Jueces

8 Anuujeseʼe nanüiki na nüikeyuukana Efraín nümüin Gedeón: «Mojusü tü paaʼinrakat wamüin. ¿Jamüshii nnojoliikaʼa paapirüin waya wanaa sümaa pushutüin naaʼu na madianitakana?». Jashichishii maʼin naya soʼu tia. 2 Nusoutakalaka Gedeón namüin: «¿Aashin sülanaʼaleeinña maʼin tü kasa jaaʼinrakat suulialeʼeya tü taaʼinrakat? ¿Aashin anale’einña maʼin süpütaala süchon tü uuwa natpajakat na nüikeyuukana Efraín suulialeʼeya süchon tü uuwa natpajakat na nüikeyuukana Abí-Ézer? 3 Sotoyaasükaijeʼe jaaʼin naapüin Maleiwa jümüin nikii Oreb, nikii Zeeb, na aluwataashiikana chaa Madián. Alanaʼaleesia maʼin tü kasa jaaʼinrakat suulialeʼeya tü kasa taaʼinrakat». Sujutajaakalaka tü jashieekat noulia naapapa tü nümakat Gedeón.

4 Nülataka Gedeón waneemüin saʼata tü süchikat Jordán. Mayaainjeʼe mapüsain maʼin nia wanaa namaa na 300 surulaat nümaajanakana, ayatüshiʼiya naya oushikajaain nachiirua na madianitakana. 5 Nuchuntakalaka kaalinwaa Gedeón namüin na wayuu chajanakana Sucot sünain maa: «Jikiraʼaya jümaa na wayuu tamaajanakana, mapüsashii maʼin naya. Oushikajaashi taya nüchiirua Zébah otta nüchiirua Zalmuná, na aluwataakana naaʼu na wayuu chakana Madián». 6 Anuujeseʼe nanüiki na aluwataashii chajanakana Sucot nümüin Gedeón: «Pütaʼülüichipajasaʼa Zébah nümaa Zalmuná wekirüinjanataaka na surulaat pümaajanakana». 7 Nusoutakalaka Gedeón neʼipajee sünain maa: «Naapapeena Jehová tamüin nikii Zébah nümaa Zalmuná, taʼyaajeena jia süka wunuʼu keipüsesü chakat isashiipaʼa saaʼujee müin jünüiki wamüin». 8 Nüntaka suluʼumüin tü pueulo kanüliakat Penuel, nujulijaka eküülü naaʼu na wayuu sulujunakana tia pueulokot. Mapejeʼe neʼe nanüiki naya wayuukana nümüin maʼaka nanüiki na chajanakana Sucot. 9 Anuujeseʼe nünüiki Gedeón namüin na wayuu chajanakana Penuel: «Tojuttireerü türa miichi miyoʼukat taleʼejapeena süchikijee akanajaa».

10 Eeshii maʼaka naaʼin 15.000 na surulaat eejanakana nümaa Zébah otta Zalmuná chaa Carcor, wüinpüjeʼewalii naya wayuukana. Nayaʼala neʼe apütaaka naya surulaatkana, jama noʼutunuin aaʼin paala 120.000 surulaat chajaruutamaajana. 11 Nuʼunakalaka Gedeón suluʼupünaa tü wopu noʼunawaikalü aluʼupünaa na wayuu oʼonooliikana, tü chakat wüinpüjee sünain tü mmakat Nóbah otta Jogbehá. Nushutaka naaʼu na niʼipolokana, nnojotsü eejüin naaʼin naya wayuukana. 12 Nüpantajaaka Zébah otta Zalmuná, eipinnapejeʼe naya nutuma Gedeón jee nütaʼülaka naya. Neimolojooyaa namaka napüshuaʼa na surulaat namaajanakana naya aluwataashiikana.

13 Shiasaʼa süchikijee tü atkawaakat nuʼunakalaka Gedeón, chi nüchonkai Joás, suluʼupünaa tü wopu chaʼwatkat Heres. 14 Nütaʼülaka wopuluʼu wanee jimaʼai chejeʼewai Sucot jee nüsakiijaka nia. Nüshajaka chia jimaʼaikai nanülia na aluwataashiikana jee nanülia na laülaashii chajanakana Sucot, akaratshi nekii akaratshimüin na wayuu nüshajakana anülia. 15 Nüntakalaka Gedeón namaʼanamüin na wayuu chajanakana Sucot jee nümakalaka namüin: «Anii tantirüin jümüin Zébah nümaa Zalmuná, na wayuu jimeʼerainpalakana aaʼujee taya paala. ‹Pütaʼülüichipajasaʼa Zébah nümaa Zalmuná wekirüinjanataaka na surulaat pümaajanakana sutuma mapüsain neʼe naya›, mataasü makai jünüiki tamüin». 16 Nütaʼülaka na laülaashii chajanakana suluʼu tia pueulokot jee niʼyaajaka naya süka wunuʼu keipüsesü. 17 Nujuttirakalaka tü miichi miyoʼu chajatkat Penuel jee nuʼuta aaʼinchii na wayuu chajanakana suluʼu tia pueulokot.

