Chiiruaajatka karaloʼuta Samuel
7 Chapa David suluʼu tü nipiakat jee jimatapa naaʼin nutuma Jehová süka nnojoluin nushutunuin aaʼu natuma na nüʼünüükana, 2 nümakalaka David nümüin Natán, chi nünüikimaajachikai Maleiwa: «Kepiashi taya suluʼu wanee miichi akumajuushika süka tü wunuʼu kanüliakat cedro, eekajasaʼa tü Kojon shiyaawasekat süpansaajünüin pütchi nümaa chi shiimainshikai suluʼu Maleiwain, chasü neʼe shia suluʼu wanee miichi aainjuushika süka loona». 3 Anuukalaka nünüiki Natán nümüin David: «Anasü paaʼinrüle tü suchuntaakat paaʼin, eeshi Jehová pümaa».
4 Anuujeseʼe nünüiki Jehová nümüin Natán soʼuleʼeya aikat tia: 5 «Anashi puʼunule nümaʼanamüin David chi tachepchiakai jee püküjeechikalaka nümüin pütchikat tüü: ‹Anuu tü nümakat Jehová: «¿Choʼujaasüche saaʼin pümüin pukumajüinjatüin wanee miichi eeinjachire taʼwaajünüin? 6 Nnojoishi kepiaichin taya suluʼu wanee miichi soʼujee tü kaʼi tayuʼlaka oʼu na israelitakana chejee Egiptojee sünainmüinreʼeya maaʼulu, shia neʼe kaluʼuka taya wanee miichi aainjuushi süka loona jee suluʼu tü miichi eere taʼwaajünüin. Alateʼennawaisü tia miichikat. 7 Eetaayaai tachuntuin tia namüin noʼutku na laülaashiikana napüleerua na israelitakana, na wayuu taneekakana süpüla müinjanain narüleʼerakai naaʼin na tapüshikana, nnojotsü tachuntuin tia soʼunnaa toʼunuin namaa na israelitakana, ‹¿jamüshii nnojoliikaʼa jukumajüin wanee miichi tamüin eekai saainjuushin süka tü wunuʼu kanüliakat cedro?›, eetaayaai tachuntuin tia namüin»›. 8 Anuu tü püküjainjatkat nümüin David: ‹Anuu nünüiki Jehová, chi laülaashikai naaʼu na aapiee chakana iipünaa: «Tayuʼluin pia saʼakajee eepünaapuʼule puʼunuin süchiirua tü pürülejüinkat süpüla nekiipüʼüinjachin pia na tapüshikana. 9 Eejeechi taya pümaa jaʼitashi jalain pia, tayamüleena napüshuaʼa na püʼünüükana, eʼnnaajüneechi pia maʼaka neʼennaajünüin na wayuu kojutukana atumawaa. 10 Taapeerü wanee mma namüin na tapüshikana, kepieena naya tatuma suluʼu tia mmakat jee nnojoleerü kasain ekeʼejüin naaʼin, nnojoleena müliain naya atumawaa maʼakaapuʼu müliain naya atumawaa, 11 müshijeseʼe taneeküin wayuu süpüla nekiipüʼüinjanain na tapüshikana jee nnojoleena jamajüin naya natuma na naʼünüükana.
»›» Nüküjainña pümüin Jehová kepieechin pia* nutuma Jehová. 12 Outapa pia jee piʼikünapa naʼaka na putuushinuukana, taneekeechi wanee wayuu naʼakajee na püpüshikana, taneekeechi chi püchonkai süpüla nuluwataainjachin waneepia. 13 Nieechika akumajüin tamüin wanee miichi kojuteechika* anainjee taya sutuma wayuu, nuluwataajeechika tatuma süpüla kaʼikat süpüshuaʼa. 14 Meechi taya maʼaka naaʼin nüshi jee meechi nia tamüin maʼaka naaʼin wanee tachon. Naainjale kasa mojusü, taʼyaateechi nia süka wunuʼu maʼaka saaʼinrüin shia wayuu, meechi tasheʼetakai naaʼin maʼaka saaʼinrüin shia wayuu. 15 Nnojoleerü ajaʼttüin naalin tapüla maʼaka sajaʼttüin naalin Saúl tapüla, chi tasünneʼerakai püpüleerua. 16 Ayateeria eein tü pipiakat, aluwataweechi pia waneepia, aluwataweechi pia süpüla kaʼikat süpüshuaʼa»›».
