Palajatka karaloʼuta Samuel
7 Nantakalaka na wayuu chejeʼewaliikana Quiryat-Jearim sünain asaajaa tü kojon shiyaawasekat süpansaajünüin pütchi nümaa Jehová, neʼikajaaka shia nipialuʼumüin Abinadab. Chajatü nipia Abinadab saaʼu wanee namüna. Naneekakalaka Eleazar, chi nüchonkai Abinadab süpüla naaʼinmajüinjatüin tü kojon shiyaawasekat süpansaajünüin pütchi nümaa Jehová.
2 Alatüsü piama shikii juya soʼujeʼereeya tü kaʼi süntinnakalü oʼu tü kojonkot suluʼumüin tü mmakat Quiryat-Jearim. Nachuntakalaka kaalinwaa napüshuaʼa na israelitakana nümüin Jehová. 3 Anuukalaka nünüiki Samuel namüin napüshuaʼa na israelitakana: «Juʼwaajeerejeʼeya Jehová süka süpüshuaʼa jaaʼin, anasü jujutule shiyaakua tü maleiwa suʼwaajakat wayuu jee anasü jujutule shiyaakua Astoret. Anashii jiʼyataale nümüin Jehová süka süpüshuaʼa jaaʼin, nükaalinjeenaka jia noulia na filisteokana». 4 Nojutakalaka na israelitakana niyaakuairua chi maleiwayaashi kanüliakai Baal jee shiyaakuairua tü maleiwayaasü kanüliakat Astoret, niakalaka naʼyataain amüin Jehová.
5 Anuukalaka nünüiki Samuel: «Juutkajeʼera napüshuaʼa na israelitakana suluʼu tü mmakat Mizpá, tachunteechikalaka nümüin Jehová jüpüleerua». 6 Noutkajaakalaka napüshuaʼa na israelitakana suluʼu tü mmakat Mizpá, najaʼitakalaka wüin suluʼujee wanee ishi jee noʼyotokoloko shia nümüin Jehová. Aamajüshiʼiya naya soʼu kaʼikat tia. «Kaainjalashii waya nuulia Jehová», namakalaka suluʼu tia mmakat. Nia anoutaka Samuel sukuwaʼipa wanee kasa naʼaka na israelitakana chaa suluʼu tü mmakat Mizpá.
7 Naapapa süchiki na filisteokana noutkajaain na israelitakana suluʼu tü mmakat Mizpá, noʼunakalaka na laülaakana naaʼu na filisteokana sünain ashutaa naaʼu na israelitakana. Neimmolojookoloko na israelitakana naapapa süchiki nashutunuinjanain aaʼu. 8 «Ayataʼaya puchuntuin kaalinwaa nümüin Jehová, chi Wamaleiwasekai süpüla nükaalinjainjanain waya noulia na filisteokana», müshiijeseʼe namüin na israelitakana nümüin Samuel. 9 Nuʼutakalaka Samuel naaʼin wanee anneetchon jee naʼajakalaka nia nümüin Jehová. Nuchuntakalaka maʼin Samuel nümüin Jehová süpüla nükaalinjainjanain na israelitakana, naapaka Jehová nünüiki Samuel. 10 Sümaʼainruʼu nuʼutuin Samuel naaʼin chi anneetchonkai jee naʼajüin nia nümüin Maleiwa, alüʼülaashii na filisteokana süpüla nashutuinjanain naaʼu na israelitakana. Sütüttakalaka tü juyakat nutuma Jehová sümaa emetuluin maʼin shia, müshiijeseʼe müin jalapaʼakai naaʼin na filisteokana sutuma tia jee nakanajuukalaka natuma na israelitakana. 11 Noʼunakalaka na israelitakana suluʼujee tü mmakat Mizpá jee neipiijakalaka na filisteokana sümaa noʼutuin naaʼin, antaleeshiʼiya naya suluʼumüin wanee mma uuchijeeruʼuka sünain Bet-Car. 12 Süchikijee tia, nüpataakalaka Samuel wanee ipa jee niʼitaakalaka shia pasanain sünain tü mmakat Mizpá otta Jesaná. Ebenézer sünülia tia ipakat nutuma jee nümakalaka: «Nia akaalinjaka waya Jehová». 13 Laülaaka na israelitakana naaʼu na filisteokana, nnojoishii ashutuin na filisteokana saaʼu noumain na israelitakana. Nnojoliikalaka nuuʼulaain Jehová na filisteokana nashutuinjanain naaʼu na israelitakana soʼunnaa katüin noʼu Samuel. 14 Nalejüin na israelitakana noulia na filisteokana tü mmakat Ecrón sünainmüinreʼeya Gat. Nalejüinña süpüshuaʼa tü pueulo eejatkat suluʼu tia mmakat.
Nnojoliika natkaain na israelitakana namaa na amorreokana.
15 Nia anoutaka Samuel sukuwaʼipa wanee kasa naʼaka na israelitakana kataiwaʼaya noʼu. 16 Oʼunawaishi nia juyawai suluʼumüin tü mmakat Betel, Guilgal otta Mizpá jee nunoutawalin sukuwaʼipa wanee kasa namüin na israelitakana. 17 Aleʼejawaishi Samuel suluʼumüin tü mmakat Ramá süka chajatüin tü nipiakat jee nunoutawalin sukuwaʼipa wanee kasa namüin na israelitakana suluʼu tia mmakat. Nukumajaka Samuel wanee aʼajülee nümüin Jehová suluʼu tü mmakat Ramá.