18 Nüsakinnakalaka Zébah nümaa Zalmuná nutuma Gedeón sünain maa: «¿Jeʼtshii maʼin na wayuu juʼutakana aaʼin saaʼu tü uuchikat Tabor?». Anuujeseʼe nanüiki nümüin: «Meematüshiʼiya aka paaʼin, müshii naya maʼaka naaʼin nüchooin wanee aluwataai». 19 Anuukalaka nünüiki Gedeón namüin: «Tawalayuusa naya makana jutuma, süchooin tei. Shiimain maʼin tanüiki jümüin, tü taküjakat nuʼupalamüin Jehová, chi Maleiwa matüjainkai outaa, nnojoishiije toʼutuin aaʼin jia nnojoliirejeʼeya juʼutuin naaʼin na tawalayuukana». 20 «Puʼuta naaʼin», nümakalaka Gedeón nümüin Jéter, chi nüchon epayaakai, nnojotkalaka niyuutuin Jéter tü chajaruuta eejatkat nümaʼana, jama mmoluin maʼin nia sutuma jintülin nia. 21 «Shiimainrejeʼeya tooloin maʼin pia, ¿jamakaʼa nnojoika piain oʼutuin waaʼin?», nümakalaka Zébah nümaa Zalmuná nümüin Gedeón. Noʼutunaka aaʼin nutuma Gedeón, naapaainjeseʼe Gedeón tü makalü aka saaʼin shiyaakua kashi eejatkat sunutpünaa tü kameeya neʼejenakat naya wayuukana.

22 «Anashi piale aluwataain waaʼu, anashi nuluwataale waaʼu chi püchonkai jee chi pülüinkai, jama puʼtteʼerüin waya noulia na madianitakana», namakalaka na israelitakana nümüin Gedeón. 23 «Nnojoishisa tayainjachin aluwataain jaaʼu otta nnojoishi niainjachin aluwataain jaaʼu chi tachonkai. Niainjachi Jehová aluwataaka jaaʼu», nümakalaka Gedeón namüin na israelitakana. 24 Nüikeyuu Ismael na wayuu akanajuukana soʼu tia. Aainjünawaisü tü sücheʼesekat neʼichi süka ooro, müshijeseʼe nümüin Gedeón namüin na israelitakana: «Anashii jaapüle tamüin waneʼewai jukua türa cheʼesaa jüshannaaka noulia na wayuu akanajuukana watuma». 25 «Jamüsaʼa shia, waapeerü pümüin», namakalaka nümüin Gedeón. Nawayalüinjeseʼe wanee kuluulu jee nojutaka saaʼu tü kuluutkat tü cheʼesaa nashannaakat. 26 Poloo mekietsatmüin kilo* saawain süpüshuaʼa tü sücheʼesekat shiʼichi wayuu aainjuushikat süka ooro, tü nuchuntakat paala Gedeón namüin na israelitakana. Katata suulia saawain tü makalü aka saaʼin shiyaakua kashi, tü cheʼesaakat, tü kuluulu aainjuushikat süka laana morado,* tü nasheʼinpuʼukat na aluwataashiikana chaa Madián jee katata suulia saawain süüliijana tü kameeyakat.

27 Naainjakalaka Gedeón wanee kuluulu kanüliasü efod,* niiʼiyataka tia kuluutkat sümüin wayuu suluʼu tü pueulo eejeʼewaire nia, tü kanüliakat Ofrá. Shiakalaka neʼe aʼwaajünüin tia kuluutkat natuma na israelitakana nuulialeʼeya Maleiwa. Kachajaalaka neʼe Gedeón namaa na wayuu kepiakana nümaa suluʼujee nukumajüin tia kuluutkat.

28 Nayakalaka laülaain na israelitakana naaʼu na wayuu chajanakana Madián. Nnojoliika neʼrüin wayumüin piantua na wayuu chajanakana Madián. Nnojotkalaka eein atkawaa chaa Israel soʼu pienchi shikii juya kataiwaʼaya noʼu Gedeón.

29 Nüleʼejaaka Jerubaal,* chi nüchonkai Joás chaa nipialuʼumüin, chaichireekaʼaya nia.

30 Watta saalii nuʼwayuuse Gedeón, akaratshikalaka nekii nüchooin. 31 Kachonkalaka wanee wayuu nutuma Gedeón chaa Siquem, Abimélec nünülia chi süchonkai. 32 Outakalaka Gedeón, chi nüchonkai Joás, eʼrüshi nia miyoʼuwaa. Niʼikünaka suluʼu naamaka chi nüshikai, chaa Ofrá, tü mma noumainkat na nüikeyuukana Abí-Ézer.

33 Outapa Gedeón, naʼwaajakalaka na israelitakana nachikuaʼa niyaakuairua chi maleiwayaashi kanüliakai Baal, naneekakalaka Baal-Berit süpüla namaleiwaseinjachin. 34 Eetaayaai sotuin naaʼin na israelitakana Jehová, chi Namaleiwasekai, eerejeʼe niain akaalinjain naya noulia na wayuu müliakana atuma naya. 35 Maalinsaliʼiya na nüpüshikana Jerubaal napüla na israelitakana, eerejeʼe naainjain watta saalii kasa anasü napüleerua.