Chiiruaajatka karaloʼuta nüshajalaka Juan
1 Pütchikat tüü tashajala tayakai laülaashikai, pümüinjatü piakai tawala Gayo, shiimain alin pia tapüla.
2 Tawala aishikai tapüla, oʼuraajawaishi taya nümüin Maleiwa süpüla ayatüinjatüin anain sukuwaʼipa süpüshuaʼa tü paaʼinrakat otta nnojolinjachin pia ayuulin, oʼuraajüshiaʼaya taya süpüla ayatüin anain pukuwaʼipa. 3 Atalatalaasü maʼin taaʼin soʼu yaajeeinkain na wawalayuukana jee naküjain tamüin ayatüin punoujain sünain tü pütchi shiimainkat sümaa ayatüin paapaain sümaa. 4 Müshii jia maʼaka naaʼin tachonnii tamüin, talatüsüjeseʼe taaʼin taapapa süchiki ayatüin jaapaain sümaa tü pütchi shiimainkat.
5 Tawala aishikai tapüla, anasü tü paaʼinrakat napüleerua na wawalayuukana mayaainjeʼe nnojoliin piʼraajüin naya. 6 Naküjain namüin na wawalayuukana kamaneein pia namüin. Pükaalinja maa naya wamüin noʼunapa nachikuaʼa, paaʼinra tia wanaapünaa sümaa tü anakat noʼuluʼu Maleiwa. 7 Oʼunushii naya süpüla yootuinjanain naya sümaa wayuu süchiki nünülia Maleiwa sümaa nnojoluin jülüjain naaʼin saapünajatüin wanee kasa namüin natuma na nnojoliikana judíoin. 8 Suluʼujee tia, kamaneeinjana waya namüin naya wawalayuukana süpüla waʼyanaajiraain namaa sünain aküjaa tü pütchi shiimainkat.
9 Ashajüshinka taya namüin na wawalayuu chakana outkajaain pümaa. Niasaʼa Diótrefes mojutusalii waya nümüin, niyouta achikit tü wamakat, jama niain alanaweein juulia. 10 Toʼunule chaa jümaʼanamüin, taküjeerü achiki tü kasa mojusü naaʼinrakat. Aküjakuʼu müshi kasa mojusü wachiki. Nnojoishi kamaneein namüin na wawalayuu antakana. Kamaneweere na wawalayuukana namüin na antüshiikana, niyouta achikit tia jee nüjünajaweein naya wawalayuukana naʼakajee na anoujashiikana.
11 Tawala aishikai tapüla, nnojo püshatüin wanee kasa eekai mojuin, shia püshata tü kasa eekai anain. Chi wayuu aaʼinrakai tü kasa eekai anain, nümaʼanajeejachi Maleiwa. Eekajasaʼa chi aaʼinrakai tü kasa eekai mojuin, nnojoishijaʼamata niʼraajüin Maleiwa. 12 Shiimain tü namakat napüshuaʼa na wawalayuukana nüchiki Demetrio, pansaasü nukuwaʼipa wanaapünaa sümaa tü shiimain ekirajünakat nüchiki Maleiwa. Anasiaʼaya wanüiki nüchiki, pütüjaa aaʼu shiimain tia wamakat.
13 Eesia sooʼomüin tü kasa tashajeekat pümüin, nnojotpejeʼe karaloʼutaluweein shia tatuma. 14 Anashi tayale oʼunuin chaa pümaʼanamüin süpüla taashajaainjachin pümaa.
Kasataalejeseʼe jimatüin paaʼin.
Nasaküin pia na waʼaleewainyuukana, püsakai tamüin waneʼewai nakua na wawalayuu chakana chayaa.