Levítico

24 Naashajaakalaka Jehová nüchikuaʼa nümaa Moisés sümaa nümüin nümüin: 2 «Püma namüin na israelitakana nalüʼüjaiwa pümüin seita anaka maʼin ayuʼluushika sünainjee olivo süpüla chuwatüin waneepia tü ranparakat, warattuuijeetka sutuma. 3 Niainjachi Aarón süpüʼüyakai tü ranparakat, tü chakat wanee saʼata tü kuluulu soʼulujunakat tü Kuatta Wulekat Maʼin chaka suluʼu tü miichi aʼwaajüleekat, chuwatajatü tia waneepia nutuma aliikajee sünainmüinreʼeya wattaʼa maalü toʼupala tayakai Jehová. Naaʼinrajatü tia waneepia na jüikeyuu eejeenakana jüchikumüin. 4 Yapainjatkalaka nutuma waneepia tü mechuuriakalüirua saaʼuka tü ranpara aainjuushikat süka ooro anaka maʼin tamülatuʼuka tayakai Jehová.

5 »Aapaainjachi pia ariina yütchonka jee paainjeetkalaka süka suluʼu wanee ‹horno› poloosü piamamüin pan lakayaasü, paaʼinrajatü waneʼewai sukua tia pankat süka piama kilo* ariina. 6 Paaʼawaajeerü putuma tia pankat suluʼu aipiruasüwalin shia saaʼu tü meesa aainjuushikat süka ooro anaka maʼin tamülatuʼuka tayakai Jehová. 7 Ejitüinjachi pia olíbano anaka maʼin saaʼu waneʼewai sukua tü pan apaaʼawajuushikat, pijiteetka soʼu siki tü olíbanokot süpüla sotuin taaʼin tayakai Jehová tü pan apaaʼawajuushikat. 8 Eʼitaanawalinjatü tia pankat tamülatuʼu tayakai Jehová soʼu tü sükaliakalü eemerawaa. Tapansaajüin tia süpüla naaʼinrajatüin shia waneepia na israelitakana. 9 Aapünajatü tia pankat nümüin Aarón jee namüin na nüchonniikana, neküinjatü shia suluʼu wanee miichi aʼwaajülee* süka shiain wanee kasa kojutusü aapünajatka nümüin chi sacerdotekai sünainjee tü kasa asülajuushi aʼajünakat tamüin tayakai Jehová. Shia wanee kasa taluwataaka anain aaʼinnajatka waneepia».

10 Eejachikalaka wanee wayuu naʼaka na israelitakana, nüchon wanee egipcio sümüin wanee israelita, nütkaakalaka chia wayuukai nümaa wanee israelita chaa eere kepiain na israelitakana. 11 Niasaʼa süchon tü israelitakat, nuchuntuin Nünülia Maleiwa sümaa mojutuin nia nutuma jee nuʼulejüin niaya. Amaanüshijeseʼe chia wayuukai nümaʼanamüin Moisés. Eekajasaʼa nii chia wayuukai Selomit sünülia, nüchon shia Dibrí, napüshi na nüikeyuukana Dan. 12 Nütaʼünnakalaka chia wayuukai sümaʼainruʼu nüküjain Jehová tü aaʼinnajatkat nüka.

13 Anuukalaka nünüiki Jehová nümüin Moisés: 14 «Pujuʼitira saʼakajee nepia na israelitakana chi wayuu achuntakai tanülia sümaa mojutuin taya nutuma, neʼitaajeetkalaka najapü saaʼu nikii napüshuaʼa na aapakana nünüiki, niʼinaʼanneechika süka ipa süchikijee tia natuma napüshuaʼa na israelitakana. 15 Anuukalaka tü pünüikinjatkat namüin na israelitakana: ‹Asoutajachi wanee wayuu saaʼu naainjala nuʼulejüle tayakai chi Nümaleiwasekai. 16 Outajachikalaka chi eekai achuntuin tanülia tayakai Jehová sümaa mojutuin taya nutuma, aʼinaʼannajachi nia süka ipa natuma napüshuaʼa na israelitakana. Jaʼitashi nnojolin israelitain jee israelitale nia, outajachiaʼaya neʼe saaʼu nuchuntuin tanülia sümaa mojutuin taya nutuma.

17 »›Outajachi wanee wayuu uwomuyuule nia. 18 Chi aʼyaatakai wanee mürüt jee nuʼutule saaʼin, nuwalaajüinjatü shia, naapajatü wanee mürüt shiiʼiraka tia nuʼutakalü aaʼin. 19 Niʼyaatünüle wanee wayuu nutuma wane, aʼyaatünajachi chi makai aainjala nümüin shiiʼiraka tü naainjalakat. 20 Süshataanüle niipüse wanee wayuu ashataanajatü niipüse chi makai atuma nia, shiyuʼnnule noʼu wanee wayuu ayuʼnnajatü noʼu chi makai atuma nia, sujuttinnüle nai wanee wayuu ojuttinnajatü nai chi makai atuma nia. Ayatajatiaʼaya aaʼinnüin nüka wanee wayuu tü naaʼinrakat nümüin wane. 21 Chi eekai aʼyaatüin jee oʼutuin saaʼin wanee mürüt nuwalaajüinjatü shia, eekajasaʼa chi eekai aʼyaatüin sümaa nuʼutuin naaʼin wanee wayuu outajachi nia saaʼujee tia.

22 »›Aaʼinajatü tia nüka chi wayuu eekai israelitain nümaʼaleeya chira eekai nnojolin israelitain süka tayain Jehová chi Jümaleiwasekai›».

23 Naashajaakalaka Moisés namaa na israelitakana, nayuʼlaka na israelitakana saʼakajee nepia chi wayuu achuntakai nünülia Maleiwa sümaa mojutuin nia nutuma, naʼinaʼalaka nia süka ipa. Naaʼinrakalaka na israelitakana wanaapünaa maʼin sümaa tü aluwataanakalü anain Moisés nutuma Jehová.