Génesis

32 Ayatakalakaʼaya nuʼunuin Jacob, antiraashijeseʼe nia namaa na aapiee nümaʼanajeejanakana Maleiwa. 2 Anuukalaka nünüiki Jacob niʼraiwaʼaya na aapieekana: «Yaainjaʼa outkajaain na aapiee nümaʼanajeejanakana Maleiwa». Mahanaim nümakalaka Jacob sümüin tia mmakat.

3 Nuluwataakalaka Jacob wayuu nünüikeʼejana nümaʼanamüin Esaú chi nipayakai, chajachi nia kepiain Seír, wanee mma kanüliakalü Edom. 4 Anuukalaka tü nuluwataakalü anain na nünüikeʼejanakana: «Müinjatsa jünüiki nümüin Esaú chi tepayakai: ‹Nuluwataain waya Jacob chi püchepchiakai sünain maa: «Chajachi taya kepiain nümaʼana Labán, 5 eesüleʼeya paaʼa tooloyuu tamaʼana, kapüliiküseshi taya, eesü anneerü tamaʼana jee kachepchiashi taya. Tepayachee, taluwataainre tanüiki pümüin süpüla pütüjaainjatüin saaʼu jamüin takuwaʼipa jee süpüla kamaneeinjachin pia tamüin»›».

6 Naleʼejakalaka mapa nümaʼanamüin Jacob na nünüikeʼejanakana, anuukalaka nanüiki nümüin: «Chejeeshii waya nümaʼanajee Esaú, chi pipayakai, seeichikalaka nia sünain apanapaa pia namaa 400 wayuu». 7 Niimmolojookalaka Jacob sümaa shapaain naaʼin, nükatajakalaka na wayuu nümaajanakana, tü naʼanneesekalüirua, tü nükaaʼulainkalüirua, tü nüpaaʼasekalüirua jee müsia tü kameeyakalüirua, piamakalaka shiʼipa nutuma. 8 «Nushutule Esaú saaʼu tü palajatkat shiʼipa, isajeerü tü wane shiʼipakat», nümakalaka Jacob.

9 Nuʼuraajakalaka Jacob süchikijee tia sümaa müin nünüiki: «Maleiwakalee, Nümaleiwasekai Abrahán chi tatuushikai jee Nümaleiwasekai Isaac chi tashikai, ‹anashi püleʼejüle püchikuaʼa puumainpaʼamüin eere na püpüshikana aneetkalaka pukuwaʼipa tatuma› müshireʼeya pia tamüin Jehovákalee. 10 Kamaneeshi maʼin pia tamüin jee pikeraajüin süpüshuaʼa tü pümakat tamüin tayakai chi püchepchiakai, nnojoikalaka keraain taya süpüla paapüinjatüin tia tamüin. Waraarat neʼe tü eejatkat tamaʼana soʼu talatüin tü süchikat Jordán, eekajasaʼa jooluʼu wattaitpa saalii wayuu tamaa jee wattaitpa maʼin saalii tamüʼlüin, piamaitpa shiʼipa tatuma. 11 Tachuntuin pümüin pükaalinjainjachin taya suulia jamajüin taya nutuma Esaú chi tepayakai, mmotshireʼeya taya seema nüntüin tamaʼanamüin jee nushutuin taaʼu, jamajüin nutuma na jieyuukana namaʼaleeya na tepichikana. 12 ‹Aneerü pukuwaʼipa tatuma jee wainmeena maʼin na püikeyuukana maʼaka jasai eeka sotpünaa palaa, nnojotsü süpüla shiyaawajünüin süka wainmain maʼin shia›, müshinka pia tamüin».

13 Nutunkakalaka chaa eejachire nuʼuraajüin soʼu aikat tia. Süchikijee tia nüneekakalaka waneirua nümüʼlüin süpüla nüsülajüinjatüin shia nümüin Esaú, chi nipayakai. 14 Nüneeküin 200 kaaʼula jieyuu, piama shikii kaaʼula tooloyuu, 200 anneerü, piama shikii anneerü tooloyuu, 15 apünüin shikii kameeya sümaʼaleeya süchonnii, pienchi shikii paaʼa, poloosü paaʼa tooloyuu, piama shikii püliikü jieyuu jee poloosü püliikü tooloyuu.

