Karaloʼuta namüinjatka na chajanakana Galacia
6 Tawalayuwaa, eere wanee wayuu eekai nükatalaweein suulia tü nukuwaʼipakat sünain anoujaa sümaa nnojoluin niyaawatüin saaʼu müin nukuwaʼipa, anashi nüchiaanüle jutuma jia laülaakana aaʼin sünain anoujaa, jaaʼinrüinjatpejeʼe tia sümaa kamaneein jia nümüin. Otta jülüjeesü jaaʼin jukuwaʼipa waneʼewai jukua suulia jaainjain kasa mojusü. 2 Ayataʼaya jükaalinjiraain waneʼewai jukua soʼunnaa jiʼrüin müliaa, joonoojeenaka sümaa tü pütchi nuluwataakalü anain Cristo. 3 Emeejiraashi wanee wayuu jülüjale naaʼin niain anain maʼin akuwaʼipa suulialeʼeya wayuu sümaa nnojoluin müin shia. 4 Jülüjeekalaka jaaʼin tü kasa jaaʼinrakat waneʼewai jukua, talateetka jaaʼin sünainjee tü kasa jaaʼinrakat sümaa nnojoluin juʼwanaajireʼerüin jukuwaʼipa sümaa wayuu yalejeeruʼu, 5 jama susouteerüin waneʼewai sukua wayuu saaʼu tü kasa saaʼinrakat.
6 Eere wanee wayuu ekirajünakai sünain nünüiki chi Maleiwakai, anasü nüsülajüle kasa anasü nümüin chi wayuu ekirajakai nia.
7 Nnojo jimeejiraain aaʼin: nnojoishi süpüla shimeʼerainpalainjachin wayuu Maleiwa. Tü kasa nüpünajakat wanee wayuu, shieerü nükotchojoko achon. 8 Chi wayuu apünajakai sümaa shiain jülüjain naaʼin tü kasa mojusü suchuntaakat niʼiruku, eʼreechi nia kasa mojusü* sünainjee tia, meerü nükotchojokoi saaʼin tia. Eekajasaʼa chi wayuu apünajakai sümaa shiain jülüjain naaʼin tü nümakat Maleiwa sükajee tü nüpülainkat, kateechi oʼu süpüla kaʼikat süpüshuaʼa, meerü nükotchojokoi saaʼin tia. 9 Shiakalaka anain aluʼu ayatüleʼeya waaʼinrüin kasa anasü, weʼreenaka kasa anasü suluʼujee tia. Meerü wakotchojokoi saaʼin nnojoliire wakulajaain aaʼin sümaa tia. 10 Eerejeʼeya süpüla waaʼinrüin kasa anasü, anasü waaʼinrüle shia süpüleerua wayuu süpüshuaʼa, nayainjanapejeʼe maʼin waaʼinrüin apüleerua kasa anasü na wawalayuu anoujiraakana wamaa.
11 Taya kashajalaka jümüin karaloʼutakat tüü, jiirakaa sümüin miyoʼuin maʼin soʼu pütchikat tatuma.
12 Na wayuu apüleeruakana jaaʼin shiiʼiree jüchoteʼerajanain süta jukorolo,* naaʼinrüin tia shiiʼiree aneein sünüiki wayuu nachiki, müsü tia natuma süpüla nnojoliinjanain naya müliain atumawaa saaʼujee naküjain pütchi süchiki nükachennüin Cristo sünain wanee wunuʼu süpüla outaa. 13 Jaʼitakajeʼe neʼe na wayuu achoteʼerakana süta nakorolo, nnojoishii naya oonooin sümaa tü sümakat tü Pütchi Aapünakat nümüin Moisés. Jiapejeʼe neʼe napüleeruaka aaʼin shiiʼiree jüchoteʼerajanain süta jukorolo, naaʼinrüin tia shiiʼiree naʼwaataweein suluʼu nemeʼejüin jaaʼin süpüla jüchoteʼerajanain süta jukorolo. 14 Nnojoishi taya aʼwaataainjachin suluʼu wanee kasa, shia neʼe taʼwaataaka aluʼu nükachennüin chi Waseñotsekai Jesucristo sünain wanee wunuʼu süpüla outajachin nia. Nükajee Jesucristo müinnapa outakai saaʼin tamüin na manoujainsaliikana* jee nükajee Jesucristo, müichipa outakai taaʼin namüin na manoujainsaliikana. 15 Tü alanaʼaleekat maʼin ojutu shia müle jekechikaijaʼa naaʼin nukumalain Maleiwa wanee wayuu suulialeʼeya nüchoteʼerüin süta nükorolo jee nnojorülejeʼeya nüchoteʼerüin shia. 16 Kasataalejeseʼe jimatüin jaaʼin jee nümülialaain aaʼin chi Maleiwakai jaalinjee jüpüshuaʼa jiakana oʼunakana süchiirua tü akuwaʼipaa waküjaitpakat, jia süpüshikana tü Israel nümaʼanajeejatkat Maleiwa.
17 Shiakalaka anain aluʼu nnojoire shikeʼejüin taaʼin wayuu, kasipalashi taya, shiyaawatakalaka wayuu nüchepchiain taya Jesús.
18 Tawalayuwaa, kasataalejeseʼe kamaneein maʼin jümüin chi Waseñotsekai Jesucristo saaʼu wayuuin kamaneeshii jia. Amén.*