Chiiruaajatka karaloʼuta namüinjatka na chajanakana Tesalónica
2 Tawalayuwaa, jütüjaa aaʼu nüntajachin chi Waseñotsekai Jesucristo jee kotteenain waya nümaa, müshiijeseʼe wachuntuin jümüin 2 nnojoluinjatüin sumojujaain jukuwaʼipa otta nnojo jüinkuuin aaʼin sutuma wanee pütchi eekai müin nümaʼanajeejatiaakai saaʼin Maleiwa jee shiale sutuma süküjünüin jümüin wanee pütchi, shialejeʼeya wanee karaloʼuta eekai müin wamaʼanajeejatkai saaʼin, eere waküjain jümüin süntüitpain tü nükaliakat Jehová.*
3 Jalia jia shimeejaʼalayaai wayuu, eʼnneechi amüin Maleiwa sutuma wayuu süpülapünaa süntüin tü nükaliakat otta eeʼiyalaajeechi chi wayuu eʼrüikai wayumüin, chi ajaʼttinnajachikai. 4 Peʼipaashi nia nümaa Maleiwa jee alanaʼaleesia maʼin nukuwaʼipa suulia wanee kasa eekai sümaleiwasein wayuu jee suulia wanee kasa aʼwaajünaka sutuma wayuu, müshijeseʼe nüikalaain suluʼu tü aʼwaajüleekat Maleiwa jee nüküjain suʼupala wayuu maleiwain nia. 5 ¿Nnojotsükai sotuin jaaʼin taküjapuʼuin süchiki tia jümüin chaiwaʼaya taya jümaa?
6 Jütüjaaitpa aaʼu kasain ataʼülüin nukuwaʼipa chi mojulaashikai süpüla niiʼiyalaainjachin soʼu tü kaʼi eʼitaanatüjütkalia nüpüla. 7 Eeitpa tü kasa mojusü naaʼinrakat chi wayuu mojulaashikai, tü nnojotkalü atüjaanüin aaʼu, waneʼereeya sütüjaanüin aaʼu tia kasa mojusü naaʼinrakat nnojoitpa chi wayuu ataʼülakai nukuwaʼipa. 8 Sütüjaaneetkalaka aaʼu jaralin chi wayuu mojulaashikai, chi ajaʼttinnajachikai nutuma chi Señotkai Jesús sükajee kaawain maʼin tü pütchi nujuʼitirakat* jee ajaʼttinneechi nia sütüjaapa saaʼu wayuu yaaichipain Jesús. 9 Eeshi chi wayuu mojulaashikai sükajee naaʼinrüin Satanás wainma kasa pülasü jee nuuʼulakayaain naaʼinrüin kasa pülasü, nnojotpejeʼe shiimain tia 10 otta wainma kasa mojusü nimeejaka akajee na wayuu müinnamaʼaleeinjanakana saalinjee nnojoliin naapaain sümaa tü pütchi shiimain ekirajünakalü anain naya, tü katüinjatkalü atuma noʼu. 11 Nuuʼulaainjeseʼe Maleiwa nemeejünajanain shiiʼiree nanoujain sünain tü alawaa aküjünakat namüin. 12 Kasalajaneetkalaka namüin napüshuaʼa naya wayuukana nnojoliin nanoujain sünain tü pütchi shiimain ekirajünakalü anain naya, jama shiain anain neʼe namüin naaʼinrüin kasa mojusü.
13 Tawalayuwaa, aapajanaʼaya waya analuʼut waneepia nümüin Maleiwa jaaʼu, jia wawalayuu aishiikana nüpüla Jehová,* jama nüneekatüjüliin jia paala Maleiwa süpüla juʼtteʼennajanain. Wuleitpakalaka jukuwaʼipa nutuma sükajee tü nüpülainkat otta sükajee junoujain sünain tü pütchi shiimainkat. 14 Nüneeküin jia Maleiwa sükajee tü pütchi anakat maʼin* waküjaka jümüin süpüla kojutuinjanain jia wanaa nümaa chi Waseñotsekai Jesucristo. 15 Tawalayuu, ayataʼaya jüchecherüin jaaʼin otta juʼunira jukuwaʼipa wanaapünaa maʼin sümaa tü ekirajünakalü anain jia, süküjünülejeʼeya jümüin tia jee süshajünüle jümüin suluʼu karaloʼuta. 16 Chi Waseñotsekai Jesucristo otta müshia chi Washikai Maleiwa, chi aikai apüla waya, chi amülialakai waaʼin süpüla kaʼikat süpüshuaʼa jee chi weʼreechikai atuma kasa eekai anain maʼin sutuma kamaneein nia wamüin, 17 kasataalejeseʼe namülialüin jaaʼin jee nachecherüin jaaʼin sünain aaʼinraa wanee kasa eekai anain otta süpüla anainjatüin jünüiki.