Karaloʼuta namüinjatka na chajanakana Éfeso

4 Tayakai Pablo püreesashi süka toushikajaain süchiirua nukuwaʼipa chi Señotkai, tachuntuin maʼin jümüin süpüla anainjatüin jukuwaʼipa, jama jüneekuushin nutuma chi Maleiwakai. 2 Nnojoluinjatü yaletüin jaaʼin, wayuuinjana anamia jia, nnojoliinjana jia kashapajaaraliin, jülatira sooʼopünaa jaaʼin naainjala na waneinnua sümaa alin naya jüpüla. 3 Paaʼinwashii jia sutuma eein tü nüpülainkat Maleiwa jaaʼu, jüchajaa maʼin sukuwaʼipa süpüla ayatüinjanain kottuin jia sümaa anajiraain jia. 4 Kottushii* waya sünain tü anoujaakat, waneesia neʼe tü nüpülainkat Maleiwa, waneesia neʼe tü kasa waʼatapajakat jee nüneeküin waya Maleiwa süpüla naapajatüin shia wamüin. 5 Waneeshia neʼe chi Señotkai, wanaawasü tü wanoujakalü anain nüchiki jee waneesia neʼe sukuwaʼipa tü woutiisaakat. 6 Waneeshia neʼe chi Maleiwakai, nia Süshika wayuu süpüshuaʼa, nia laülaaka saaʼu kasa süpüshuaʼa. Naaʼinrüin wanee kasa wakajee wapüshuaʼa wayakana jee naaʼinrüin wanee kasa sükajee kasa süpüshuaʼa.

7 Kamaneeshi chi Maleiwakai wamüin waneʼewai wakua, nia Cristo aapaka wamüin tia waneʼewai wakua. 8 Anuu tü sümakat tü Karaloʼuta Nüchikimaajatkat Maleiwa: «Wanaa sümaa nuʼunuin iipünaamüin, taashishii nutuma na püreesakana jee müshii nüsülajakai naaʼin». 9 ¿Jamaluʼutche tü pütchikat «wanaa sümaa nuʼunuin iipünaamüin» makat? Eekajasaʼa tia maluʼulu yaapuʼuin nia yaa mmapaʼa. 10 Chi ashakatakai iipünaajee niaʼaya neʼe chi oʼunakai chaa sirumatuʼumüin süpüla shikeraajüinjatüin kasa süpüshuaʼa nutuma.

11 Eeshii na niʼitaakana süpüla aluwataaushinjanain naya, eeshii na nünüikimaajanakana Maleiwa, eeshii na aküjaliikana pütchi jee eeshii waneinnua nüneekakana süpüla jülüjain naaʼin* nanoula na anoujashiikana otta eeshii na ekirajüliikana. 12 Niʼitaain naya süpüla nanoutuin nakuwaʼipa na anoujashiikana, süpüla nakaalinjain na waneinnua jee süpüla nakatchinrüin nanoula na anoujashiikana, na makana aka saaʼin nütapaʼa Cristo. 13 Naaʼinreerü tia waneʼereeya paaʼinwapa waya sünain anoujaa jee watüjaapa maʼin saaʼu nüchiki chi Nüchonkai Maleiwa, süpüla müinjatüin wakuwaʼipa maʼaka nukuwaʼipa wanee wayuu eekai nütaralaaichin, maʼaka nukuwaʼipa Cristo. 14 Anakajaʼa nnojorüle müin wakuwaʼipa maʼaka sukuwaʼipa tepichi suulia wemeejünüin sutuma wayuu eekai kemeejaralüin, suulia majüin wakuwaʼipa maʼaka sukuwaʼipa wanee anuwa yalejewaain makat sutuma sümüna palaa jee sutuma joutai. 15 Eekajasaʼa wayakana waküjainjatü tü shiimainkat sümaa alinjatüin wayuu wapüla süpüla laülaainjatüin waaʼin jee süpüla paaʼinwainjanain waya nümaa Cristo, chi wekiipüʼükai. 16 Müshii waya maʼaka saaʼin sukuwaʼipa nütapaʼa wanee wayuu, paaʼinwashii waya nümaa Cristo. Tü kasa sünainkat nütapaʼa wanee wayuu, aʼyataajiraasü süpüla eeinjatüin wanee kasa choʼujaakat sümüin niʼiruku. Suluʼujee tia anasü sukuwaʼipa tü nütapaʼakat wanee wayuu, akaajaʼa neʼe wayakana, aijiraweena waya.

