuunejiraka Abrahán Ismael, chi nüchonkai, nuunejirüinña napüshuaʼa na tooloyuu joʼuushiikana nipialuʼu jee müshiʼiya na nüchepchia niyaʼlajakana. Nuunejirüin napüshuaʼa na wayuu tooloyuu nipialujunakana. Nüchotookoloko Abrahán süta nakorolo soʼu kaʼikat tia, wanaapünaa sümaa tü nuluwataakalü anain nia Maleiwa. 24 Mekietsat shikii mekietsatmüin nuuyase Abrahán soʼu süchotoonüin süta nukorolo 25 otta poloo apünüinmüin nuuyase Ismael, chi nüchonkai Abrahán, soʼu süchotoonuin süta nükorolo. 26 Achotoonüsü süta nükorolo Abrahán soʼu kaʼikat tia nümaʼaleeya Ismael, chi nüchonkai. 27 Achoteʼennüsiaʼaya süta nakorolo napüshuaʼa na wayuu tooloyuu nipialujunakana Abrahán, nala tooloyuu eekai joʼuushiin nipialuʼu jee müshiʼiya nala eekai niyaʼlajanain suulia wayuu wattajeʼewannuu.