17 Nüküjakalaka Natán nümüin David süpüshuaʼa tü nümakat Maleiwa, nüküjainña nümüin tü kasa niʼrakat nutuma Maleiwa.
18 Nüikalaakalaka David nümülatuʼu Jehová jee nümakalaka: «Señotkai Jehová, Laülaakai saaʼu kasa süpüshuaʼa, wayuʼulaa neʼe taya. Wattapejeʼe saalii tü kasa anasü paaʼinrakat tapüleerua jee napüleerua na tapüshikana mayaainjeʼe mojutuin naya. 19 Señotkalee Jehová, Laülaakai saaʼu kasa süpüshuaʼa, nnojotsü shiain neʼe püküjain achiki tia tamüin, püküjainña tamüin ayateerüin eein watta kaʼi nipia chi püchepchiakai. Señotkai Jehová, Laülaakai saaʼu kasa süpüshuaʼa, tia shia wanee kasa soonooinjatka amaa wayuu. 20 Piʼraajüin maʼin taya Señotkai Jehová, Laülaakai saaʼu kasa süpüshuaʼa. ¿Jamataalainjatkaʼa tanüiki pümüin tayakai David, chi püchepchiakai? 21 Paaʼinrüin süpüshuaʼa tia makat jee püküjainña shia nümüin chi püchepchiakai, jama shiain tü püchekakat otta shia wanee kasa püküjatüjütkalia achiki paala. 22 Señotkai Jehová, Laülaakai saaʼu kasa süpüshuaʼa, anasü maʼin pukuwaʼipa. Nnojoishi eein wanee eekai müin aka paaʼin, waneeshia neʼe pia suluʼu Maleiwain. Watüjaa aaʼulia müin pukuwaʼipa sünainjee tü kasa waapakat püchiki. 23 Eetaayaai jaralüin müin aka naaʼin na püpüshikana, na israelitakana. Tamaleiwasekalee, piyuʼluinka na israelitakana suluʼujee tü mmakalü Egipto süpüla püpüshinjanain naya. Eʼraajünüshi pia sutuma wayuu sünainjee tü kasa pülasü paainjakat napüleerua. Püjünajaainka wayuu napüleerua sümaʼaleeya sümaleiwase. 24 Püneeküin naya süpüla püpüshinjanain naya waneepia, Jehovákalee, pia Namaleiwasekai.
25 »Jehovákalee, pia Maleiwakai, ayataʼaya jülüjain paaʼin tü püküjakat tachiki jee süchiki tü tepiakat, pikeraaja tü pümakat. 26 Kasataalejeseʼe kojutuin pia* sutuma wayuu süpüla kaʼikat süpüshuaʼa jee sümeetkalaka wayuu püchiki: ‹Nia Jehová chi laülaashikai naaʼu na aapiee chakana iipünaa, chi Namaleiwasekai na israelitakana›. Püküjainña paaʼinrüinjachin kasa anasü tapüleerua jee napüleerua na tapüshikana.* Nnojo piiʼiratüin tü pümakat, ayataʼaya pikeraajüin shia. 27 Jehovákalee, chi laülaashikai naaʼu na aapiee chakana iipünaa, pia chi Namaleiwasekai na israelitakana, püküjain tamüin kepiainjachin taya putuma. Müsüjeseʼe nnojoluin wainmajüin taaʼin sünain oʼuraajaa pümüin süchiki tia. 28 Señotkalee Jehová, Laülaakai saaʼu kasa süpüshuaʼa, pia chi shiimainshikai suluʼu Maleiwain jee shiimain tü pümakat. Anasü maʼin tü püküjaitpakalü achiki nümüin chi püchepchiakai. 29 Anashii anakuwaʼipaliire putuma na tapüshikana,* kasataalejeseʼe sotuin paaʼin naya waneepia, jama shiain püküjain achiki tia Señotkai Jehová, Laülaakai saaʼu kasa süpüshuaʼa. Kasataalejeseʼe anain nakuwaʼipa na tapüshikana putuma süpüla kaʼikat süpüshuaʼa».