Naʼyataain na Aluwataaushikana

1 Suluʼu tü palajatkat karaloʼuta tashajakat pümüin Teófilo, taküjain süchiki süpüshuaʼa tü kasa naaʼinrakat jee nikirajakalü anain Jesús 2 sünainmüinreʼeya tü kaʼi nümaanakalü oʼu chaa iipünaamüin, süchikijee niʼiküin sükajee tü nüpülainkat Maleiwa na aluwataaushikana nüneekajalaka paala. 3 Niiʼiyalaakalaka namüin süchikijee niʼrüin müliaa süpüla nayaawatüinjatüin saaʼu sünain shiimain katüin noʼu nüchikuaʼa. Neʼrüin nia soʼunnaa pienchi shikii kaʼi otta aashajaashi nia süchiki nuluwataajeechin Maleiwa saaʼu tü mmakat. 4 Shiasaʼa nuutkajaapa namaa, nuluwataakalaka naya sünain maa: «Nnojo juʼunuin Jerusalénjee, ayataʼaya jaʼatapajüin tü nüküjakalü achiki chi Tashikai jümüin, tü taashajaakalü achiki jümüin. 5 Woutiisasü wayuu nutuma Juan shiroku wüin, eekajasaʼa jiakana woutiiseena soʼu palit kaʼi sükajee tü nüpülainkat Maleiwa».

6 Noutkajaapa nachikuaʼa na aluwataaushikana nümaa Jesús, namakalaka nümüin: «Señotkalee, ¿püikaleʼerajatü süchikuaʼa tü aluwatawaakat nutuma Maleiwa maaʼutpünaa yaa saaʼu Israel?». 7 Anuujeseʼe nünüiki Jesús namüin: «Niaʼala neʼe chi Tashi chakai iipünaa laülaakai süpüla eʼitawaa tü kaʼi sülatüinjatkalü oʼu tia otta nnojotsü choʼujaain jütüjaainjatüin saaʼu. 8 Katchinjeetpejeʼe jaaʼin süntapa jaaʼumüin tü nüpülainkat Maleiwa, jüküjeenakalaka pütchi tachiki sainküinpünaa Jerusalén, Judeapünaa, Samariapünaa otta sainküinpünaa mmakat». 9 Shiasaʼa süchikijee nüküjain tia, nümaakalaka nia Maleiwa iipünaamüin sümaʼainruʼu neʼrajaain nia, nnojoikalaka nia neʼrüin saaʼujee wanee siruma. 10 Neirakaakalaka maʼin chaa iipünaamüin sümaʼainruʼu nümaanüin, eejaʼalaa namaka piamashii wayuu kasuusü maʼin nasheʼin naʼatoʼu na aluwataaushikana 11 jee namakalaka namüin: «Jia wayuu chejeʼewaliikana Galilea, ¿jamüshii shaʼwataka jia sünain ananajaa chaa iipünaamüin? Chi Jesús jümaapuʼukai, amaanüichipa chaa iipünaamüin. Maʼaka jiʼrüin nia sünain oʼunaa chaa iipünaamüin, meeria neʼe nukuwaʼipa nüleʼejapa».

12 Nashakataka saaʼujee tü wutai kanüliakalü Olivos süpüla naleʼejüinjanain Jerusalénmüin. Nnojotsü wattain maʼin shia sünain Jerusalén, eesü maʼaka saaʼin wanee kilómetro oʼunushi.* 13 Shiasaʼa nantapa chamüin, noʼunakalaka eemüin tü kuatta yalajatkat iipünaa sünain tü miichikat eejanale natunkaapünaain. Eejachi Pedro, Juan, Santiago, Andrés, Felipe, Tomás, Bartolomé, Mateo, Santiago chi nüchonkai Alfeo, Simón chi Yalayalakai aaʼin otta müshia Judas chi nüchonkai Santiago. 14 Wanaawaka naaʼin sünain achuntaa maʼin nümüin Maleiwa, eejanajaʼaya waneinnua jieyuu namaa, eejatü María tü niikat Jesús namaʼaleeya na nuwalayuukana.

15 Soʼunnaa wanee kaʼi noutkajaakalü oʼu, eejana maʼaka saaʼin 120 wayuu jee nüshaʼwalaakalaka Pedro pasanain nanain sünain maa: 16 «Tawalayuu, müinjatüjaʼaya neʼe ekeraajüin tü pütchi ashajünakat suluʼu tü Karaloʼuta Nüchikimaajatkat Maleiwa, tü nüküjakat David sükajee tü nüpülainkat Maleiwa nüchiki Judas, chi anii joo nekiipüʼüin na wayuu ataʼülakana Jesús. 17 Wapüshipuʼu nia otta aneekünüshi nia wanaa wamaa süpüla niʼyataainjachin nümüin Maleiwa. 18 Aapünüsü nneerü nümüin chia wayuukai saaʼu tü kasa mojusü naaʼinrakat, niyaʼlajakalaka wanee mma süka tia nneetkat. Nuʼttapa süka nüraloʼu, süpüttaka tü nüleʼekat sümaa shiyuʼlaʼaleeinña tü niyüülainkat. 19 Saapünaka süchiki tia natuma napüshuaʼa na wayuu kepiakana Jerusalén, ‹Akéldama› namakalaka sümüin tia mmakat, ‹ishamaʼana› maluʼulu tia suluʼu tü nanüikipalakat. 20 Anuu tü ashajünakat suluʼu tü karaloʼuta kanüliakat Salmos:* ‹Malujunainjatü tü nipiakat, nnojotsü jaralüinjatüin kepiain suluʼu› otta ‹Naatainjachi chi niiʼirakakai* sünain tü niʼyataainkat›. 21 Müshijeseʼe choʼujaain wachajaainjachin wanee wayuu niiʼirakainjachikai naʼakajee na wayuu eejanakana wamaa yaaiwaʼaya chi Señotkai Jesús waʼaka, 22 soʼujee tü kaʼi woutiisakalü oʼu Jesús nutuma Juan sünainmüinreʼeya tü kaʼi nümaanakalü oʼu chaa iipünaamüin. Anashi nüneekünüle chia wayuukai süpüla nüküjiraain wanaa wamaa süchiki nüsoʼireʼennüin aaʼin Jesús süchikijee outaa».

23 Naneekakalaka piamashii wayuu: José, chi Barsabás münakai otta eeshi Justo nümünüle jee müshia Matías. 24 Süchikijee tia, noʼuraajaka sünain maa: «Jehovákalee,* pia atüjaakai saaʼu tü suluʼukat saaʼin wayuu. Püküja wamüin jaralin chi wayuu püneekakai naʼakajee na piamashiikana 25 süpüla niʼyataainjachin pümüin otta süpüla aluwataaushinjachin nia maʼaka waaʼin wayakana, tü nuuʼulaakat Judas süpüla amüloulinjachin nia». 26 Nashantanajiraaka, niakalaka aneekünüin Matías, napüshitchikalaka nia na polookana waneemüin aluwataaushi.