16 Katataʼawaika nutuma tü nümüʼlüinkalüirua jee naapakalaka shia namüin na nüchepchiakana sümaa nümüin namüin: «Anakajaʼa juʼunule tapüleerua, wattaawainjana jia noulia na akoʼulirakana tü mürütkalüirua jüpüleerua jee noulia na akoʼulirakana shia jüchiiruajee». 17 Anuukalaka nünüiki nümüin chi akoʼulirakai tü mürütkalüirua palajana: «Püntiraale nümaa Esaú, chi tepayakai jee nüsakittaale pia sünain maa pümüin: ‹¿Jara kachepchiaka pia? ¿Jalaʼwai pia? ¿Jara kamüʼlüinka tü mürüt pukoʼulirakat?›, 18 asoutajachi pia nümüin sünain maa: ‹Nia talaamainka Jacob chi püchepchiakai. Eekajasaʼa mürütkalüirua tüü nüsülajala shia pümüin Jacob, pümüinjatü piakai Esaú. Iseeyüiya nia alüʼülaain wachiiruajee›». 19 Nuluwataainña chi nüchepchia akoʼulirakai tü mürütkalüirua nüchiirua chi akoʼulitshikai shia palajana jee chi akoʼulirakai shia nüchiiruajee, müsia nünüiki namüin napüshuaʼa na akoʼulirakana tü mürütkalüirua. Anuu nünüiki namüin: «Müinjatü jünüiki nümüin Esaú jüpanapajiraapa nümaa 20 jee anuu joo jünüikinjatü nümüin: ‹Iseeyüiya wachiiruajee Jacob chi püchepchiakai›». Naaʼinrüin tia Jacob süka müin nünüiki nüleʼeruʼu: «Nuuʼulaale suulia jashichin nia tamüin süka tasülajüin wanee kasa nümüin, eeshijaʼa kamaneejeechire nia tamüin tantiraapa nümaa». 21 Noʼunakalaka na nüchepchiakana nüpüleerua sünain akoʼuliraa tü mürütkalüirua, niakalaka makatüin Jacob soʼu aikat tia chaa eejachire nukumajüin tü nipiayaasükat.

22 Nütamaakalaka Jacob kaʼlepa maʼin aikat, nümaakalaka tü piamasükat nuʼwayuuse jee tü piamasü achepchiee aapünakat nümüin süpüla kachooinjachin nia sümüin namaʼaleeya na polooshiikana waneemüin nüchonnii. Oʼunushijeseʼe nia shirokupünaa tü süchi kanüliakat Jaboc, alatüshi nia eere epetüin tü wüinkat. 23 Müsü sukuwaʼipa nutuma Jacob süpüla nülatirajanain naya waneemüin saʼata tü süchikat, nülüʼüjaleeinña süpüshuaʼa tü kasa eejatkat nümaʼana.

24 Nüpütüüpa Jacob nümüiwaʼa, naapiraakalaka nümaa wanee wayuu suwasajaʼaleepaʼaya aikat. 25 Niyaawatapa saaʼu chi wayuukai nnojoleechin niyamüluuin Jacob nutuma, nüjüʼttakalaka tü niipüse nüpoolonoinkalü antiraaka sümaa tü niipüse nüpüʼünainjeekat, sujuttaʼaleeka nutuma chi wayuukai tü niipüse nüpüʼünainkat Jacob wanaa sümaa naapiraain nümaa. 26 Anuukalaka nünüiki chi wayuukai nümüin Jacob: «Püjüta tachiki, awasajaairü aikat». «Tajütaleejeechi achiki pia puchuntapa wanee anaa tapüleerua», nümakalaka Jacob nümüin chi wayuukai. 27 Asakinnüshijeseʼe Jacob nutuma chi wayuukai: «¿Kasaichi pünülia?». «Jacob tanülia», nümakalaka nümüin. 28 Anuukalaka nünüiki chi wayuukai nümüin Jacob: «Müichia nnojolin Jacob münüin pia, Israel münüinjachi joo pia süka paapiraain nümaa Maleiwa jee sümaa wayuu, puuntakalaka piʼrüin anaa suluʼujee tia». 29 Anuukalaka nünüiki Jacob nümüin chi wayuukai: «Püküja maa tamüin kasaichin pünülia». «¿Jamüsü pütüjaweekaʼa saaʼu kasaichin tanülia?», nümakalaka chi wayuukai. Achuntushijeseʼe nia anaa nüpüleerua Jacob yalaʼaya neʼe eejanale naya. 30 Penielkalaka sünülia tia mmakat nutuma Jacob süka müin nünüiki: «Nnojoishi taya outuin mayaainjeʼe teʼrüin nuʼupünaa Maleiwa».

31 Alatüshi Jacob Penielpünaa* wanaa maʼin nümaa nujuʼituin kaʼikai, shalüʼütüshi nia sünain oʼunaa süka alin nümüin tü nüpüʼükat. 32 Suluʼujee tia nnojotsü neküin maaʼulu yaa na nüikeyuukana Israel süsüla süpüʼü tü mürüt eekai neküin eʼiruku süka yalain shia eere süntiraain shiipüse süpoolo sümaa tü shiipüsekat süpüʼü. Shia nüjüttaka tia süsülakat chi wayuukai soʼu naapiraain nümaa Jacob.