Tü nüshajalakat Juan
21 Süchikijee tia, niiʼiyalaaka Jesús nüchikuaʼa namüin na nikirajüinkana chaa süʼütpaʼa tü palaa kanüliakat Tiberíades. Müsü sukuwaʼipa nutuma wanaa sümaa niiʼiyalaain. 2 Eejachi soʼu tia, Simón Pedro, Tomás chi «Senkeyuu» münakai, eejachi Natanael chi chejeʼewaikai Caná, tü mma chakat Galilea, eejanaʼaya na nüchonniikana Zebedeo otta müshiʼiya piamashii nikirajüin Jesús. 3 Anuujeseʼe nünüiki Simón Pedro namüin: «Anashi toʼunai sünain ejimejaa». Nasoutayaa namaka nümüin: «Oʼuneena waya pümaa». Oʼunushiijeseʼe naya, noʼotooko suluʼu tü anuwakat, masitpejeʼe naya soʼu aikat tia.
4 Shiasaʼa jaʼyuupa, chajachi Jesús sotpaʼa tü palaakat, nnojoipejeʼe nia nayaawatüin na nikirajüinkana. 5 Anuujeseʼe nünüiki Jesús namüin: «Tachonniwaa, ¿eeyaasükaijeʼe jime jiyaalujutü?». «Eetaayaai neʼe shia», namakalaka nümüin. 6 Nusoutakalaka Jesús namüin: «Jujuta tü jukusuinkat shikialuʼujee tü anuwakat, kasireena jia yala». Nojutapa tü nakusuinkat, shipirajaaka sümaa watta saalii jime, isasü nachiki nayuʼluin shia. 7 Niasaʼa chi nikirajüin Jesús aishikai maʼin nüpüla, nümakalaka nümüin Pedro: «Niasa nia chi Señotkai». Naapaiwaʼaya Simón Pedro nüchiki chi Señotkai, naʼatapünaakalaka nüsheʼin, jama masheʼin nia paala jee numuttaka shirokumüin tü palaakat. 8 Nayasaʼa na wane nikirajüinkana Jesús, oʼunushii suluʼu tü anuwa joʼuuchonkat. Najarattüin tü kusu wotusükat sümaa jime, jama pejejanain naya sünain tü sotkat palaa maʼaka neʼe saaʼin mekietsat shikii metro.
9 Nantapa sotpaʼamüin tü palaakat, neʼrakalaka süsijaanüin jime saaʼu shikemechi otta eejatü pan yala. 10 Anuujeseʼe nünüiki Jesús namüin: «Jüsaaja süpüshi tü jime jüsitkat». 11 Noʼotookoloko Simón Pedro suluʼu tü anuwakat, najarattaka anooipaʼamüin tü kusukat. Watta saalii jime miyoʼuyuu suluʼu, eejatü 153. Mayaainjeʼe wattain saalii tü jime eejatkat suluʼu, nnojotsü asüküijaain tü kusukat. 12 «Jalainna jikaiwa», nümakalaka Jesús namüin. Nnojoishi eein wanee nikirajüin, «¿Jarai pia?», makai nümüin, jama natüjaain saaʼu niain chi Señotkai. 13 Nürütkaakalaka Jesús, naapaaka tü pankat sümaa nülatirüin shia namüin. Akaataajaʼa tü jimekat, nülatirüin namüin. 14 Apünüintuaichi joo eeʼiyalaain Jesús namüin na nikirajüinkana süchikijee nüsoʼireʼennüin aaʼin.
15 Kettaapa neküin, nümakalaka Jesús nümüin Simón Pedro: «Simón, nüchonkai Juan, ¿alanaʼaleesia taalin püpüla suulia türa?». «Aa, Señotkalee, pütüjaa aaʼu alin pia tapüla», nümakalaka Pedro nümüin. Anuujeseʼe nünüiki Jesús nümüin: «Pikajeʼera tü taʼanneetsecheinkat». 16 Nüsakinnaka Pedro nüchikuaʼa nutuma Jesús: «Simón, nüchonkai Juan, ¿aishi taya püpüla?». «Aa, Señotkalee, pütüjaa aaʼu alin pia tapüla», nümakalaka Pedro nümüin. Anuujeseʼe nünüiki Jesús niʼipajee: «Pürüleeja tü taʼanneetsecheinkat». 17 Nüsakinnaka Pedro nüchikuaʼa nutuma Jesús, apünüintua joo süka tia: «Simón, nüchonkai Juan, ¿aishi taya püpüla?». Mojukalaka naaʼin Pedro sutuma «¿Aishi taya püpüla?», nümüin Jesús nümüin apünüintua. Müshijeseʼe nümüin Pedro nümüin Jesús: «Señotkalee, pütüjaa aaʼu kasa süpüshuaʼa, pütüjaa aaʼu alin pia tapüla». Anuujeseʼe nünüiki Jesús niʼipajee: «Pikajeʼera tü taʼanneetsecheinkat. 18 Shiimain tanüiki pümüin, jimaʼaliiwaʼaya pia, aʼanaapuʼushi pia püsheʼin jee oʼunapuʼushi pia eepünaweere puʼuneein. Eekajasaʼa laülaapeena pia, piyuruleerü pütüna süpüla saʼatünajatüin püsheʼin jee amaaneechi pia eere nnojolin puʼuneein». 19 Nüküjain tia Jesús süpüla nütüjaain saaʼu Pedro jamüinjatüin nukuwaʼipa sünain outaa süpüla kojutuinjachin Maleiwa nutuma. Jee süchikijee nüküjain tia, nümakalaka Jesús nümüin Pedro: «Ayataʼaya puushikajaain süchiirua takuwaʼipa».
20 Niirakaaka Pedro nüchiiruajee jee niʼrakalaka nürütkaain nanainmüin chi nikirajüin Jesús aishikai maʼin nüpüla. Niajaʼa chi aʼlainraakai sünain nuʼluuwain Jesús jee chi asakirakai nia sünain maa: «¿Señotkalee, jaraikai maʼin chi aapajachikai pikii?». 21 Anuujeseʼe nünüiki Pedro nümüin Jesús, niʼraiwaʼaya chi nikirajüinkai Jesús: «Señotkalee, ¿jameetkalaka nukuwaʼipa chise wachiiruajeekai?». 22 Anuukalaka nünüiki Jesús nümüin: «¿Jamüshi pütüjaweeka saaʼu tia? Müleka tachekülejeʼeya süpüleerua, eeshi süpüla yaain nia tapüla taleʼejaleepa. Ayata puushikajaain süchiirua takuwaʼipa». 23 Shiasaʼa suluʼujee tia, suʼwalakajaaka wanee pütchi naʼakapünaa na anoujashiikana süchiki nnojoluinjachin outuin chia nikirajüinkai Jesús. Nnojotsü nüküjain Jesús nnojoluinjachin outuin chia nikirajüinkai, anuupejeʼe tü nüküjakat: «¿Jamüshi pütüjaweeka saaʼu tia? Müleka tachekülejeʼeya süpüleerua, eeshi süpüla yaain nia tapüla taleʼejaleepa».
24 Taya chi nikirajüin Jesús aküjakai jee ashajakai süchiki tia otta sütüjaa aaʼu wayuu shiimain tü tamakat.
25 Wainma maʼin tü kasa naaʼinrakat Jesús, süshajünülejeʼeya süchiki tia, wotusüje tü mmapaʼakat* sutuma tü rooyo sümaajatkat.