Tü nüshajalakat Mateo
15 Narütkaakalaka nünainmüin Jesús waneinnua fariseo jee waneinnua karaloʼutamaajana chejeejana Jerusalénjee jee namaka nümüin: 2 «¿Jamüsü nnojotkaʼa naaʼinrüin na pikirajüinkana tü naaʼinrapuʼukat na wayuu namaiwajanakana? Jamüshiijaʼa naya nnojotsü noʼlojuin najapü süpüla ekaa».
3 Nümaka Jesús namüin: «¿Jamakaʼa nnojoliika joonooin sümaa tü nuluwataakalü anain Maleiwa shiiʼiree neʼe jaaʼinrüin tü naaʼinrapuʼukat na wayuu namaiwajanakana? 4 Eesü wanee pütchi nuluwataaka anain Maleiwa müsü mayaa: ‹Kojutu pümüin püshi sümaa pii›, eesü waneʼeya müsü mayaa: ‹Oʼutuneechi aaʼin chi mojukai anüiki nüchiki nüshi jee süchiki nii›. 5 Anuupejeʼe tü jümakat jiakana: ‹Chi wayuu eekai müin nümüin nüshi jee sümüin nii, «asülajüinjachiaa taya pümüin wanee kasa, taapüinjatpejeʼe tia nümüin Maleiwa». 6 Chi wayuu makai anüiki mayaa, nnojoluitpa choʼujaain nümüin kojutuinjanain nutuma na wayuu kachooinkana nia›, mataashii jümakai. Saaʼujee jaaʼinrüin tia, nnojoluitpa jaaʼinrüin tü nümakat chi Maleiwakai shiiʼiree neʼe jaaʼinreein tü naaʼinrapuʼukat na wayuu namaiwajanakana. 7 Wayuu piama oʼupünaachii jia, shiajaʼa makaʼa nünüiki Isaías chi nünüikimaajachikai Maleiwa sünain müin nünüiki jüchiki: 8 ‹Kojutayaashi neʼe taya natuma wayuukana naainnua süka nanüiki, wattapejeʼe naaʼin toulia. 9 Nnojotsü kasain saamüin namüin naʼwaajüin taya süka nekirajüin neʼe sünain kasa suluwataaka anain wayuu›». 10 Nuunejaka Jesús na wayuukana süpüla narütkaainjanain nünainmüin jee nümaka namüin: «Jülüjataa jaaʼin tanüiki süpüla jiyaawatüinjatüin saaʼu, 11 tü yarüttakalü atuma wanee wayuu nnojotsü shiain tü kasa nikakat, shia yarüttaka atuma nia tü pütchi nujuʼitirakat».
12 Narütkaakalaka na nikirajüinkana nünainmüin sümaa namüin nümüin: «¿Pütüjaa aaʼulu airuʼuluin namüin na fariseokana tü pümakat namüin?». 13 Anuujeseʼe nünüiki namüin: «Wanee wunuʼu eekai nnojoluin süpünajuushin nutuma chi Tashi iipünaajachikai, atuʼutuneerü suuralanainjee. 14 Ketshiireʼe naya, oʼunitshii naya sukuwaʼipa wayuu naashin, mapajeʼe moʼupaʼakai neʼe naaʼin. Jamüshijaʼa wanee wayuu eekai moʼupaʼain najattataale wane wayuu eekai moʼupaʼain wanaa nümaa, ojunuujiraweena piamaleʼeya suluʼu wanee ishi». 15 Nümakalaka Pedro nümüin: «Püküja maa wamüin kasain kayaawasein tü pümakat». 16 Nusoutaka Jesús nümüin: «¿Nnojotyülia jiyaawatüin saaʼu tü tamakat? 17 ¿Nnojotsükai jütüjaain saaʼu?, tü kasa nikakat wanee wayuu ashakatüsü nüleʼeruʼumüin, nüwünaʼapajaka shia mapa. 18 Eekajasaʼa tü pütchi nujuʼitirakat wanee wayuu suluʼujeejatü naaʼin, tia shia tü yarüttakalü atuma nukuwaʼipa. 19 Jamüsüjaʼa suluʼujee naaʼin wanee wayuu akumajaasü kasa eekai mojuin maʼaka saaʼin nuʼuteein saaʼin wayuu, kawalaʼateein nuʼwayuuse nutuma, nuʼluwajiraweein nukuwaʼipa,* nuʼluwajeein wanee kasa, nüküjeein alawaa süchiki wayuu jee müsia perulaa. 20 Shiaʼaya yarüttaka atuma nukuwaʼipa wanee wayuu tia. Eekajasaʼa niküle sümaa nnojoluin nuʼlojooin najapü, nnojotsü yarüttüin nukuwaʼipa sutuma tia».