17 Müshijeseʼe tamüin jümüin jee tachuntuin maʼin jümüin saaʼu nünülia chi Señotkai süpüla nnojoluinjatüin müin jukuwaʼipa maʼaka nakuwaʼipa na manoujainsaliikana. Nnojotsü kasain suluʼuin nekii naya wayuukana. 18 Müsü kojokoi saaʼin piʼyuushi naaʼu* naya wayuukana jee wattaluʼushii naya suulia tü akuwaʼipaa nümaʼanajeejatkat Maleiwa, jama nnojoluin kasain natüjaain aaʼu jee wayuu iche aaʼinchii naya. 19 Süka nnojoluitpain wulein tü suluʼukat naaʼin, maapülinsalii neʼe naya sünain aaʼinraa kasa mojusü* jee shia neʼe naaʼinraka wanee kasa eekai yarüttüin maʼin süka shiain suchuntaain maʼin naaʼin tia.

20 Ekirajünapejeʼe jia sünain nnojoluin müin nukuwaʼipa Cristo, 21 jütüjaa aaʼu tia müleka shiimainrejeʼe jaapüin nüchiki jee shiimainrejeʼe jikirajünüin nüchiki wanaapünaa sümaa tü pütchi nikirajakalü anain Jesús. 22 Aküjünüsü jümüin juuʼulaainjanain suulia tü jukuwaʼipapuʼukat, tü kasa jaaʼinrapuʼukat paala, tü amojujaakalü atuma jukuwaʼipa sutuma suchuntaain maʼin jaaʼin tia. 23 Ayataʼaya jiiʼiratüin tü jülüjakat jaaʼin, 24 jeketüinjatü tü jukuwaʼipakat wanaapünaa sümaa tü nüchekakalü achiki Maleiwa. Pansaasü tia sümaa tü lotookalü akuwaʼipaa jee tü oonowaakat waneepia nümüin Maleiwa.

25 Süka juuʼulaainnapain suulia süpüshuaʼa tü alawaakat, jüküjiraainjatü tü shiimainkat, jama paaʼinwajiraain jia jüpüshuaʼa. 26 Nnojo jaainjain kasa mojusü wanaa sümaa jashichin jia. Anashi nnojoire nikeroluin chi kaʼikai sümaa ayatataain jia jashichin. 27 Jalia jia nuulia chi Yolujaakai suulia nootuin jia sünain aaʼinraa kasa mojusü. 28 Chi wayuu eekai aʼluwajüin, anashi nuuʼulaale suulia aʼluwajaa. Anashi niʼyataale maʼin sümaa anainjatüin sukuwaʼipa tü niʼyataainkat nutuma süpüla eeinjatüin nümaʼana tü kasa naapajatkat nümüin chi wayuu choʼujaakai amüin wanee kasa. 29 Nnojotsü jujuʼitirüinjatüin wanee pütchi eekai mojuluʼuluin. Jükatchinra naaʼin na waneinnua süka tü pütchi jüküjakat wanaapünaa sümaa tü kasa choʼujaakat namüin jee anainjatü nakuwaʼipa na wayuu aapajakana jünüiki. 30 Nnojo mojuin naaʼin chi Maleiwakai jutuma sükajee jiyoutuin süchiki tü nüpülainkat, tü aneekünakalü akajee jia süpüla tü kaʼi taashinjanakalü oʼu atumawaa jia.

31 Anashii juuʼulaale suulia jashichikuʼu jümüin, suulia üttüin jaaʼin jee suulia ülüttüin jaaʼin, nnojo woottakuʼu jümüin jee nnojo juchuntuin pütchi eekai airuʼuluin otta juuʼulaa suulia wanee kasa eekai mojuin. 32 Shia anaka aluʼu kamaneejiraale jia, jümüliajiraale otta motomaatüle jaaʼin tü kasa mojusü aainjünakat jümüin maʼaka motomaatüin naaʼin Maleiwa nükajee Cristo tü kasa mojusü jaaʼinrakat.