Jonás
4 Aika tia nümüin Jonás, jashichika maʼin nia saalinjee. 2 Nuchuntaka Jonás nümüin Jehová sünain maa: «Nnaalein Jehová, shiayaain nnojotka tanteein atuma tia yaamüin, oʼunushijeseʼe taya chaa Tarsismüin, jama tatüjaain saaʼu piain wanee Maleiwa anamiakai, amülialaakai aaʼin saalin wayuu, matüjainsat ashapajawaa paaʼin, aisü püpüla wayuu otta mojusü paaʼin müliale shia piʼrüin. 3 Puʼuta pümata taaʼin Jehová, anaʼleekajaʼa outule taya suulialeʼeya yaakuʼu tamüin».
4 «¿Kasa jashichika maʼin aaʼujee pia?», nümakalaka Jehová nümüin.
5 Nuʼunakalaka Jonás suluʼujee tü pueulokot, nüikalaaka wüinpejee sünain, nukumajaka wanee lumachon, nüikalaaka suupünaa süpüla niʼrajüinjatüin sukua tü alatajatkat sümüin tü pueulokot. 6 Susotoko nutuma Jehová wanee müsü aka saaʼin suuʼulia wüüirü süpüla jemioushinjatüin naaʼu Jonás otta nnojoluinjachin müliain maʼin nia.
7 Shiasaʼa waneemüin kaʼi, jaʼyuupa kaʼikat nüjütaka chi shiimainshikai suluʼu Maleiwain wanee jokoma, shikakalaka tü makalü aka saaʼin suuʼulia wüüirü, jutkalaka shia. 8 Naaʼayulaapa chi kaʼikai, nüjütakalaka Maleiwa wanee joutai wüinpejee katurulasü maʼin, jaʼishaatashi maʼin chi kaʼikai nümüin Jonás, oʼuchichajaʼawaishi nia sutuma. Ayatüsia nuchuntuin outaʼairee sünain maa: «Anaʼleekajaʼa outule taya suulialeʼeya yaakuʼu tamüin».
9 «¿Jamüshi jashichikaʼa maʼin pia saaʼujee sujulujaain tü pulumasekat?», nümakalaka Maleiwa nümüin Jonás.
Nusoutaka Jonás nümüin: «Aa, jashichishiaʼaya taya, müshijeseʼe outeein taya». 10 Nümakalaka Jehová nümüin Jonás: «Aisü pümüin sujulujaain tü makalü aka saaʼin suuʼulia wüüirü, nnojotka püpünajalain, nnojotka miyoʼuin putuma, osotoko saʼwaijee jee jutka saʼwaijeʼeya. 11 Airejeʼeya tia pümüin, nayaleekajaʼa nnojoleematüin alin amüliala tamüin na wayuu kepiakana Nínive, alatüshii suulia 120.000 na wayuu kepiakana chayaa. Nnojotsü natüjaain aaʼu naya wayuukana anale jee mojule wanee kasa, aisiaʼaya tamüin sümüliala namüʼlüin».