Karaloʼuta namüinjatka na chajanakana Roma
5 Lotuitpa wakuwaʼipa noʼuluʼu chi Maleiwakai sünainjee kanoulain waya, anajiraainnapa waya nümaa nünainjee chi Waseñotsekai Jesucristo. 2 Sutuma kanoulain waya nünain Jesús, eeinnapa süpüla warütkaain nünainmüin Maleiwa jee anain wakuwaʼipa noʼuluʼu. Anashii talatüle waya, jama kojuteenain waya nutuma Maleiwa. 3 Jaʼitakajeʼe weʼrapa müliaa, talatüinjana waya, jama wachechereerüin waaʼin suluʼujee tia. 4 Wachecherüle waaʼin, talateechi Maleiwa wamaa. Talatüle naaʼin Maleiwa wamaa, eʼreena waya kasa anasü sünainjee tia. 5 Nnojoleerü mojuin waaʼin kanoulale waya sünain weʼreenain kasa anasü. Naapüin Maleiwa wamüin tü nüpülainkat süpüla watüjaain saaʼu alin waya nüpüla.
6 Aapajiraashi nikii Cristo saaʼu wayuu mojulaasü soʼu tü kaʼi aneekünatüjütkalia paala süpüla naaʼinrajatüin tia. Outushi nia saaʼu waainjala wanaa sümaa nnojolin jaralin akaalinjain waya. 7 Nnojoishi wayuu eekai naapajiraain nikii naaʼu wanee wayuu eekai lotuin akuwaʼipa, eepejeʼe chi eekai naapajiraain nikii naaʼu wanee eekai anamiain. 8 Saaʼujee alin waya nüpüla Maleiwa naapajiraain nikii Cristo waaʼu mayaainjeʼe kaainjaraliin waya. 9 Lotuitpa wakuwaʼipa noʼuluʼu Maleiwa sünainjee nüsha Cristo, woʼttaajeenaka soʼu tü kaʼi kasalajaneetkalü oʼu saainjala wayuu nutuma Maleiwa. 10 Mayaainjeʼe nüʼünüüpuʼuin waya Maleiwa, anajiraainnapa waya nümaa sünainjee naapajiraain nikii chi Nüchonkai waaʼu. Shiimainka woʼttaajeenain sünainjee naapajiraain nikii Jesús waaʼu, jama anajiraainnapain waya nümaa Maleiwa. 11 Akaʼaya joo waya, talatüshii sünainjee tü naainjakat Maleiwa wapüleerua nükajee chi Waseñotsekai Jesucristo, jama niain anajiraainnapain anainjee waya nümaa Maleiwa.
12 Kaainjalashii napüshuaʼa na wayuukana nünainjee waneeshia neʼe wayuu, outuinnaka naya suluʼujee tia. Aʼwalakajaasü tü outaakat naʼakapünaa napüshuaʼa na wayuukana, jama kaainjalain naya. 13 Nnojoishi süpüla kaainjalain wanee wayuu nnojorüle wanee kasa kasalajanainjachikai anainjee nia. Eetüjülia tü kaainjalaakat süpülapünaa saapünüin tü Pütchikat nümüin Moisés. 14 Aʼlaülaajaasü tü outaakat saaʼu wayuu nükalioʼujee Adán sünainmüinreʼeya nükalia Moisés. Aʼlaülaajaasia shia naaʼu na wayuu nnojoliikana aaʼinrüin tü kasa mojusü naaʼinrakat Adán wanaa sümaa kaainjalain nia. Eekajasaʼa Adán, meematüshi aka naaʼin chi antüinjachikai mapa.
15 Anasü maʼin tü kasa eekat sünainjee tü nüsülajalakat Maleiwa suulia tü kasa eekat sünainjee kaainjalain Adán, jama wattain naalii na wayuu outakana sünainjee naainjala. Wattapejeʼe naalii na wayuu anakana akuwaʼipa sünainjee tü nüsülajalakat Maleiwa. Kamaneeshi nia wamüin otta kamaneeshia Jesucristo. 16 Naata sümüin tü kasa eekat sünainjee tü nüsülajalakat Maleiwa suulia tü kasa eekat sünainjee naainjala Adán. Anapejeʼe maʼin tü nüsülajakat Maleiwa mapa mayaainjeʼe kaainjalain wayuu paala. Lotusü sukuwaʼipa wayuu noʼuluʼu Maleiwa sünainjee tia. 17 Sünainjee kaainjalain waneeshia neʼe wayuu aʼlaülaajaasü tü outaakat saaʼu wayuu süpüshuaʼa. Eekajasaʼa tü nümaneekat Maleiwa jee tü kasa nüsülajakat wamüin, alanaʼaleesia maʼin suluʼu anain shia jee loteerü wakuwaʼipa sutuma. Na wayuu aapüneenakana amüin tia kateerü noʼu nükajee Jesucristo jee aluwataajeena naya.
18 Kaainjalasü wayuu süpüshuaʼa nünainjee neʼe waneeshia wayuu. Eekajasaʼa sutuma anain tü kasa naainjakat waneeshia wayuu, loteerü sukuwaʼipa wayuu süpüshuaʼa jee kateerü soʼu. 19 Sünainjee nnojolin noonooin waneeshia wayuu kaainjalasü wayuu süpüshuaʼa. Aluʼujasaʼa sünainjee noonooin waneeshia wayuu, loteerü sukuwaʼipa wayuu süpüshuaʼa. 20 Tü Pütchi Aapünakat nümüin Moisés süpülajatü sütüjaanüin aaʼu wainmain saainjala wayuu. Wainmapa naainjala na wayuukana, amülialaʼaleesia maʼin naaʼin Maleiwa naalin. 21 Aʼlaülaajaasü tü kaainjalaakat saaʼu wayuu, outaka wayuu sünainjee tia. Eekajasaʼa sutuma kamaneein chi Maleiwakai sümüin wayuu, shiaitpa alanaʼaleeka tü nümaneekat naaʼu na wayuukana. Kateetkalaka soʼu wayuu waneepia suluʼujee tia nükajee chi Waseñotsekai Jesucristo.