Génesis
35 Anuujeseʼe nünüiki chi Maleiwakai nümüin Jacob süchikijee tia: «Puʼuna maala chamüin Betelmüin, cheechi pia chaʼaya. Pukumajeetka wanee aʼajülee nümüin chi shiimainshikai suluʼu Maleiwain, chi eeʼiyalaakai pümüin soʼu puunjulaain nuulia Esaú chi pipayakai».
2 Anuukalaka nünüiki Jacob sümüin nüpüshi jee namüin na wayuu yalajanakana nümaa: «Acheküsü jujutuin shiyaakua maleiwa eekai jümaʼanain, tü sümaleiwasekat wayuu naataka oumain, anashii joʼoojüle jee juʼwanajaale jüsheʼin. 3 Jooʼuya jümaala chamüin Betelmüin, akumajeechi taya chayaa wanee aʼajülee nümüinjatü chi shiimainshikai suluʼu Maleiwain, chi asoutakai shiʼipajee tü tachuntakat nümüin soʼu müliain maʼin taaʼin, chi tamaakai waneepia jalapünaale taya». 4 Naapüinjeseʼe naya wayuukana nümüin Jacob süpüshuaʼa shiyaakua sümaleiwase wayuu eejatka namaʼana sümaʼaleeya tü cheʼesaa nanainjatkat. Nojoitaka shia Jacob shikiiruʼu wanee wunuʼu miyoʼu maʼin chajatka süʼütpaʼa Siquem.
5 Noʼunapa chejee, mmotka maʼin nutuma Maleiwa na wayuu kepiakana suluʼu tü pueulo pejepünaakat nanain, nnojoliika jaraliin oushikajaain nachiirua na nüchonniikana Jacob. 6 Nüntaka mapa Jacob namaa napüshuaʼa na wayuu nümaajanakana chaa suluʼumüin tü pueulokot Luz, tü Betel münakat, tü chakat suluʼu tü mmakat Canaán. 7 Nukumajaka yala wanee aʼajülee nümüin Maleiwa El-Betel sünülia nutuma, yalajachi eeʼiyalaain nümüin chi shiimainshikai suluʼu Maleiwain soʼu nuunjulaain nuulia chi nipayakai. 8 Sünaajaaka mapa Débora tü wayuu ayuujapuʼukat Rebeca, sojoʼitünaka shikiiruʼu wanee wunuʼu kanüliaka roble, süsaʼaluʼu tü uuchi chakat Betel. Alón-Bacut sümünaka tia wunuʼukot nutuma Jacob.
9 Wopuluʼupa Jacob chejee Padán-Aramjee, niiʼiyalaaka chi Maleiwakai nümüin nüchikuaʼa jee nüküjaka nümüin aneerüin nukuwaʼipa. 10 Anuujeseʼe nünüiki Maleiwa nümüin: «Nnojoleechi pia Jacob münüin, eeʼirateerü tü pünüliakat, Israel müneechi pia jooluʼu». Israel nümünaka yalejeechikireʼeya. 11 Anuuka joo nünüiki chi Maleiwakai nümüin Jacob: «Taya chi Maleiwa Pülashikai maʼin, anakajaʼa kachonle pia wainmaiwa püchonnii. Sutuusheechi pia wainma wayuu otta süʼlaüleena mma napüshi na püikeyuukana. 12 Taapeerü pümüin tü mma taapakat nümüin Abrahán otta Isaac, taapeeriaʼaya tia mmakat namüin na püikeyuukana». 13 Nuʼunaka chi Maleiwakai nümaʼanajee Jacob eejachire yootuin nia nümaa.
14 Nüpaʼawajaaka Jacob ipa jee nüshaʼwaleʼeraka shia eejachire yootuin chi Maleiwakai nümaa. Nüshorottiraka wiino saaʼu sümaa niʼyotuin seita saaʼu nümüin Maleiwa. 15 Ayatüsia Betel müin sünülia nutuma Jacob yala eejachire yootuin nia nümaa chi Maleiwakai.
16 Noʼunakalaka Beteljee. Shiasaʼa nnojoliiwaʼaya nantüin suluʼumüin tü mmakalü Efrat, aʼalijaasü Raquel jee kajaliwakaʼa shia. 17 Anuuka sünüiki tü wayuu eemeijakat Raquel pejeewapa maʼin saalin süleʼe Raquel: «Nnojo mmoluin pia, jemeyuleeriaʼaya pia nümaa chi joʼuukai». 18 Mayeinpa maʼin Raquel jee süpülapünaa sajaʼttüin saaʼin, Ben-Oní müsü nünülia chi joʼuukai sutuma. Benjamínka mapa nünülia nutuma chi nüshikai. 19 Anaajaasü Raquel jee shiʼikünaka süpünaluʼu Efrat, tü Belén münakat. 20 Nüshaʼwaleʼeraka Jacob wanee ipa eere shiʼikünüin müliashii, ichaayülia maaʼulu tia ipakat eere shiʼikünüin Raquel.
21 Nuʼunaka Israel yalejeechiki jee nukumajaka nipia kaʼyataluʼu sünain tü torrekalü Éder. 22 Soʼu chajachin Israel kepiain suluʼu tia mmakat, nüinkaaka Rubén sümaa Bilhá, suwalaʼata nuʼwayuuse chi nüshikai, nütüjaaka saaʼu tia Israel.
Poloo piamamüin napüshuaʼa nüchonnii Jacob. 23 Rubén nünülia chi niʼrumakai sümüin Lea. Simeón, Leví, Judá, Isacar jee Zabulón nanülia na wane nüchonniikana sümüin. 24 José otta Benjamín nanülia na nüchonniikana sümüin Raquel. 25 Dan otta Neftalí nanülia na nüchonniikana sümüin Bilhá, tü süchepchiakat Raquel. 26 Gad jee Aser nanülia na nüchonniikana sümüin Zilpá, tü süchepchiakat Lea. Nüchonnii Jacob naya wayuukana, joʼuushii naya suluʼu tü mmakat Padán-Aram.
27 Nüntaka mapa Jacob eemüin Isaac, chi nüshikai chaa suluʼumüin tü mmakat Mamré, tü pueulokot Quiryat-Arbá, tü Hebrón münakat, eejachire noʼonoopünaain Abrahán nümaa Isaac. 28 Ciento ochenta nuuyase Isaac. 29 Eʼrüshi nia miyoʼuwaa nünaajaakalaka jee niʼikünaka suluʼu naamaka na nüpüshikana. Eʼikünüshi nia nutuma Esaú nümaa Jacob, na nüchonniikana.