Palajatka karaloʼuta nümüinjatka Timoteo
6 Kojutuinjana namüin nalaamain na achepchieekana, nnojoleetkalaka mojuin pütchi nüchiki Maleiwa jee süchiki tü nümakat. 2 Nanoujale nalaamain na wayuu achepchieekana, kojutuinjana naya namüin, jama nanoujain wanaa namaa. Anainjatü maʼin tü naʼyataainkat süka nayain naʼyataain amüin na anoujakana wanaa namaa jee aishii naya napüla.
Ayataʼaya pikirajüin wayuu sünain tüü jee puluwataa naya sünain aaʼinraa shia. 3 Eere wanee wayuu ekirajakai sünain wanee kasa naata suulia tü wekirajakalü anain jee niyoutule süchiki tü kasa anasü nikirajakalü anain chi Waseñotsekai Jesucristo otta nnojorüle pansaain tü nümakat sümaa waʼwaajüinjachin chi Maleiwakai, 4 yaleta aaʼinchijaʼamata chia wayuukai, nnojotsü kasain niyaawatüin aaʼu. Kamalainsü nümüin aʼülüjirawaa jee mojujiraashi nia saaʼu pütchi. Achunjiraashii na wayuukana suluʼujee tia, atkaajiraashii, aküjashii perulaa jee alirajiraashii naya. 5 Aʼülüjiraashii naya waneepia saaʼujee kasa eekai eein, ootunushii naya sutuma wayuu eekai mojuin shikii, na nnojoliikana ayaawatüin saaʼu tü pütchi shiimainkat, nayajaʼa na akanajeenakana nneerü sünainjee aʼwaajaa Maleiwa naashin. 6 Talatüle waaʼin sümaa tü kasa eekat wamaʼana, shiimain weʼreenain kasa anasü sünainjee waʼwaajüin Maleiwa. 7 Joʼuushii waya sümaa nnojoluin kasain eein wamaʼana, akaataajaʼa neʼe outapeena waya nnojoleerü kasain walüʼüjain. 8 Anakajaʼa talatüle waaʼin saaʼu eein wamaʼana tü weküinjatkat jee tü washeʼinjatkat.
9 Na wayuu kachiiruakana aaʼin washirüü, oonooshii naya sümaa tü kasa ooʼulakünakalü aka naaʼin jee müsü sütaʼülakai saaʼin nakuwaʼipa tia makat, eʼrüshii naya müliaa sutuma tü kasa mojusü suchuntaakat naaʼin, jama nnojoluin nayaawatüin saaʼu nakuwaʼipa. 10 Wainma tü kasa mojusü alatakat namüin na wayuu kachiiruakana aaʼin washirüü. Eeshii na ooʼulaakana suulia anoujaa sutuma kachiiruain naaʼin tia jee wainma neʼe tü müliaa neʼrakat.
11 Nnojo paaʼinrüin tia makat, aʼyataashi pia nümüin Maleiwa. Shiainjaʼa anain lotule sukuwaʼipa putuma tü kasa paainjakat, puʼwaaja chi Maleiwakai, kanoula pia, ai püpüla wayuu, püchechera paaʼin jee anamia pia. 12 Maa pütkaakai aaʼin süchiirua tü kasa punoujakalü anain nüchiki Maleiwa. Iche pia süchiirua katüinjatüin poʼu waneepia, tü aneekünakalü apüla pia paala jee tü püküjakalü achiki suʼupala wainma wayuu.
13 Nuʼupala chi Maleiwakai, chi katakai atuma soʼu kasa süpüshuaʼa jee nuʼupala Cristo Jesús, chi aküjakai pütchi nümüin Poncio Pilato, taluwataain pia 14 sünain poonooinjachin sümaa tia pütchikat jee anainjatüin sukuwaʼipa putuma suulia shiyoujain pia wayuu, müinjatü tia putuma niiʼiyalaʼleepaʼaya chi Waseñotsekai Jesucristo. 15 Eeʼiyalaajeechi nia soʼu tü kaʼi eʼitaanakalü apüla tia. Pülashi maʼin nia jee nia chi talatakai aaʼin. Nia Aluwataaka naaʼu na aluwataaliikana jee Naseñotse nia na sülaülakana mma. 16 Nia neʼe waneeshika suluʼu matüjain outaa, kepiashi nia chaa eere chuwatuulin maʼin tü luusakat jee nnojotsü süpüla sürütkaain wayuu chamüin. Nnojoiyüiya nia shiʼrüin wayuu jee nnojoleechi nia shiʼrüin. Kasataalejeseʼe kojutuin nia sutuma wayuu, kasataalejeseʼe pülain nia süpüla kaʼikat süpüshuaʼa. Amén.*
17 Anuu tü püküjainjatkat namüin na washinnuukana maaʼulu yaa: anasü nnojorüle yaletüin naaʼin jee nnojorüle naʼatapajüin anain nakuwaʼipa sünainjee washirüin naya, jama atüjain ajaʼttaa tia, shia anaka aluʼu naʼatapajüle nakaalinjünüin nutuma chi Maleiwakai, chi aapakai wamüin süpüshuaʼa tü kasa talatakalü atuma waaʼin. 18 Püma namüin naaʼinraiwa wainma kasa anasü, nnojoliinjana jeʼiyein jee asülajüliinjana naya. 19 Naaʼinrüle tia, naapeerü Maleiwa namüin wanee washirüü aneetka atuma nakuwaʼipa, nachecheraajeenaka süchiirua katüinjatüin noʼu nutuma Maleiwa.*
20 Timoteo, paaʼinmaja tü kasa eʼitaanakat pajapuluʼu, nnojo poonooin sümaa nanüiki na wayuu peʼipaakana nümaa Maleiwa, na atüjakana naküjainruʼu, nnojotpejeʼe pansaain tü namakat sümaa tü pütchi shiimainkat. 21 Eeshii na wayuu ooʼulaakana suulia anoujaa sutuma naʼwaataain suluʼu tü kasa natüjakalü apüleerua naküjainruʼu.
Kasataalejeseʼe kamaneein jümüin chi Maleiwakai.