Génesis

46 Nuutkajeʼerakalaka Israel napüshuaʼa na wayuu nipialujunakana jee nuʼunakalaka namaa. Nüntapa chamüin Beer-Seba nuʼutakalaka saaʼin mürüt süpüla naʼajüinjatüin shia nümüin chi Nümaleiwasekai Isaac, chi nüshikai. 2 Makalaka niʼrakai saaʼin Israel wanee kasa aipaʼa nutuma Maleiwa sümaa nuunejüin nia: «¡Jacob! ¡Jacobkalee!». «¡Anii taya!», nümakalaka nümüin. 3 Nusoutakalaka Maleiwa nümüin: «Tayasa chi shiimainshikai suluʼu Maleiwain, Nümaleiwase taya chi püshikai. Nnojo mmoluin pia saaʼu puʼunuin Egiptomüin süka watteenain naalii püikeyuu tatuma chamüinña. 4 Oʼuneechi taya pümaa Egiptomüin jee tantireechi pia püchikuaʼa yaamüin. Nieechikalaka asürülüin poʼu José pünaajaapa».

5 Nuʼunakalaka Jacob Beer-Sebajee süchikijee tia. Nayasaʼa na nüchonniikana Jacob noʼotokalaka chi nashikai suluʼu tü eʼejetuu nülüʼüjirakat paala faraón süpüla neʼejenainjatüin shia, noʼotoleeinña na nachonniikana sümaʼaleeya tü naʼwayuusekalüirua suluʼu tia eʼejetuukat. 6 Namaaka tü namüʼlüinkat sümaʼaleeya süpüshuaʼa tü kasa eejatkat namaʼana chaa suluʼu tü mmakat Canaán. Shia sukuwaʼipaka tia süpüla nüntajachin Jacob Egiptomüin namaʼaleeya napüshuaʼa na nüpüshikana. 7 Nümaashii na nüchonniikana namaʼaleeya na nüikeyuukana, antüshi nia Egiptomüin namaa napüshuaʼa na nüpüshikana.

8 Anuu nanülia na nüchonnii Israel antakana Egiptomüin, nayajaʼa na nüchonniikana Jacob. Nia Rubén chi niʼirumakai Jacob.

9 Naya nüchonniika Rubén Hanok, Palú, Hezrón jee müshia Carmí.

10 Naya nüchonniika Simeón Jemuel, Jamín, Ohad, Jakín, Zóhar jee müshia Shaúl, süchon nia wanee wayuu chejeʼewat Canaán.

11 Naya nüchonniika Leví Guersón, Cohat jee müshia Merarí.

12 Naya nüchonniika Judá Er, Onán, Selá, Pérez jee müshia Zérah. Outapejeʼe Er nümaa Onán chaa suluʼu tü mmakat Canaán.

Nayakalaka nüchonniin Pérez Hezrón nümaa Hamul.

13 Naya nüchonniika Isacar Tolá, Puvá, Yob jee müshia Simrón.

14 Naya nüchonniika Zabulón Séred, Elón jee müshia Jahleel.

15 Naya makana naya na nüchonniikana Jacob sümüin Lea chaa Padán-Aram, eejatiaʼaya wanee nachon kanüliasü Dina. Apünüin nekii apünüinmüin napüshuaʼa na nüchonniikana Jacob sümüin Lea.

16 Naya nüchonniika Gad Zifión, Haguí, Suní, Ezbón, Erí, Arodí jee müshia Arelí.

17 Naya nüchonniika Aser Imná, Isvá, Isví jee müshia Berías, Sérah sünülia tü nawalakat.

Nayaka nüchonniin Berías Héber jee müshia Malkiel.

18 Naya makana naya na süchonniikana Zilpá, tü nüchepchia Labán naapakat sümüin Lea tü nüchonkat. Polooshii aipiruamüin napüshuaʼa na nüikeyuukana Jacob sümaa Zilpá.

19 Nia José nümaa Benjamín na süchonniikana Raquel tü nuʼwayuusekat Jacob.

20 Nia Manasés nümaa Efraín na nüchonniikana José suluʼu tü mmakalü Egipto sümüin Asenat tü nüchonkat Potifera, chi sacerdotekai suluʼu tü mmakalü On.

21 Naya nüchonniika Benjamín Bela, Béker, Asbel, Guerá, Naamán, Ehí, Ros, Mupim, Hupim jee müshia Ard.

22 Naya makana naya na nüchonniikana Jacob sümüin Raquel. Polooshii pienchimüin napüshuaʼa na nüikeyuukana Jacob sümaa Raquel.

23 Nia Husim chi nüchonkai Dan.

24 Naya nüchonniika Neftalí Jahzeel, Guní, Jézer jee müshia Silem.

25 Naya makana naya na süchonniikana Bilhá, tü nüchepchia Labán naapakat sümüin Raquel tü nüchonkat. Akaratshishii napüshuaʼa na nüikeyuukana Jacob sümaa Bilhá.

26 Aipirua nekii aipiruamüin na nüikeyuu Jacob antakana Egiptomüin, shia nnojotka ayaawajünüin naʼwayuuse na nüchonniikana. 27 Piamashii na nüchonnii José chajanakana joʼuuin Egipto. Akaratshishii nekii napüshuaʼa na nüpüshi* Jacob antakana Egiptomüin.

28 Nüjütünakalaka Judá palajana nutuma Jacob süpüla nüküjainjachin nümüin José noʼunuin chai nakua suluʼu tü mmakat Gosén. Shiasaʼa nantapa suluʼumüin tü mmakat Gosén, 29 nikeraajitkalaka José tü neʼejenakat, nuʼunakalaka Gosénmüin süpüla nüntiraain nümaa Israel chi nüshikai. Mayaashi nüntüin nümaʼanamüin nukoʼojooko nünain, kamaʼaka maʼin nia sünain aʼyalajirawaa nümaa. 30 Anuukalaka nünüiki Israel nümüin José süchikijee tia: «Anaichipajaʼa süka teʼrüin pia jee tatüjaain saaʼu katüin poʼu, keraataainjaʼa jooluʼu taya süpüla outaa».

31 Naashajaakalaka José namaa na nuwalayuukana jee namaa na nüpüshikana chi nüshikai sümaa nümüin namüin: «Anakajaʼa toʼunule nümaʼanamüin faraón taküjaiwa nümüin tü kasa alatakat, anuujeetka tanüiki nümüin: ‹Antüshiisaʼa na tawalayuukana namaʼaleeya na nüpüshikana chi tashikai chajanakana suluʼu tü mmakat Canaán. 32 Wayuusa arüleejülii naya jee kamüʼlüinshii naya paaʼa. Antüshii naya sümaa naʼanneetse, sümaa napaaʼase jee sümaa süpüshuaʼa tü kasa eekat namaʼana›. 33 ‹¿Kasa jütüjaka apüleerua?›, nümapa faraón jümüin nuunejirapa jia, 34 asoutajana jia nümüin sümaa müin jünüiki: ‹Waya püchepchiakana arüleejülii waya paaʼa sümaa anneerü tepichijaiwaʼaya waya, mapuʼusia nakuwaʼipa na watuushinuukana wapüleerua›. Nuuʼulaweetka faraón kepiain jia suluʼu tü mmakat Gosén süka nalerajüin na egipciokana na wayuu arüleejüliikana anneerü».