21 Nuʼunakalaka Jesús yalejee suluʼumüin tü mmakat Tiro otta Sidón. 22 Eejatkalaka wanee wayuu kepiasü chaa suluʼu tia mmakat, wayuu feniciajeʼewat shia. Suʼwaataka nümüin Jesús: «Pümüliajaʼaya taya Señotkalee, piakai Nüchonkai David. Müliasü maʼin tachon sutuma Yolujaa», sümaka nümüin. 23 Koʼutapejeʼe neʼe Jesús suulia tü wayuukat. Narütkaaka na nikirajüinkana nünainmüin sümaa nachuntuin nümüin: «Püjünajaa türa wayuukot, woottakuʼu müsü wachiiruajee». 24 Anuujeseʼe nünüiki Jesús: «Ajütüüshi neʼe taya nanainmüin na wayuu kepiakana Israel, na makana aka saaʼin anneerü amülouisü». 25 Süsapainkaka tü wayuukot nümülatuʼu Jesús sümaa sümüin nümüin: «Pümüliajaʼaya taya Señotkalee». 26 Nümakalaka sümüin: «Nnojotsü anain süsütünüle wanee pan noulia na tepichicheinkana süpüla sujutunajatüin sümüin tü etcheinkat». 27 Anuujeseʼe sünüiki nümüin: «Aa, müsiaʼayan Señotkalee, ekapejeʼe tü etcheinkat wanee kasa eekai sujutuusüin saaʼujee nemeesain na kamüʼlüinshiikana». 28 Nümakalaka Jesús sümüin: «Nii waaʼiraa, kanoulakatche maʼin pia. Anasüjaʼamata piʼrüle tü kasa puchuntakat». Saawalaatüjütka süchon wayuukot soʼuleʼeya tia.
29 Süchikijee nuʼunuin Jesús chejee, nüntakalaka suluʼumüin wanee mma sotpaʼamüin tü palaakat Galilea, nuʼunaka saaʼumüin wanee uuchi. Sümaʼainruʼu yalajachin nia joyotuin, 30 süntapaaka nünainmüin Jesús watta saalii wayuu ayuuisümaajatü. Nantirüin chira eekai shalüʼütüin, chira eekai masaʼain, eekai matünain, chira eekai moʼupaʼain otta chira eekai manülin. Eʼitaanüshii naya nümülatuʼu jee anaka naya nutuma. 31 Ponusü maʼin saaʼin wayuu shiʼrapa kanülin na manüipuʼukana, anain nutuma wayuu eekai masaʼain jee eekai matünain, anainnapain na shalüʼütapuʼukana otta koʼuin na moʼupaʼapuʼukana. Naʼwaajakalaka chi Maleiwa aʼwaajünakai chaa Israel.
32 Neenajaka Jesús na nikirajüinkana sümaa nümüin namüin: «Aisü tamüin namüliala nala wayuukana süka apünüinnain naya kaʼi wamaa jee nnojotsü kasainjatüin neküin. Nnojoishii tajüteein naya sümaa jamü, jama noʼuchichajaʼaleere wopuluʼu sutuma jamü». 33 Namakalaka na nikirajüinkana nümüin: «Wattasü maʼin tü mma yaakalü aluʼu waya, ¿jalejeekuwalüinjatü wapüla pan süpüla shiküinjatüin tü wayuu wattakat maʼin saalii?». 34 Anuuka nünüiki Jesús namüin: «¿Jeʼra pan eeka jümaʼana?». Nasoutaka nümüin: «Akaratshisü neʼe pan sümaa palitchon jime». 35 Nuluwataakalaka Jesús na wayuukana süpüla naikaajaainjanain mmoluu jee süchikijee tia 36 naapaaka tü akaratshisükat pan sümaa tü jimecheinkat. Naapaka analuʼut nümüin Maleiwa saaʼu, nüshanaajaka shia jee naapaka shia namüin na nikirajüinkana süpüla neitajüinjatüin shia namüin na wayuukana. 37 Emiraka napüshuaʼa na wayuukana, sukotchojunaka akaratshisü kanaasüta miyoʼuyuu sümaajatü tü eküülü apütaasükat. 38 Eeshii maʼaka 4.000 tooloyuu ekakana soʼu tia, katata noulia na jieyuu jee na tepichi ekakana wanaa namaa. 39 Noʼunayaa namapa napüshuaʼa na wayuukana, noʼotooka Jesús suluʼu wanee anuwa jee nüntaka suluʼumüin tü mma kanüliakat Magadán.